TJI movanga okutjiwa kutja oiri ongapi, u tjita vi? Mutu u tara koiri pokuwoko koye poo ndji wa twirika mondjuwo yoye nu? Nu omukweṋu tje ku pura kutja oiri ongapi mo mu raere momuano uṋe? Pe nomiano omingi vyokuraera oiri. Omiano viṋe mbyo?

Ok, indjo tu tje oiri oimwe nozominute 30 momahatenya. Mo ziri ousupi uriri kutja o 1:30. Okuisira komuano mbu mu hungira neraka ndi mwa iririra koṋa ku mu kara, mape ya otja oiri o 13:30. Nu imbo omuano mbu ṱaṱera koiri indji ndji nozoiri 24 zeyuva. Nu momahi tjiva ovandu ve yenena okutja oiri “ohinga yombari,” pu mape hee kutja ku nozominute 30 okutona ombari.

Otjomundu ngu lesa Ombeibela, mape ya oripura kutja hapo imba ovandu moruveze rOmbeibela oiri aave i hungire vi. Oyo kaa i hungirwa momuano umwe uriri. Omatjangwa wOmbeibela wOtjiheberi ye tamuna “omuhuka omunene,” “omutenya,” “omutenya omunene” (poo omapeta), “nongurova.” (Gen. 8:11; 19:27; 43:16; Deut. 28:29; 1 Ozomb. 18:26) Nungwari povikando tjiva, oiri i hungirwa otja tji iri.

Moruveze rwOmbeibela, ovandu tjinene aave ungurisa omutjevere. Nu tjinenenene ouṱuku. Omaserewondo Jesus ngunda e hi ya kwatwa, Ovaisrael aave haṋa ouṱuku mozoiri zozondi ndatu. (Eps. 63:6) Ovapangure 7:19 ri tamuna oiri ‘yomokati kouṱuku.’ Momayuva wa Jesus, Ovajuda va uta okuungurira kongaro yOvagrike nOvaroma nu ave utu okuhaṋa ouṱuku mozoiri zozondi ine.

Nu Omaevangeli ye tamuna ozoiri nḓo povikando nao. Otjotjihorera, ya ri “menyunguhuka” indu Jesus tja kayenda kombanda yomeva okuyenda kokayaha mu mwa ri ovahongewa ve. (Mat. 14:25) Motjisasanekero, Jesus wa tja: “Andakuzu omuini wondjuwo iya tjiwa kutja erunga mari ya ruṋe ouṱuku, eye, tjiri, itja kara katumba na ha tarere indi erunga amari teya ondjuwo ye.”​—Mat. 24:43.

Jesus aa hee re kozondi azehe ine zozoiri nḓo indu tja raera ovahongewa ve kutja: “Otji mamu sokukara katumba, tjinga amu hi nakutjiwa kutja omuini wondjuwo me ya ruṋe, ngahino ongurova poo omokati kouṱuku poo omenyunguhuka poo omuhuka omunene.” (Mar. 13:35) Ozoiri ozondenga zozoiri nḓo, “ongurova,” okutja okuza komahitiro yeuva nga pomuvyu wongurova nao. Ozoiri ozetjavari, i rira “mokati kouṱuku”, ya ri okuza pomuvyu nga ouṱuku tji mau tauka. Oiri oitjatatu, i rira “enyunguhuka,” poo “pomavandarero wozohunguriva,” okuza mokati kouṱuku nga pondatu yotjiṱukuhuka. Nu mangara ya ri oiri ndjo indu ohunguriva tji ya kokora mouṱuku imbo Jesus ma ka kamburwa. (Mar. 14:72.) Orupa orutjaine rouṱuku, i rira “omuhuka omunene”, okuza kondatu yenyunguhuka nga eyuva tji mari piti.

Okutja tjiri, nandarire kutja ovandu voruveze rOmbeibela ka va ri nozoiri eṱe ndu tu na zo ndino, owo va ri nomuano mbwa ve tjiwa nokuraera oiri yongurova nomakaendero weyuva.