1-2. (a) Omapuriro yeṋe tjiva ovakarere va Jehova ngu mape ya ave ripura oveni? (b) Matu katara ku ye morupa ndwi?

 EṰE atuhe, kutja oweṱe ovanene poo ovaṱiṱi, povikando tjiva tu kara nomakeyakeyero. a Otjotjihorera, omuzuvarise omutanda mape ya e ripura kutja, hapo Jehova tjiri u rikendera ku ye? Mena rotjiṋa hi, eye mape ya a keyakeya okupapitisiwa. Poo ripura nomurumendu omukambure ngwa toorora okutwa po otjiungura tja Jehova poruveze orutenga mehupo re indu tja ri omutanda, pendje nokupaha oviungura mbi mavi mu pe ovimariva ovingi. Nai eye u novimariva mbya yenene kovihepwa vyeṱunḓu re uriri. Eye mape ya e ripura kutja wa toora omukambo omusemba indu tja ri omutanda poo indee. Poo ripura ohunga nomukazendu omukambure omunene motjiwondo ngwa ngundipara morutu. Eye mape ya a u momuinyo mena rokutja ka yenene okuungura oviṋa mbyaa tjiti rukuru. Hapo ove wa rora okuripura omuini omapuriro otja inga: ‘Hapo Jehova tjiri u rikendera kwami? Hapo ozongondjero nḓu mba tjitira Jehova za ri ozosemba? Hapo ngamba me yenene okuungurira Jehova?’

² Indu tji tu ha munine omaziriro komapuriro otja inga, mape ya atu pandjara ongamburiro mu Jehova, nu nandarire atu isa okumukarera. Morupa ndwi, matu katara komuano Ombeibela mu mai yenene okutuvatera indu tji tu muna kutja Jehova ke rikendere eṱe, poo tji tu muna kutja ozondando nḓu twa tjita morukapitaveze kazombwa, nokutja kamaatu yenene okuungurisiwa i Jehova.

 OVIKWAYE MBI MAVI YENENE OKUTUVATERA INDU TJI TU NOMAPURIRO?

3. Matu yenene okutjita vi indu tji tu nomapuriro ngu maye tu kendisa?

³ Indu tji tu nomapuriro, ounanḓengu okupaha omaziriro mOmbeibela. Indu tji twa tjiti nao, ongamburiro yetu mu Jehova noupanga wetu ku na ye mavi kurire ko, natu ‘zikama mongamburiro.’—1 Kor. 16:13.

4. Omomuano uṋe mu tu ‘rora oviṋa avihe’? (1 Ovatesalonika 5:21)

⁴ Lesa 1 Ovatesalonika 5:21. Ombeibela i tu tunduuza kutja tu ‘rore oviṋa avihe.’ Omomuano uṋe mu matu yenene okutjita nao? Indu tji matu keyakeya ohunga notjiṋa kaaṋi, matu sokutara kutja Ombeibela mai tja vi ohunga notjiṋa ho. Ripura ohunga nomutanda ngu ripura kutja tjiri Jehova u rikendera ku ye poo indee. Hapo eye tji me ripura nao, iho matji hee kutja Jehova ke nakonatja na ye? Kako, eye ma ‘sokurora oviṋa avihe’ mokukonḓonona Ombeibela kutja ma tjiwe oumune wa Jehova ohunga na ye.

5. Omomuano uṋe mu matu yenene okumuna omaziriro wa Jehova komapuriro wetu?

⁵ Indu tji matu lese Ombeibela, i ri tjimuna Jehova ma hungire ku na eṱe. Posi ya matu hepa okutjita ovingi indu tji matu vanga okumuna omaziriro wa Jehova komapuriro wetu. Eṱe matu hepa okupaha nokukonḓonona omatjangwa ngu maye tu vatere okuzira epuriro ndi mari tu kendisa. Matu yenene okutjita nao, mokutjita omakonḓononeno momambo wetu nga zikamena kOmbeibela. (Omiano 2:​3-6) Eṱe matu hepa okukumba ku Jehova nokumuningira kutja me tu vatere okumuna eziriro kepuriro retu. Okuzambo matu yenene okupaha omirari vyOmbeibela nondjivisiro ndji matu yenene okuungurisa mongaro yetu. Wina onawa okulesa omahungi nge ri mOmbeibela wovakarere va Jehova ovaṱakame mba ri mongaro tjimuna indji oyetu.

6. Hapo ozombongarero zombongo ze tu vatera vi indu tji tu nomapuriro?

⁶ Indu tji matu konḓonona Ombeibela pozombongarero zombongo, i ri tjimuna Jehova ma hungire ku na eṱe wina. Indu tji tu kara pozombongarero zombongo aruhe, mape ya atu zuu ehungi poo mape ya omundu a yandja eziriro ndi mari ziri epuriro ndi tu na ro. (Omiano 27:17) Matu katara koviṋa mbi mavi yenene okutuvatera okumuna omaziriro komapuriro wetu.

HAPO JEHOVA U RIKENDERA OVE?

7. Epuriro riṋe ovandu tjiva ndi mape ya ave ripura?

⁷ Ove wa rora okuripura omuini kutja, ‘Hapo Jehova tjiri u rikendera kwami?’ Indu tji u rimuna kutja kaove omunanḓengu, mape ya o munu kutja komoo yenene okurira epanga ra Jehova ngu ri Omuute wouye auhe. Ombara David mape ya wa ri noumune otja imbwo. Eye aa munu kutja otjiṋa otjihimise kutja Jehova u rikendera ovandu. Ku nao, eye opaa zokupura kutja: “Muhona, omundu omukwatjike kutja mo rikendere ye, nomuatje womundu kutja mo ningi ko na tja na ye?” (Eps. 144:3) Eziriro kepuriro ndo mo ri vaza pi?

8. Otja ku 1 Samuel 16:​6, 7, 10-12, ovikwaye Jehova mbye muna movandu?

⁸ Ombeibela i tu honga kutja Jehova u muna imba mbe munika aayo kavananḓengu kovandu varwe. Otjotjihorera, Jehova wa hinda Samuel kondjuwo ya Isai okukatwirisa umwe wovanatje ve ovazandu otjombara ya Israel yomoruyaveze. Isai wa isana ovazandu ve hambombari okukahakaena ku na Samuel, posi ya ke na pa isana David ngwa ri omuṱiṱi pu avehe. b Posi ya Jehova wa toorora David.  (Lesa 1 Samuel 16: 6, 7, 10-12.) Jehova aa tjiwa kutja David omundu ngu ri vi, nu aa tjiwa kutja eye omurumendu omutanda ngwe mu suvera tjinene.

9. Omena raye tji mo yenene okukara nongamburiro kutja Jehova u nonḓero move? (Wina tara kotjiperendero.)

⁹ Ripura nomuano Jehova ma raisa kutja u rikendera kove. Eye u ku pa ondunge osemba ndji mai hitasana nongaro mu u ri. (Eps. 32:8) Ihi tji raisa kutja eye u ku tjiwa nawa. (Eps. 139:1) Indu tji mo ṱakamisa ondunge Jehova ndje ku pe nokutara kutja mai ku vatere vi, ove mo kara nongamburiro kutja Jehova u nonḓero move. (1 Ekuruh. 28:9; Oviung. 17:​26, 27) Jehova u muna ozongondjero azehe nḓu u tjita. Eye wina u muna ovikaṋena oviwa mbi u na vyo nu u vanga okurira epanga roye. (Jer. 17:10) Jehova ma kara nondjoroka tjinene tji mo vanga okurira epanga re.—1 Joh. 4:19.

INDU TJI U MUNA KUTJA KO TOORERE OMIKAMBO OMISEMBA MORUKAPITAVEZE

10. Indu tji matu ripura ohunga nozondando nḓu twa tjita morukapitaveze, mape ya atu ripura omapuriro yeṋe?

¹⁰ Povikando, ovandu tjiva mape ya ave ripura ohunga nozondando nḓu va tjita morukapitaveze, nu ave keyakeya kutja va toora omikambo omisemba poo indee. Mape ya va isa oviungura mbyaavi sutu nawa, poo va toorora okuhinokuuta ongetjefa kutja ve ungure ovingi motjiungura tja Jehova. Posi ya mape ya va toora omukambo mbo ozombura ozengi nḓa kapita. Owo mape ya ave ripura ohunga novandu mbu mave tjiwa mba toora omuhunga warwe, nu mbe munika aayo ve novimariva ovingi nehupo ewa. Mena ranao, owo mape ya ave ripura kutja: ‘Hapo ozongondjero nḓu mba tjitira Jehova za ri osemba? Poo andakuzu mba ungura oukukutu kutja mbi kare novimariva ovingi nai?’

11. Omutjange wEpsalme 73 wa ri nomeripura yeṋe?

 ¹¹ Indu tji u ripura ohunga nomapuriro otja ingo, tara ku imbi Ombeibela mbi hungira ohunga nomutjange wEpsalme 73. Eye wa muna ovandu mbe hi na aave karere Jehova posi ya mba ri ovaveruke, ovatumbe, nu mbaave munika aayo kave nomauzeu. (Eps. 73:​3-5, 12) Indu tjaa munu kutja owo ve munika aayo ve hupa nawa, iho tja tjita kutja ma mune kutja ozongondjero ze zokukarera Jehova za ri omungandjo. Eye aa ‘hihamwa eyuva arihe’ mena rokuwa momuinyo. (Eps. 73:​13, 14) Ovikwaye mbya vatera omutjange wEpsalme indu tja wire momuinyo?

12. Otja kEpsalme 73:​16-18, ovikwaye mbya vatera omutjange wEpsalme indu tja wire momuinyo?

¹² Lesa Epsalme 73:​16-18. Omutjange wEpsalme wa ya kondjuwo ondjapuke ya Jehova. Imbo wa yenena okuripura momuano omusemba. Eye wa muna kutja nandarire kutja tjiva va ri nehupo ewa, owo kava ri nomaundjiro woruyaveze oruwa. Ku nao, eye wa ri nohange momuinyo. Nu wa ri nongamburiro kutja okutwa po Jehova poruveze orutenga mehupo re, ya ri omukambo omusemba tjinene. Mena ranao, we rimanena okukayenda komurungu okukarera Jehova.—Eps. 73:​23-28.

13. Mo yenene okutjita vi indu tji mo munu kutja wa toora omikambo mbi he ri omisemba morukapitaveze? (Wina tara kotjiperendero.)

¹³ Ove wina mo yenene okumuna ohange momuinyo nombatero yEmbo ra Mukuru. Omomuano uṋe? Zemburuka oviṋa oviwa mbi u na vyo, mbi mavi kamburire mo ozondaya za Jehova, nu zemburuka kutja imba mbe ha karere Jehova kave munu ombatero ye. Ovandu ovengi mbe ha karere Jehova ve muna kutja okukara nehupo ewa ootjiṋa  otjinanḓengu mena rokutja kave nomaundjiro woruyaveze. Posi ya Jehova u ku sera ondaya nai, nu wa kwizika kutja moruyaveze me kekupa oviṋa ovingi oviwa. (Eps. 145:16) Nu wina ripura kutja: Andakuzu wa toora omikambo vyarwe, kotjo tjiwa kutja ehupo roye mari sana pi ndino. Posi ya indu tji wa toora omikambo mena rokutja wa suvera Mukuru na varwe, ove mo kara nondjoroka tjinene mehupo roye.

INDU TJI MO MUNU KUTJA JEHOVA KAMAA YENENE OKUKUUNGURISA

14. Ovandu tjiva ve ri mongaro iṋe, nu epuriro riṋe ndi mape ya ave ripura oveni?

¹⁴ Ovakarere va Jehova tjiva kave yenene okuungura ovingi otja pu mave vanga mena rokutja ovanene motjiwondo, va vera, poo ve hupa nouzeu umwe poo oukwao. Ku nao mape ya ave munu kutja kavananḓengu ku Jehova. Owo mape ya ave ripura kutja: ‘Hapo me yenene okuungurisiwa i Jehova?’

15. Omutjange wEpsalme 71 wa ri nongamburiro mu iye?

¹⁵ Omutjange wEpsalme 71 wina wa ri mongaro tjingeyo. Eye wa kumba kutja: “O ndji esa ko, omasa wandje tji ya pwire.” (Eps. 71:​9, 18) Nandarire kutja wa ngundiparere, omutjange wEpsalme wa ri nongamburiro kutja Jehova me mu vatere indu tje mu karere nouṱakame. Omutjange wEpsalme we rihonga kutja Jehova u nonyuṋe mu imba mbe kondja otja pu mave yenene okumukarera, nandarire kutja kave yenene okuungura ovingi otja pu mave vanga.—Eps. 37:​23-25.

16. Omomiano viṋe Jehova me ungurisa imba mbe ri ovanene motjiwondo? (Epsalme 92:​12-15)

¹⁶ Indu tji u ri omundu omunene motjiwondo, ripura kutja Jehova u noumune uṋe ohunga na ove. Eye ma yenene okukuvatera okukayenda komurungu okumukarera nouṱakame, nandarire kutja orutu rwoye karu nokuyenena. (Lesa Epsalme 92:​12-15.) Pendje  nokuripurira ku imbi mbi u ha yenene okutjita rukwao, yandja ombango ku imbi mbi mo yenene okutjita. Otjotjihorera, ouṱakame woye nomuano mu mo raisa onḓero mu wo, mau yenene okuvatera varwe. Ove mo yenene okuraera varwe omuano Jehova mee ku vatera oure wozombura ozengi, nokutja omakwizikiro yeṋe wOmbeibela ngu u zera okukamuna moruyaveze. Nu wina o zembi kutja indu tji mo kumbire varwe, ozongumbiro zoye ze ve vatera tjinene. (1 Petr. 3:12) Kainatja kutja tu ri mongaro iṋe, eṱe atuhe matu yenene okutjitira Jehova na varwe otjiṋa.

17. Ongwaye tji tu ha sokurisasaneka ku na varwe?

¹⁷ Indu tji wa wa momuinyo mena rokutja ko yenene okuungura ovingi motjiungura tja Jehova, kara nongamburiro kutja eye u vara oviṋa avihe mbi mo yenene okumutjitira. Mape ya o sasaneke imbi mbi u tjita ku na imbi varwe mbi ve yenena okutjita. Posi ya o tjiti nao. Omena raye? Mena rokutja Jehova ke tu sasaneke ku na varwe. (Gal. 6:4) Otjotjihorera, Maria wa yandja ovyomoro omuwa ku Jesus mbya kosa ovimariva ovingi. (Joh. 12:​3-5) Nu omuhepundu omusyona wa yumba oumariva uvari wongoporo wonḓengu onḓiṱi. (Luk. 21:​1-4) Posi ya, Jesus ke na pa sasaneka oviyandjewa vyovakazendu vevari mba. Nungwari, wa muna kutja aveyevari va raisa ongamburiro. Jesus aa horere ku Ihe. Ku nao, mo yenene okukara nongamburiro kutja Jehova u vara oviṋa avihe mbi u mu tjitira mena rongamburiro norusuvero ndu u na rwo ku ye, nandarire kutja u muna kutja oviṱiṱi.

18. Ovikwaye mbi mavi tu vatere indu tji tu nomakeyakeyero? (Wina tara kokawongo nga, “ Embo ra Jehova mari yenene okukuvatera indu tji u nomakeyakeyero.”)

¹⁸ Eṱe atuhe povikando tjiva tu kara nomakeyakeyero. Posi ya otja tji twe rihongo, Ombeibela mai yenene okutuvatera. Ku nao, kondja otja pu mo yenene okupaha omaziriro komapuriro woye, nu okuzambo otji u hi nokurikenda rukwao. Jehova u ku tjiwa kourike woye. Eye u nondangi kozongondjero azehe nḓu we mu tjitira okumutwa po poruveze orutenga mehupo roye. Nu eye ma kayenenisa omakwizikiro we wokukupa ondjambi. Kara nongamburiro kutja Jehova wa suvera nu u rikendera ovakarere ve avehe ovaṱakame.