1. Orusuvero ru ri raisa vi mokati kovandu va Mukuru?

OVANDU va Mukuru eṱunḓu rimwe ropopambepo, ndi raisasana orusuvero. (1 Joh. 4:16, 21) Orusuvero ndo ka ru ri raisa indu tji pa tjitwa otjiṋa otjinene uriri, nungwari wina moviṋa oviṱiṱi, tjimuna okuhungira omambo omatunge nokutjitira varwe oviṋa oviwa. Indu tji matu raisa otjari ku varwe nokuripurira ku wo, tu rira ‘ovanatje ovasuverwa vaNdjambi, orondu tu kondja okuhorera ku Ye.’​—Ef. 5:1.

2. Jesus wa raisa vi orusuvero rwa Mukuru?

² Jesus wa horera ku Ihe nawa. “Indjeye ku Ami eṋe amuhe mbu mwa pungarisiwa,” Jesus wa tja nao, “nu Ami me mu suvisa . . . , tjinga ambi ri ongozu nomurisusuparise momutima.” (Mat. 11:28, 29) Indu tji matu horere ku Kristus ‘mokurikendera omusyona nomuhepe.’ Tate wetu womeyuru u kara nonyuṋe mweṱe nu ku tu yetera ondjoroka tjinene. (Eps. 41:1) Ngatu tare kutja matu ripurire vi ku varwe meṱunḓu, mombongo, na motjiungura tjokuzuvarisa.

3. Komurumendu, okupuratena nokuripurira ku varwe vi kaenda vi pamwe? (Tara kotjiperendero pomautiro worupa ndwi.)

³ Ovarumendu ve sokuhongorerapo eṱunḓu mokuripurira ku varwe meṱunḓu. (Ef. 5:25; 6:4) Otjotjiherera, ovarumendu ve sokukara puna ovakazendu vawo amave “tjiwa nawa kutja owo ovandu ovingundi,” omambo nga wina ye yenena okuheya “okuripurira ku wo; nokuvepuratena kutja u zuve kutja mave tja vi.” (1 Petr. 3:7.) Okupuratena nokuripurira ku varwe vi kaenda pamwe. Otjotjihorera, omurumendu ngu ripurira komukazendu we u tjiwa nawa kutja ve nozongaro nḓa panguka momuano umwe poo warwe, posi yokutja omukazendu u nonḓengu yokombanda tjimuna ndji i nomurumendu. (Gen. 2:18) Kunao eye u ripurira komuano omukazendu we mbu ma fula, nokumupa ondengero ndje mu pwire. Omukazendu umwe mo Canada wa tja: “Omurumendu wandje u rirpurira komuano mbu me fula nu ka roro okuhungira oviṋa tjimuna okutja, ‘Ove ko sokufula nao.’ Eye wina u ndji puratena nawa. Nu tja munu kutja omuano ami mbu me ripura ka muwa, eye u ndji raera nawa nomutima omuwa norusuvero.”

4. Omurumendu ma raisa vi kutja u ripurira komukazendu we, momuano mbu ma hungire ku novakazendu varwe?

⁴ Omurumendu ngu ripurira komukazendu we wina u ripurira komuano omukazendu we mbu ma fula indu tji ma hungire poo tji ma ungura pu novakazendu varwe. Eye ka nyanda orombe kuna wo poo okuraisa kutja u nonḓero mu wo nu ka raisa onḓero movakazendu varwe tji ma ungurisa omahakaeneno womotungovi. Ii, eye u rira omuṱakame komukazendu we, ka kutja orusuvero ndwe na ro kuna ye uriri, nungwari wina omena rokutja wa suvera Mukuru nu wa tonda oviṋa Mukuru mbya tonda.​—Lesa Epsalme 19:14; 97:10.

5. Omukazendu ma yenene vi okuripurira komurumendu we?

⁵ Ndovazu omurumendu ma horere kotjiuru tje, Jesus Kristus, ihi tji tjita kutja omukazendu we me mu “yozike.” (Ef. 5:22-25, 33) Nu omukazendu tje nondengero nomurumendu we, u ripurira komurumendu we, indu tje nomerizirira omengi mombongo poo tje noviṋa ovingi mbi ma sokuungura. “Povikando, aa tara kongaro ndji me raisa na munu kutja hi ri nawa,” omurumendu umwe mo Britanja wa tja nao. “Nu okuzambo a tjiti tjimuna Omiano 20:5 tji ri hungira, nandarire kutja ihi matji kambura oruveze ‘okuteka’ omeripura wandje nu tje ri oruveze ami ndu me munu kutja ohepero kwami okuhungira ohunga notjiṋa ho kuna ye.”

6. Atuhe matu vatere vi ovanatje okuripurira ku varwe, nu ovanatje ve muna mouwa waye?

⁶ Indu ovanene tji mave rikenderasana, ve twapo otjihorera otjiwa kovanatje. Nu ovanene ve nomerizirira wokuhonga ovanatje vawo omuano wokuripurira kovandu varwe. Otjotjihorera, ovanene mave sokuvehonga nokuveraera kutja ka ve sokutupuka nokurambasanena mEtuwo rOmerikotameneno. Tji ve ri pomeero wa pamwe, ovanene mave yenene okuraera ovanatje vawo okuundja ngandu ovakurundu tji va kambura ovikurya rutenga. Otjingaperi, kutja avehe mombongo mave yenene okuvatera ovanene vovanatje. Otjotjihorera, indu omuatje tje tu tjitire otjiṋa otjiwa, ngahino rumwe we tu patururire omuvero poo we ku toorere ovipaturure mbi wa wisa, tu sokuposa ondangi nokumutanga kongaro ye ombwa ndjo. Okutjita nao ku ṱuna tjinene kovanatje, nu ve uta okumuna oveni kutja “mokuyandja mu nenyando tjinene pokupewa.”​—Oviung. 20:35.

7. Jesus wa tjinda vi omundu umwe omboro nu ngwa setire eraka, nu matu rihongere ko ye kotjihorera tja Jesus?

⁷ Oruveze rumwe Jesus tja ri morukondwa rwa Dekapolis, ovandu “va eta ku Ye omundu umwe omboro nu ngwa setire eraka.” (Mar. 7:31-35) Pendje nokumuverura mokati kovandu, Jesus wa isa mo omundu ngwi motjimbumba “e mu twara peke” ne ke mu verura. Omena raye tja tjita nao? Mape ya kutja ouremane we aau tjiti kutja aha  fula nawa mokati kovandu. Ngahino Jesus wa muna otjiṋa tjo momundu ngo, na munu kutja o nawa tje mu twara peke nu eke mu verukisira kokure novandu. Otjingaperi, kutja ka tu yenene okutjita ovihimise. Posi yokutja matu yenene nu matu sokurikendera varwe nokuripurira komuano ovakambure ovakwetu mu ma ve fula. Omuapostele Paulus wa tjanga kutja: “Ngatu rikenderasane mokupandiparisasana morusuvero na moviungura oviwa.” (Hebr. 10:24) Jesus wa muna omuano omurumendu omboro mbwa fula ne mu tjindi momuano omuwa. Tjiri iho otjihorera otjiwa kweṱe!

8, 9. Omomiano viṋe mu matu yenene okuripurira kovakurundu vetu na imba mba mana omasa? (Yandja ovihorera.)

⁸ Rikendera ovakurundu na imba mba remana. Ombongo yOvakriste, ka i tjiukirwa kokuraisa ouwa uriri, nungwari i tjiukirwa kokuraisasana orusuvero wina. (Joh. 13:34, 35) Nu orusuvero ndo ru tu hinga kutja tu vatere ovakurundu na imba mbe nouremane okukara pozombongarero zombongo nokupita motjiungura tjokuzuvarisa ombuze ombwa. Tu kaenda komurungu okuvepa ombatero ndjo nandarire kutja owo kave yenene okuungura ovingi motjiungura tja Jehova mena roungundipare mbu ve nawo. (Mat. 13:23) Michael, ngu kara mokatemba, eye tjiri u nondangi kombatero ndje muna okuza keṱunḓu re na kovakambure mbe ri motjimbumba tje tjomazuvarisiro. Eye u tja “Mena rombatero avehe ndji ve ndji pa, ami mbi yenena okukara pozombongarero ozengi zombongo nokupita motjiungura tjokuzuvarisa. Ami tjinene mba suvera otjiungura tjokuzuvarisa momivanda.”

⁹ OzoBetel ozengi ze novakurundu novandu mba mana omasa novaṱukare. Ovanene vozombongo ve ripurira kovakambure ovaṱakame mba mokuvevatera kutja ve zuvarise okupitira mokutjanga otutuu poo okutonena ovandu ozongoze. “Tu nondangi tjinene kondjingonekero yokutjanga otutuu kovandu,” Bill wa tja nao, ngu nozombura 86 nu ngu tjanga kovandu mba tura komahi yokokure. Nancy, wozombura ape 90, wa tja: “Ami hi vara okutjanga otutuu otjoviṋa uriri. Ihi otjiungura tjokuzuvarisa wina. Ovandu ve sokutjiwa ouatjiri!” Ethel, ngwa kwatwa mombura ndji 1921, u tja: “Omihihamo orupa rwehupo randje. Omayuva tjiva mbi muna ouzeu wokurihwikika.” Nandarire kutja u kara mongaro ndjo, eye u nondjoroka motjiungura tjokutonena ovandu ozongoze nu u novandu ovawa mbu ma sokuyaruka ko rukwao. Barbara, wozombura 85, wa tja: “Mena roungundipare wandje womorutu, okupita motjiungura tjokuzuvarisa aruhe ka tjiṋa otjipupu. Posi yokutja okutonena ovandu ozongoze ku ndji vatera okuhungira ku na wo. Ndangi, Jehova!” Momieze omiṱiṱi uriri, otjimbumba tjovakurundu tja ungurire ozoiri 1 228 motjiungura tjokuzuvarisa, nu va tjanga otutuu 6 265, nu va tonena ovandu 2 000 ozongoze, nokuyandja oumbo 6 315! Tjiri, ozongondjero nḓa ze yorokisa omutima wa Jehova!​—Omiano 27:11.

10. Matu vatere vi ovakambure ovakwetu okumuna ouwa pozombongarero zombongo?

¹⁰ Rikendera varwe pozombongarero zombongo. Matu vanga kutja ovakambure ovakwetu ve mune ouwa mozombongarero. Indu tji matu ripurire ku wo eṱe matu yenene okutjita nao. Omomuano uṋe? Ngatu kondje okuvaza rukuru kutja atu ha kurungisa ovandu ombangarero a ya utu. Otjingaperi kutja pe yenena okutjitwa oviṋa mbi tu hi nokuundjira ko nu a vi tjiti kutja tu wombe kozombongarero zombongo. Nungwari tji twa iririra okuwomba eyuva arihe, ngatu ri ṱune tu suvera okuvaza pozombongarero moruveze. Ngatu zemburuke kutja ngwe tu ṋanga mba pozombongarero o Jehova nOmuna we. (Mat. 18:20) Nu tu sokuraisa ondengero ya peke ku wo!

11. Ongwaye imba mbe norupa pozombongarero zombongo tji mave sokuṱakamisa eronga ndi ri 1 Ovakorinte 14:40?

¹¹ Okurikendera ovakambure ovakwetu wina ku heya okuṱakamisa omambo nga: “Avihe ngavi tjitwe momuhingo omuwa na mouhirona.” (1 Kor. 14:40) Ovakambure mbu mave yandja omahungi  poo mbe notupa pozombongarero zombongo ve sokuṱakamisa eronga ndo nu ave ha kapitisa ozominute poo oruveze ndu va pewa komahungi wawo. Tji mave ṱakamisa otjiṋa hi, ku raisa kutja ko nokuripurira komundu ngu norupa ndu ma ru kongorereko erike uriri nungwari okombongo aihe. Orondu ovakambure ovakwetu tjiva ve sokukaenda omikato omire kombunda yombongarero. Varwe ve sokukapaha ozotaxi novitoore vyarwe. Nu tjiva va kupa poo va kupwa i ovandu mbe he ri ovakambure nu ma ve undjwa konganda.

12. Ongwaye ovanene vombongo tji ve hepa okupewa “orusuvero ndwa kapita oviṋa avihe”? (Lesa okaongo “ Ripurira ku imba mbe hongorera otjira tja Jehova.”)

¹² Ovakambure mbe ungura oukukutu mombongo na mbe kara motjiungura tjokuzuvarisa noupyuke owo tjiri ve sokupewa ombango ya peke. (Lesa 1 Ovatesalonika 5:12, 13.) Tjiri tu nondangi koviungura ovanene vozombongo mbi ve tu ungurira. Kunao, ve raisira ondengero nomaunguriro wa kumwe. Mena rokutja, “owo ve tjevera omiinyo vyeṋu nokuhinorusuvo, tjinga amave sokuyandja omerizirira woviungura vyawo ku Ndjambi.”​—Hebr. 13:7, 17.

13. Matu ri hongere ko tjike komuano Jesus mbwa tjindi ovandu?

¹³ Jesaja wa hunganeka nai ohunga na Jesus: “Eye ke nokuteya oruu ndwa kokovara, nu ke nokuzemisa emunine, ndi mari yaka ouṱumbe.” (Jes. 42:3) Orusuvero Jesus ndwa ri na ro kovandu rwa tjita kutja ma kare nonḓero na wo. Eye aa munu kutja ovandu mbo va ri tjimuna oruu ndwa kokovara poo emunine ndi ri ri pokuzema. Kunao, eye ee rikendere wo, wa ri notjari, nu wa ri nomuretima nawo. Nandarire ovanatje aave vanga  okukara puna ye. (Mar. 10:14) Otjingaperi, kutja ka tu nounongo mbwa ri na Jesus poo okuhonga omuano eye mbwa hongo! Posi yokutja matu yenene nu matu sokurikendera ovandu momaturiro wetu mu tu zuvarisa. Iho tji kamburira mo omuano mu matu hungire kuna wo, nokutja oruṋe tji matu hungire kuna wo, nu matu hungire orure ndu ṱa pi ku na wo.

14. Ongwaye tji matu sokuripurira komuano mbu matu hungire ku novandu?

¹⁴ Matu sokuhungira vi ku novandu? Ndino, ovandu omangete omengi va ‘kurungisiwa nu va ningisa ondjenda’ mena rozondjito ozombi nḓe kaendisiwa mozohoromende novahonge vozongamburiro. (Mat. 9:36) Nu tjiri, ovandu ovengi va kurunga momiinyo nu ka ve nomaundjiro. Tjiri ounanḓengu kweṱe okuveraisira otjari nokurikendera wo momuano mbu matu hungire nombosiro yeraka retu! Tjiri, ovandu ovengi ve yakura ombuze yetu nu ka mena rondjiviro ndji tu na yo poo omuano mbu tu ve zira nungwari wina i rira mena rongaro ndji matu raisa yokurikendera ku wo.

15. Omomiano viṋe mu matu ripurire kovandu ku matu zuvarisa?

¹⁵ Pe nomiano omingi mbi matu yenene okurikendera ovandu ku matu zuvarisa. Okupura omapuriro, omuano omuwa wokuhonga. Posi yokutja tu sokupura momuano omuwa nu wondengero. Omurumendu umwe omukandjira ngu zuvarisa momaturiro wovandu ovengi mu ve kara nohoṋi, wa muna kutja ke nokupura omapuriro ngu ma ye tjiti kutja ovandu ve ṱohoni. Inga omapuriro omundu ngu mape ya a ha yenene okuzira poo a ziri eziriro ndi he ri ro. Otjotjihorera, eye ka pura omapuriro tjimuna nga, ‘Motjiwa ena ra Mukuru?’ poo, ‘Motjiwa kutja Ouhona wa Mukuru otjikeṋa?’ Nungwari, eye u uta ehungi re mokutja, “Ami mbe ri honga okuza mOmbeibela kutja Mukuru u nena. Hi ku raisire kutja ena re otjikwaye?” Ka pe nomazeva kaaṋi ngu tu kongorera orondu ovandu va haṋika okuza kombazu nga kombazu. Nungwari, matu sokuripurira kovandu aruhe nokuraisa ondengero, tji tji kamburira mo okutjiwa ovandu nawa.

16, 17. Matu ripurire vi kovandu (a) ohunga noiri ndji matu zuvarisa ondjuwo nondjuwo? (b) oruveze ndu mokambura okuhungira ku nomundu?

¹⁶ Oruṋe tji matu sokuhungira ku novandu? Indu tji matu suvarisa ondjuwo nondjuwo, ngatu zemburuke kutja kozondjuwo ku matu i ka tu ṋangerwe nu ka tu raerere ovandu kutja matu ya pozoyao. Okutja tjiri ounahepero okuyenda kovandu oruveze ndu matu munu kutja nai mave puratene! (Mat. 7:12) Otjotjihorera, matu sokuripura oveni kutja hapo ovandu momaturiro wetu va suvera okurara orure mozonavyeka? Tji peri nao, ma rire nawa tji wa ngunda a mo yandja oumbo momivandu ngandu tji wa munu kutja ovandu nai va penduka mozoyao.

¹⁷ Matu sokukara orure ndu ṱa pi? Ovandu ovengi ka ve kara noruveze, okutja o nawa tji wa hungire ousupi uriri, tjinenenene tji we ya otjikando otjitenga. O nawa okumana ehungi roye mozominute ozonḓiṱi pendje nokukambura oruveze orure. (1 Kor. 9:20-23) Indu ovandu tji va munu kutja matu yandja ondengero koruveze rawo, mape ya ave vanga kutja tu kotoke rukwao. Tjiri, ovihape vyombepo ya Mukuru ma vi sokuriraisa ovini motjiungura tjokuzuvarisa. Indu tji twa tjiti nao, tu rira “ovaungure vapamwe vaNdjambi,” nu Jehova ma ungurisa eṱe okunanena ovandu kouatjiri.​—1 Kor. 3:6, 7, 9.

18. Indu tji matu rikendere varwe, ozondaya zeṋe nḓu matu munu

¹⁸ Kunao nga tu kondje pu twa yenene okurikendera varwe, meṱunḓu retu, mombongo na motjiungura tjokuzuvarisa. Indu tji twa tjiti nao, matu munu ozondaya ozengi nai na moruyaveze. Epsalme 41:1, 2 ri tja: “Ovaṋingandu imba mbe rikendera omusyona nomuhepe; Muhona me ve vatere tji ve ri moumba. . . . me ve ṋingaparisa kombanda yehi.”