1, 2. (a) Ovandu ovanamasa ve tjinda vi ovandu nu Jehova u tjinda vi ovandu? (b) Morupa ndwi matu ka tara ku ye?

OVANDU ovanamasa na imba ovahonapare ve “honaparera” ovandu, nandarire noṋiṋikizire. (Mat. 20:25; Omuzuv. 8:9) Tjiri pe nombangu onene na Jehova! Nandarire kutja eye Omunamasaehe, eye u ripurira kovandu ovahahomonena. Eye u notjari nu u rikendera varwe. Eye u ripurira komuano mbu tu fula nu wina u twara ombango ya peke kovihepwa vyetu. ‘Mokuzemburuka kutja oweṱe oruuma,’ eye ka roro okutuningira okutjita otjiṋa tji tu hi nokuyenena okutjita.​—Eps. 103:13, 14.

² Ombeibela i novihorera ovingi vyomuano Jehova me ripurira kovakarere ve. Indjo tu tare ku vitatu nai. Otjitenga, omuano Mukuru ma vatera omuzandona Samuel okutwara ombuze yombanguriro kOmupriste Omunene Eli; otjitjavari, omuano Jehova ma raisa omuretima ku Moses indu tja kondjisa okuyepa otjiungura tja pewa tjokukahongorera Ovaisrael; nu otjitjatatu, omuano Jehova me ripurira kOvaisrael indu tje ve hongorera okupita moEngipte. Otja tji matu tara kovihorera mbi, nga tu yandje ombango kokutja ma vi tu hongo  ye ohunga na Jehova nokutja matu ri hongere kotjike.

3. Otjikwaye tji tja tjitwa komuzandona Samuel ouṱuku umwe, nu ihi matji eta epuriro riṋe? (Tara kotjiperendero pomautiro worupa ndwi.)

³ Samuel wa uta ‘okukarera Muhona’ pOndanda yOmaturiro ngunda ee ri okanatje okazandu uriri. (1 Sam. 3:1) Ouṱuku umwe Samuel ngunda aa suva, pa tjitwa otjiṋa tjimwe tji tji hi na aa tji tjitwa aruhe. * (Lesa 1 Samuel 3:2-10.) Eye wa zuva eraka nda ri mu isana kena re. Mokunangarasi eraka rOmupristeri Omunene Eli, Samuel wa tupuka ku ye na tja: “Owami ngwi. Ove we ndji isana.” Eli we mu raera kutja eye ke mu isanene. Otjiṋa hi tja tjitwa povikando vyarwe vivari nao, nu Eli otja uta okumuna kutja nangwari o Mukuru ngu ma isana Samuel. Okutja wa raera omuzandona kutja nga itavere vi, nu Samuel wa tjita otja tja raerwa. Nu ongwaye otjikando otjitenga Jehova tje hi na we ri raisa rumwe uriri ku Samuel okupitira momuengeli we? Ombeibela kai raisa kutja ongwaye, posi yokutja omakaendero wotjitjitwa hi ye raisa kutja ya ri ounanḓengu ku Jehova okuripurira komuano Samuel mu ma yenene okuyakura poo okutjinda otjiṋa hi. Omomuano uṋe?

4, 5. (a) Samuel wa raisa ongaro iṋe kotjiungura tja perwe i Mukuru, nu oviṋa vya kayenda vi omuhukomunene mbo? (b) Ehungi ndi mari tu hongo tjike ohunga na Jehova?

⁴ Lesa 1 Samuel 3:11-18. Omatwako wa Jehova aa ye rakiza ovanatje okuyandja ondengero kovandu ovanene, nu tjinenenene mba zikwa mounane. (Eks. 22:28; Lev. 19:32) Mo munu kutja Samuel wa ira mbo omuhukomunene ku Eli okukemuraera ombuze ya Mukuru yombanguriro? Kako! Mouatjiri ehungi ndi ri tu raere kutja Samuel “wa tira okutjivisa Eli otjirimunikise hi.” Nungwari, Mukuru wa raisa ongahukiro ku Eli kutja ma isana Samuel. Mena ra nao, Eli wa ṱokuraera Samuel kutja nga hungire. “O horeke otjiṋa ngamwa atjihe Eye tje ku raere,” Eli wa tja nao. Samuel we mu raera oviṋa avihe nondengero “otje mu raera oviṋa avihe.”

⁵ Ombuze Samuel ndja hungira kai temisire Eli. Oyo ya hitasana ku na indji ndja etwa i “Omuprofete umwe” wa Mukuru ngwa hungira komupristeri omunene rukuru. (1 Sam. 2:27-36) Ehungi ra Samuel na Eli ma ri tu raisire omuano Jehova me ripurira kovandu nounongo we.

6. Matu ri hongere ko tjike komuano Mukuru ma vatera Samuel?

⁶ Oove omundu omutanda? Tji pe ri nao, ehungi ohunga na Samuel ma ri raisa kutja Jehova u tjiwa oviṋa ove mu u yata nomuano mbu fula. Ngahino rumwe u ṱohoṋi poo i rira ouzeu kove okuzuvarisa kovandu ovanene poo okukuramena ongamburiro yoye mokati komitanda omikweṋu. Arikana tjiwa kutja Jehova u vanga okukuvatera. Okutja kumba ku ye okuza komutima woye. (Eps. 62:8) Ri zemburuka novihorera vyOmbeibela vyovandu mba ri omitanda tjimuna tja Samuel. Nu hungira pu nOvakriste ovakweṋu​—ovaṱiṱi poo ovanene​—mbu va tuurunga omarorero ove mu uri nai. Nu owo mave kuraere omuano Jehova me ve vatera, nandarire momuano owo mu ve hi na aave undjire ko.

7, 8. Jehova wa raisa vi kutja ee ripurire ku Moses momuano wa peke?

⁷ Moses tja ri nozombura 80, Jehova we mu pa otjiungura eye tjaa keyakeya mo. Moses aa sokukakutura Ovaisrael koukarere mo Engipte. (Eks. 3:10) Otja ngwa kara omurise wozonyanda mo Midie oure wozombura 40, eye wa uruma tja muna kutja wa pewa otjiungura tji tja sana ngo. “Owami aṋi okuyenda ku Farao, nokutja me kakutura Ovaisrael nokuvepitisa moEngipte?” eye wa tja nao. Mukuru wa kwizikira Moses nomambo  nga: “Me kara puna ove.” (Eks. 3:11, 12) Eye wina wa weza a tja: Ovanane va Israel “mave puratene kove.” Nandarire kutja wa kwizikirwa oviṋa mbyo, Moses wa zira a tja: “Nu hapo Ovaisrael tji ve hi . . . nokuhinokupuratena?” (Eks. 3:18; 4:1) Mouatjiri, Moses aa i momuhunga warwe mbu he ri imbwi owa Mukuru! Nungwari Jehova wa kara nomuretima. Nu wina wa ryama komurungu. Wa yandja omasa ku Moses okutjita ovihimise, tji tja tjita kutja ma rire omundu omutenga okuza kombutiro okutjita ovihimise.​—Eks. 4:2-9, 21.

⁸ Moses ngunda aa paha ozombitirapo, mokukondja okuraisa kutja u kokoma nu ka muhungire omuwa. Nungwari Mukuru wa tja: “Ami me kekuvatera okuhungira, ne ku hongo mbi mo sokuhungira.” Hapo Moses wa ṱokuyakura otjiungura hi? Kako, eye wa ningira Mukuru nomerisusuparisiro kutja ma hinde omundu warwe. Nu imbo Jehova opa pindikira. Nungwari ke na pa kakatera komazenge we. Moruveze rwa nao, mokuripurira komuano Moses maa fula, Mukuru wa zika Aron otjomuhungirirepo wa Moses.—Eks. 4:10-16.

9. Omuretima wa Jehova nomuano mbwe ripura wa vatera vi Moses motjiungura tje?

⁹ Ehungi ndi ma ri tu hongo tjike ohunga na Jehova? Otja ngu uri Omunamasaehe, Mukuru atja yenena okurokohera mu Moses nu e mu raere kutja ma tjite otja pa hee tjimanga. Posi yokutja, Jehova wa raisa omuretima notjari, nu wa tjita ozongondjero mokukwizikira omukarere we omurisusuparise ngo. Hapo omuano Mukuru me ripurira ku Moses mbwi wa ungura? Tjinene uriri! Moses wa ka rira omunane omuwa wa peke nu ngwe ripurire kovandu noupore tjimuna Jehova tje ripurira ku ye wina.​—Num. 12:3.

10. Tji matu horere komuano wa Jehova wokuripurira ku varwe tu muna ouwa waye?

¹⁰ Matu hongwa ye mba: Ove omundu ngwa kupa, u novanatje, poo oove omunene wombongo? Tji pe ri nao, okutja oove omundu ngu hongorera varwe. Okutja tjiri ma rire ounanḓengu tjinene kove okuhorera ku Jehova mokuripurira ku varwe notjari, nokukara nomuretima tji mo ungura na imba mbe ri kehi yondjeverero  yoye! (Kol. 3:19-21; 1 Petr. 5:1-3) Tji wa kara nonḓero yokuhorera ku Jehova na Moses Omunene, ngu ri Jesus Kristus, mo rire ombatero kovandu ovengi mbe ri ongondoroka na ove. (Mat. 11:28, 29) Nu wina mo rire otjihorera otjiwa ku varwe.​—Hebr. 13:7.

11, 12. Jehova wa tjita vi kutja Ovaisrael ve mune kutja ve ri mondjeverero, indu tje ve pitisa moEngipte?

¹¹ Indu Ovaisrael tji va pita mo Engipte mombura ndji 1513 K.O.Z., owo mape ya vari ovandu vokombanda yomangete yetatu. Otja mu mwa ri ozondekurona ozetjatatu poo ozetjaine, mwa ri nounatje novakurundu nu nandarire ovaṱukare novaremane omuvari mokati kotjimbumba hi. Okutja okuhongorera ovandu mba okupita mo Engipte aa ku hepa Omunane ngu ma sokurikendera kovandu tjiri. Jehova, okupitira mu Moses, wa raisa kutja eye ongu ri ye. Mena ra nao, Ovaisrael aave munu kutja ve ri mondjeverero ombwa indu tjaa ve isa omaturiro wawo ayerike ngaa ve tjiwa nawa.​—Eps. 78:52, 53.

¹² Jehova wa vatera vi ovandu ve okutjiwa kutja tjiri ve ri mondjeverero ombwa? Otjiṋa tjimwe tja tjita, eye we ve pitisa moEngipte a “ve ripangaṋa nawa novirwise.” (Eks. 13:18) Omwano mbu va ri a va rongerisiwa mbo we ve raisira oukahu kutja Mukuru wawo ongu ri kohonga yoviṋa mbi avihe. Nu wina, Jehova wa raisa kutja u ri mokati kawo mokuvehongorera, “mutenya Eye we ve hongorera notjikamba, . . . nondjerera yomuriro” ouṱuku. (Eps. 78:14) Okutja Jehova aa tja: “A mu tira. Ami mbi ri pu na eṋe okumuhongorera nokumutjevera.” Nu tjiri owo aave hepa okurizemburuka nomambo ngo tjamwa oruveze ndu ma ru ya!

13, 14. (a) Jehova wa raisa vi kutja we ripurira kOvairael pOmurongawotuu? (b) Jehova wa raisa vi omasa we kombanda yOvaengipte?

¹³ Lesa Eksodus 14:19-22. Ripura kutja u ri mbo, a wa paterwa pokati kotjimbumba tja Farao tjovita nOmuronga wOtuu. Nu tjimanga Mukuru wa hitira mbo. Otjikamba otjinene tja kakurama kombunda yeṋu, okukapata Ovaengipte nokukevetwa monḓorera. Nungwari ozondanda zeṋu ngunda aze ri mondjerera ohimise! Okuzambo o munu Moses tji ma roporora eke re kombanda yomuronga, okuzambo ombepo onamasa ai paturura omuronga pokati. Okuzambo amu utu okukaenda mouhirona, ove omuini neṱunḓu roye, novinamuinyo vyeṋu okukonda omuronga pehi pu novandu varwe. Nu tjimanga o munu otjiṋa tjarwe otjihimise. Ehi pu pa ri omuronga kakutja etarazu uriri, nungwari ra kukuta nu ra kaha oparukaze nu ma ri tjiti kutja i rire oupupu ku eṋe okukayenda ku ro. Nu mena ra nao, nandarire imba oviṱeṱu novaṱukare va kondo oupupu nawa munda imbo warwe womuronga.

¹⁴ Lesa Eksodus 14:23, 26-30. Ngunda amu ri mbo, Farao omuritongamise nu eyova arire tja rauka, okukonda poruveze orukukutu eṋe pu mwa kapitira ee nomazenge omanene. Rukwao, Moses a roporora eke re kombanda yomuronga. Otjikando hi, omikuma aviyevari vyomuronga mbya ri avya kurama osemba arire tji vye ri tata pehi. Omuronga au ri tono kumwe tjimuna ekumba rozongazona ozohimise. Farao notjimbumba tje ave yandere mbo!​—Eks. 15:8-10.

15. Ehungi ndi ma ri ku hongo ye ohunga na Jehova?

¹⁵ Twa yenene okumuna mehungi ndi kutja Jehova tjiri o Mukuru wouhirona—otjikaṋena tji tji tu vatera okumuna kutja tu ri mondjeverero. (1 Kor. 14:33) Jehova wina wa raisa kutja eye omurise worusuvero ngu u ripurira kovandu ve momiano omingi. Eye u ve tjinda nu u ve tjevera kovanavita na wo. Tjiri imbwi ouatjiri mbu mau sokutuyanḓiparisa otja mbu matu yendere omaandero wouye mbwi!​—Omiano 1:33.

16. Matu munu ouwa waye mokuripurira komuano Mukuru ma yama Ovaisrael?

¹⁶ Ndino wina, Jehova u rikendera kovandu ve  otjotjimbumba​—okutja o moviṋa oviyapuke na movihepwa vyetu wina. Nu ma kayenda komurungu okutjita nao mondatumisire ondirise ndji i ri pokuya. (Omavan. 7:9, 10) Nu wina, kai na tja kutja oove omuṱiṱi poo omukurundu, kutja oove omuveruke poo omuremane, ovandu va Mukuru ka maa ve kara nemuma poo okutira ngamwa otjiṋa moruveze rondatumisire ondirise. * Nu owo mave vanḓipara tjiri! Nu mave zemburuka omambo wa Jesus Kristus nga: “Kareye museka mu yere oviuru vyeṋu, orondu onguturiro yeṋu tjinga aya tumbuka.” (Luk. 21:28) Owo mave vanḓipara nandarire tji mave wirwa i Gog​—oviwaṋa mbye ri kuta kumwe nu mbi mavi kara nomasa kombanda ya inga nga ri na Farao oruveze orukuru. (Esek. 38:2, 14-16) Nu hapo ongwaye ovandu va Mukuru tji mave vanḓipara oruveze ndo? Owo ve tjiwa kutja Jehova ka runduruka. Eye ma raisa rukwao kutja Omuyame ngu tjevera nokuripurira kovandu ve.​—Jes. 26:3, 20.

17. (a) Matu munu ouwa waye momahungi wOmbeibela womuano Mukuru me ripurira kovandu ve? (b) Morupa ndu maru kongorereko matu ka tara ku ye?

¹⁷ Ovihorera mbi twa tara ko morupa ndwi i tjiva uriri mokati kovingi tjinene vyomuano Jehova me ripurira kovandu ve, nokuyandja omuhunga nokuveyama. Otja tji mo ripurire oukoto komahungi ngo, wina yandja ombango kovikaṋena vya Jehova vyarwe nandarire oviṱiṱi mbi mo munu momahungi ngo. Tji wa tjiti nao, mo utu okumuna ovikaṋena vya Mukuru oukoto mourizemburuka na momutima woye, nu orusuvero rwoye ku Mukuru ma ru kuru nu mo kara nongamburiro mu ye. Morupa ndu maru kongorereko matu ka tara komiano mu matu yenene okuhorera ku Jehova mokuripurira ku varwe. Nu matu ka yandja ombango keṱunḓu, mombongo yOvakriste, na motjiungura tjokuzuvarisa.