1-2. Ovikwaye mbya tjitwa kovahongewa vevari va Jesus indu tjaave kayenda okuyenda koEmaus?

 TJI ya ri 16 ku Nisan 33 O.Z., ovahongewa va Jesus va ri noruhoze nu aave tira. Vevari aave zu moJerusalem nu aave i koEmaus, otjirongo tji tji ri ape ozokilometa 11 okuza koJerusalem. Owo va wire momuinyo mena rokutja Jesus, omurumendu ngwaave kongorere, wa zepewa. Owo va ri nomaundjiro wokutja Messias ma tjitire Ovajuda oviṋa oviwa, posi ya nai eye wa ṱu. Okuzambo pa tjitwa otjiṋa owo tji ve hi naave undjire ko.

² Ngunda ave ri mondjira, va hakaena ku nomurumendu ngwa kayenda pu na wo. Ovahongewa ve mu raera ohunga noviṋa ovivi mbya tjitwa ku Jesus. Nu omurumendu wa uta okuveraera ohunga noviṋa mbi ve hi na maave zembi. Eye wa hungira ohunga nOmatjangwa nomaprofetero okukahurura kutja ongwaye Messias tjaa sokutatumisiwa nokuṱa. Indu ovarumendu vetatu mba tji va vaza moEmaus, owo va muna kutja omurumendu ngwi oJesus, ngwa pendurwa i Mukuru. Owo tjiri va ri nondjoroka okutjiwa kutja Messias u nomuinyo.—Luk. 24:​13-35.

3-4. Ovikwaye mbya tjitwa kovahongewa va Jesus, nu ovikwaye mbi matu kerihonga morupa ndwi? (Oviungura 1:3)

³ Jesus wa kara omayuva 40 kombanda yehi ngunda e hi ya yaruka keyuru, nu momayuva ngo eye we rimunikisa kovahongewa ve povikando ovingi pekepeke. (Lesa Oviungura 1:3.) Oure womayuva 40 ngo, Jesus wa tunduuza ovahongewa ve, mba wire momuinyo nu mbaave tira. Otjiṋa ho tje ve pa ondjoroka, nu tja tjita kutja  ve kare nouvanḓe wokuzuvarisa nokuhonga ombuze ombwa ohunga nOuhona. a

⁴ Eṱe matu yenene okumuna ouwa mokurihonga oviṋa Jesus mbya tjita moruveze ndwo. Morupa ndwi, matu katara komuano Jesus ma ungurisa oruveze ndwo okutunduuza ovahongewa ve, okuvevatera okuzuva Omatjangwa nawa, nokuverongerisa koviungura mbyaave sokuungura moruyaveze. Mongaro aihe, matu katara komuano mu matu yenene okuhorera kotjihorera tja Jesus.

TUNDUUZA VARWE

5. Ongwaye ovahongewa va Jesus tjaave hepa okutunduuzwa?

⁵ Ovahongewa va Jesus aave hepa okutunduuzwa. Omena raye? Tjiva va isa ozonganda zawo, omaṱunḓu, nozongetjefa okukongorera Jesus oruveze aruhe. (Mat. 19:27) Varwe aave tjindwa navi mena rokutja va rira ovahongewa ve. (Joh. 9:22) Owo ve riyandjera okutatumisiwa, nu va tjita omarundurukiro ngo mena rokutja va ri nongamburiro kutja Jesus ongu ri Messias ngwa kwizikwa. (Mat. 16:16) Posi ya indu Jesus tja zepewa, owo va ri nomuhihamwatima tjinene mena rokutja kaave tjiwa kutja mape tjitwa tjike kombunda yonḓiro ye.

6. Ovikwaye Jesus mbya tjita indu tja za nokupendurwa?

⁶ Jesus aa tjiwa kutja kanavi kovahongewa ve okukara noruhoze mena ronḓiro ye. Nu aa tjiwa kutja otjiṋa ho kaatji raisa kutja kava ri nongamburiro. Ku nao, meyuva nda pendurwa ndo, eye wa uta okutunduuza omapanga we. Otjotjihorera, eye we rimunikisa ku Maria Magdalena ngunda e ri peyendo re ama riri. (Joh. 20:​11, 16) Eye wina we rimunikisa kovahongewa ve vevari mba tamunwa pomautiro worupa ndwi. Nu we rimunikisa komuapostele Petrus. (Luk. 24:34) Matu rihongo tjike okuza kotjihorera tja Jesus? Tara ku imbi mbya tjitwa indu tje rimunikisa ku Maria Magdalena.

7. Jesus wa muna Maria ama ungura ye, nu we mu tjitira tjike? (Johanes 20:​11-16) (Wina tara kotjiperendero.)

⁷ Lesa Johanes 20:​11-16. Rukuru omuhukomunene wa Nisan 16, ovakazendu tjiva va ya poruveze Jesus pa pakerwe. (Luk. 24:​1, 10) Omukazendu umwe wa ri Maria Magdalena. Indu Maria tja vaza peyendo, orutu rwa Jesus kamu rwa ri. Eye wa tupuka okukaraera Petrus na Johanes. Ovarumendu vevari mbo va tupuka okuyenda keyendo, nu Maria we ve kongorera. Ovarumendu  tji va za nokumuna kutja orutu rwa Jesus karu mo meyendo, owo va yaruka konganda. Posi ya Maria wa sewa mbo ama riri. Nandarire kutja kaa tjiwa, Jesus wa ri mbo nu ee mu tarere. Eye wa muna kutja aa ririre ye nu aa vanga okumuhuhumiṋa. Ku nao, eye we rimunikisa ku Maria nu wa tjita otjiṋa tji tje mu tunduuza tjinene. Eye we mu raera okuyenda kovangu ve, e keveraere ombuze onanḓengu. Eye aa sokukeveraera kutja Jesus u nomuinyo.—Joh. 20:​17, 18.

8. Matu horere vi ku Jesus?

⁸ Matu horere vi ku Jesus? Eṱe matu horere ku Jesus indu tji matu tunduuza ovakambure ovakwetu kutja ve kayende komurungu okukarera Jehova. Tjimuna Jesus, matu hepa okuyandja ombango komauzeu varwe ngu mave munu, okukondja okuzuva omuano mbu mave fula, nokuvehuhumiṋa. Tara ku imbi mbya tjitwa komukazendu omukambure wena Jocelyn, ngwa zepaisa omuangu we moumba. Eye wa tja: “Oure womieze omingi, ami mba ri moruhoze tjinene.” Posi ya, omurumendu omukambure nomukazendu we ve mu ṋanga koyawo, nu ave mu yandjere kutja ma hungire ohunga nomuano maa fula. Owo va puratena nokumutjinda nawa, nu ve mu raera kutja omunanḓengu tjinene ku Jehova. Jocelyn wa tja: “Ami ee fula tjimuna ee ṱomwine momuronga mbwa handja, posi ya Jehova wa ungurisa ovakambure mba okundjiyama. Owo ve ndji vatera okukara nonḓero yokukayenda komurungu okukarera Jehova.” Eṱe wina matu yenene okutunduuza varwe, indu tji twe ve yandjere okuhungira oumune wawo nokupuratena nawa ku imbi mbi mave hungire. Momuano mbwi, eṱe matu yenene okuvehuhumiṋa, nokuvevatera okukayenda komurungu okukarera Jehova.—Rom. 12:15.

VATERA VARWE OKUZUVA NAWA EMBO RA MUKURU

9. Ouzeu uṋe ovahongewa va Jesus mbu va muna, nu omomuano uṋe Jesus me ve vatera?

⁹ Ovahongewa va Jesus va ri nongamburiro mEmbo ra Mukuru, nu va tjita otja pu mave yenene okukara nonḓuviro ku Jehova. (Joh. 17:6) Posi ya, owo kaave zuu nawa kutja omena raye Jesus tja zepewa otjomutjite wouvi. Jesus aa tjiwa kutja ovahongewa ve ve nongamburiro nu va suvera Jehova, posi ya eye wa muna kutja aave hepa okutjiwa Omatjangwa nawa. (Luk. 9:​44, 45; Joh. 20:9) Ku nao, eye we ve vatera okuzuva nawa omaheero woviṋa mbyaave lese mOmatjangwa. Tara komuano eye ma tjita nao indu tje rimunikisa kovahongewa ve vevari, mba ri mondjira okuyenda koEmaus.

10. Jesus wa vatera vi ovahongewa ve okumuna kutja eye tjiri ongu ri Messias? (Lukas 24:​18-27)

¹⁰ Lesa Lukas 24:​18-27. Jesus ke na pa hakahana okuraera ovarumendu mbo kutja eye owaṋi. Nungwari eye we ve pura omapuriro. Omena raye? Ngahino aa vanga kutja ve mu raere oumune wawo. Nu va tjita nao. Owo ve mu raera kutja va ri nomaundjiro wokutja Jesus ma yama Ovaisrael koṋiṋikizire yOvaroma. Tji va za nokuraera Jesus ozongendo zawo, eye wa ungurisa Omatjangwa okuvatera ovarumendu mbo okuzuva imbi mbi mavi sokutjitwa. b Kombunda ongurova ndjo, eye wa hakaena ku novahongewa ve varwe, nu we ve kahururira omaheero womaprofetero ngo wina. (Luk. 24:​33-48) Ovikwaye mbi matu yenene okurihonga okuza kovitjitwa mbi?

11-12. (a) Ovikwaye mbi matu rihongo okuza komuano Jesus maa hongo ouatjiri wOmbeibela? (Wina tara koviperendero.) (b) Omurumendu omukambure ngwaa hongo Nortey we mu vatera vi?

¹¹ Matu horere vi ku Jesus? Rutenga, indu tji mo hongo ovahongwa voye vOmbeibela, ve pura omapuriro ngu maye ve vatere okuhungira oumune wawo. (Omiano 20:5) Kombunda yokuzuva oumune wawo nawa, ve raisira omatjangwa ngu maye yenene okuvevatera mongaro mu ve ri. O ve raere kutja mave sokutjita vi. Nungwari ve pura omapuriro ohunga nomatjangwa wOmbeibela.  Nu ve tunduuza okuripura ohunga na imbi mbi va lese, nokutja mave ungurisa vi omatjangwa ngo mehupo rawo. Ngatu tare kotjihorera tjomurumendu omukambure moGhana wena Nortey.

¹² Indu tja ri nozombura 16, Nortey wa uta okurihonga Ombeibela. Ousupi kombunda yanao, eṱunḓu re ra uta okumupirukira. Ovikwaye mbye mu vatera okukayenda komurungu okurihonga Ombeibela? Omurumendu omukambure ngwee mu hongo Ombeibela wa hungirira ku Mateus ekondwa 10, okumukahururira kutja Ovakriste vatjiri mave tatumisiwa. Nortey wa tja: “Indu tji mba uta okutatumisiwa, ami mba ri nongamburiro kutja mba munu ouatjiri.” Omurumendu omukambure wina we mu raisira Mateus 10:​16, ndi tja matu sokukengeza. Okuzambo va hungirira komuano ezeva ndo mu mari yenene okuvatera Nortey okukahurura ongamburiro ye koveṱunḓu re nondengero. Kombunda yokupapitisiwa, Nortey aa vanga okurira omukandjira, posi ya ihe aa undjire ko kutja u sokuyenda komahongero wokombanda. Omurumendu omukambure ke na pa raera Nortey kutja nga tjite vi, nungwari we mu pura omapuriro okumuvatera okuripurira komatjangwa wOmbeibela kokutja ma toore omukambo omusemba. Nortey wa tjita vi? Eye wa rira omukandjira woruveze aruhe. Ihe we mu raera kutja nga ze po ponganda. Nortey wa ri noumune uṋe ohunga noviṋa mbya tjitwa ku ye? Eye wa tja: “Ami mbi nongamburiro kutja mba toora omukambo omusemba.” Indu tji matu tunduuza varwe okuripurira ko oukoto kOmatjangwa, eṱe matu ve vatere okukurisa ongamburiro yawo nokukayenda komurungu okukarera Jehova.—Ef. 3:​16-19.

VATERA OVARUMENDU OVAKAMBURE OKURIRA “OTJOVIYANDJEWA”

13. Ovikwaye Jesus mbya tjita kutja otjiungura tjokuzuvarisa tji kayende komurungu kombunda yaindu eye tja yaruka keyuru? (Ovaefese 4:8)

¹³ Indu Jesus tja ri kombanda yehi, eye wa ungura oviṋa avihe Ihe mbye mu pa okutjita. (Joh. 17:4) Posi ya Jesus kaa munu kutja eye erike ongu ma yenene okutjita oviṋa Jehova mbyaa vanga. Indu tjaa zuvarisa kombanda yehi oure wozombura ndatu nohinga, eye aa hongo varwe. Jesus wa ri nongamburiro movahongewa ve. Eye we ve pa omerizirira wokuhonga nokuzuvarisa ombuze ombwa, nokutjevera ovakarere va Jehova. Ovahongewa tjiva mbaave hongorere po otjiungura hi, mape ya va ri nozombura zokehi 30. Ovaefese 4:8 (NWT) mari tja: “Orondu Omatjangwa maye tja: ‘Indu tja ronda koruveze rwokombanda eye wa twaerera  ovahuurwa. Eye wa yandja ovarumendu otjoviyandjewa.’” Ovarumendu mba va ungura oukukutu pu na Jesus nu va ri ovaṱakame ku ye. Posi ya ngunda e hi ya yaruka keyuru, eye we ve honga oviṋa ovingi kutja ve yenene okurira “otjoviyandjewa.” Eye we ve honga vi?

14. Ovikwaye Jesus mbya honga ovahongewa ve momayuva we 40 omasenina kombanda yehi? (Wina tara kotjiperendero.)

¹⁴ Jesus wa yandja eronga kovahongewa ve ndaari sokuvevatera, nu eye wa tjita nao momuano omuwa. Otjotjihorera, eye wa muna kutja ovahongewa tjiva kaave kambura kutja eye wa ṱa nu wa pendurwa. Ku nao, eye we ve vatera okutjiwa ouatjiri mokuvepa omaronga. (Luk. 24:​25-27; Joh. 20:27) Eye wina we ve raera kutja ve yandje ombango tjinene kokutjevera ovakarere va Jehova, pendje nokuyandja ombango kokuungura ozongetjefa zawo. (Joh. 21:15) Eye we ve zemburukisa kutja ave he rikende nomerizirira varwe ngu mave munu motjiungura tja Jehova. (Joh. 21:​20-22) Eye wa vatera tjiva mba ri noumune woposyo ohunga nOuhona wa Mukuru, nokuvevatera okuyandja ombango okuzuvarisa ombuze ombwa. (Oviung. 1:​6-8) Ovanene vombongo mave yenene okurihonga tjike okuza ku Jesus?

15-16. (a) Omomiano viṋe ovanene vombongo mu mave yenene okuhorera ku Jesus? Kahurura. (b) Omurumendu omukambure wena Patrick wa muna vi ouwa okuza komavyuriro?

¹⁵ Ovanene vombongo mave yenene okuhorera vi ku Jesus? Owo mave sokuhonga ovarumendu ovakambure, nandarire imba omitanda, okuungura oviungura ovingi mombongo. c Ovanene vombongo ve tjiwa kutja ovarumendu ovakambure mba mape ya mave hepa okurihonga oviṋa ovingi. Owo mave hepa okuvyura ovarumendu omitanda mba norusuvero kutja ve rihonge okurira overisusuparise, ovaṱakame, nu mbe nonḓero yokuvatera varwe.—1 Tim. 3:1; 2 Tim. 2:2; 1 Petr. 5:5.

¹⁶ Tara komuano omurumendu omukambure wena Patrick ma muna ouwa okuza komavyuriro. Indu tja ri omuṱiṱi, eye aa hungire nokutjinda varwe navi, nandarire ovakazendu ovakambure. Omunene wombongo aa munu kutja Patrick aa hepa okutjita omarundurukiro, nu we mu pa omaronga omakahu. Posi ya wa tjita nao momuano omuwa. Patrick wa tja: “Ami mba ri  nondjoroka kutja omunene wombongo we ndji raisira oviṋa mbyee hepa okuungurira ko. Ami ee u momuinyo indu tji me munu ovarumendu ovakambure varwe amave munu omerizirira ami ngee vanga. Posi ya omunene wombongo we ndji vatera okutjiwa kutja ee hepa okurira omurisusuparise nokuraisa orusuvero kovakambure ovakwetu, pendje nokuyandja ombango kokumuna omerizirira.” Ku nao, Patrick wa rira omunene wombongo indu tja ri nozombura 23.—Omiano 27:9.

17. Omomuano uṋe Jesus ma raisa kutja wa ri nongamburiro movahongewa ve?

¹⁷ Jesus wa yandja omerizirira kovahongewa ve okuraera ovandu ohunga nombuze ombwa nokuvekahururira Omatjangwa. Ovahongewa mape ya aave munu kutja kamaave yenene okuungura oviungura Jesus mbye ve ningira okuungura. Posi ya Jesus wa ri nongamburiro kutja mave yenene okuungura oviungura mbi. Eye opaa zokuveraera omambo nga: “Otja Tate tjinga e Ndji hinda otjinga ame mu hindi.”—Joh. 20:21.

18. Ovanene vombongo mave yenene vi okuhorera ku Jesus?

¹⁸ Ovanene vombongo mave yenene okuhorera vi ku Jesus? Ovanene vombongo mbe nondjiviro ve rongerisa varwe mokuvepa omerizirira. (Fil. 2:​19-22) Otjotjihorera, ovanene vombongo mave yenene okuningira omitanda okuvatera okukohorora nokuṱuna Etuwo rOmerikotameneno. Ovanene vombongo mave yenene okuyandja otjiungura kovarumendu ovakambure mokuverongerisa omuano mu mave yenene okuungura otjiungura ho, nokukara nongamburiro kutja mave tji ungura nawa. Omunene wombongo omupe wena Matthew u nondangi tjinene kutja ovanene vombongo mbe nondjiviro ve mu honga okuungura oviungura pekepeke mombongo, nu va ri nongamburiro kutja eye me vi ungura nawa. Eye wa tja: “Indu tji mba tjiti ozondataiziro, owo aave ndji vatere okurihongera kozondataiziro zandje kutja mbi ungurire ko otjikando tjarwe.” d

19. Matu sokurimanena okutjita tjike?

¹⁹ Jesus wa ungurisa omayuva we 40 omasenina kombanda yehi okutunduuza, okuhonga, nokurongerisa varwe. Ngatu rimanene okuhorera kotjihorera tje. (1 Petr. 2:21) Eye me tu vatere okutjita nao. Eye wina we tu kwizikira kutja: “Ami mbi ri puna eṋe omayuva aehe nga komaandero wouye.”—Mat. 28:20.