1. Ongwaye Ovahongonone va Jehova tji ve ri ovandu ovaṋingandu? (Tara kotjiperendero pomautiro worupa ndwi.)

OVAHONGONONE VA JEHOVA tjiri ovandu mbe nondjoroka. Pozombongarero zawo, na pomaworonganeno, poo pomeero wawo wa pamwe u muna ondjoroka momahungi wawo omawa wohange. Hapo nu ongwaye tji ve nondjoroka nao? Epu enene orondi rokutja owo ve tjiwa, nu ve karera nokuhorera ku Jehova, “Mukuru omuwa.” (1 Tim. 1:11; Eps. 16:11) Eye tjinga e ri omburo youṋingandu nondjoroka, Mukuru u vanga kutja tu rire ovaṋingandu, nu tjiri wetu pa omapu omengi ngu tu sokukarera nenyando.​—Deut. 12:7; Omuzuv. 3:12, 13.

2, 3. (a) Ouṋingandu otjikeṋa? (b) Ongwaye tje he ri oupupu okukara nouṋingandu?

² Hapo nu ove tjike? U nondjoroka? Mo yenene okutjita kutja u kare nouṋingandu? Ouṋingandu matu yenene okuukahurura kutja “ongarero ombwa yaaruhe, okutja okukowa mu imbi mbi u na vyo nondjoroka ndji i za komutima tjiri, nokukara nonḓero ndji i za ku Mukuru kutja i karerere nao.” Ombeibela i raisa kutja ouṋingandu watjiri u munika mongaro yomundu ngwa serwa ondaya i Jehova.  Nungwari, kaupupu okukara nouṋingandu mouye wa nambano mbwi. Omena ra tjike?

³ Oviṋa mbi tu etera ozombameno​—tjimuna onḓiro yomusuverwa woye poo omukweṋu tja kondwa kombongo poo omateero worukupo poo nandarire okupandjara oviungura​—oviṋa mbi tjita kutja atu ha kara nondjoroka. Ozondjakaha noviposa meṱunḓu wina oviṋa mbi tu pandjarisa ouṋingandu nondjoroka momiinyo. Nandarire tji matu kwekururwa i varwe poviungura poo poskole, nokutatumisiwa nokutuwa motjovakamburwa mena rongamburiro yetu, oviṋa mbi tjita kutja tu pandjare ondjoroka yetu. Nomitjise nozombameno momuinyo wina. Nungwari, Jesus Kristus, “Omunauhona omuwa nerike porwe,” tjiri u nondjoroka okuhuhumiṋa nokuyeta ouṋingandu kovandu. (1 Tim. 6:15; Mat. 11:28-30) Momazuvarisiro we wOkondundu, Jesus wa raisa ovikaṋena mbi mavi tu etere ouṋingandu nandarire kutja matu munu omauzeu mouye wa Satan mu tu ri mbwi.

4, 5. Matu munu vi ouṋingandu nokuuṱiza?

⁴ Jesus wa yandja ombango ya peke kotjiṋa otjinanḓengu hi: “Ovaṋingandu imba mbe ritjiwa kutja owo ovasyona mombepo, ouhona womayuru tjinga au ri owawo!” (Mat. 5:3) Tu raisa vi kutja oweṱe ovasyona mombepo poo tu vanga Mukuru? Eendu tji matu ri ovikurya vyombepo, okukara nohange moviṋa oviyapuke nokutwapo omerikotameneno wetu ku Jehova poruveze orutenga. Indu tji twa toora omikambo mbyo, matu ririre ko ovaṋingandu. Nu matu kurisa ongamburiro yetu momakwizikiro wa Mukuru ngu maye yenenisiwa. Nu matu vanḓiparisiwa i yonḓero “keyuva eṋingandu,” ndi twa kwizikirwa i Embo ra Mukuru.​—Tit. 2:13.

⁵ Okukara noupanga oupame kuna Jehova ootjiṋa otjinanḓengu tji matji tu etere ouṋingandu oukarerere. Omuapostele Paulus wa hingwa i ombepo ondjapuke indu tja tja: “Nyandeye mu Muhona [Jehova] aruhe! Meyarukire po rukwao: Nyandeye!” (Fil. 4:4) Kutja tu kare noupanga ouwa mbo, matu sokukara nondjiviro ya Mukuru. Embo ra Mukuru ri tja: “Omuṋingandu omundu ngu rira onongo, nomuṋingandu omundu ngu pewa ozondunge. Imba mbe wangata ounongo mave kara nomuinyo; nu mbe u ṱiza owo ovaṋingandu.”​—Omiano 3:13, 18.

6. Ouṋingandu wetu watjiri u rekareka ku ye?

⁶ Posi yokutja, kutja tu kare nouṋingandu ngaaruhe, ohepero kutja atu ha lese Embo ra Mukuru uriri, nungwari ngatu tjite imbi mbi matu lese mo. Jesus wa ṋuṋisa otjiṋa hi indu tja tja: “Nambano eṋe mbu mwa tjiwa otjiṋa hi, oweṋe ovaṋingandu tji mwe tji yenenisa!” (Joh. 13:17; lesa Jakobus 1:25.) Nu ihi ootjipaturure tjokutja u pahe Mukuru nokukara nouṋingandu waaruhe. Nu hapo matu kara vi nouṋingandu ngunda ku noviṋa mbi tjita kutja atu ha rire ovaṋingandu? Indjo tu tare kutja Jesus okuzambo wa tja vi mOmazuvarisiro we wOkondundu.

7. Imba mbe noruhoze mave yenene vi okukara nondjoroka?

⁷ “Ovaṋingandu imba mbe noruhoze, Ndjambi tjinga ame ve huhumiṋa!” (Mat. 5:4) Tjiva mape ya ave ripura kutja, ‘Hapo imba mbe noruhoze mape ya vi ave kara nouṋingandu?’ Jesus kaa hee ngamwa ngu noruhoze mena rotjiṋa kangamwa atjihe. Nandarire ovandu ovarunde ve kara noruhoze mena romauzeu ‘womayuva omasenina mu mu notuveze otuzeu nga.’ (2 Tim. 3:1) Nungwari, oruhoze  ndu ve kara na ro mena rokuvanga kutja oviṋa vi ka yende mozonḓero za wo karu ve eta popezu na Mukuru nu tjiri ka tji ve etere ouṋingandu. Jesus aa hungirire kovandu mbe vanga okukara popezu na Mukuru, mbe noruhoze mena rokutja ombango ya Mukuru kai tjitwa kombanda yehi. Owo ve yenena okumuna ouvi wawo nozongaro ozombi nḓe tjitwa, nḓa za kourunde mbu twa rumata. Jehova u muna ovandu vowatjiri mbe noruhoze mba, neye u ve huhumiṋa nu u ve sera ondaya noviṋa oviyapuke, nondjoroka nomuinyo.​—Lesa Esekiel 5:11; 9:4.

8. Kahurura kutja okurira ongozu ku eta vi ouṋingandu.

⁸ “Ovaṋingandu imba ozongozu, tjinga ama ve rumatisiwa indi ehi!” (Mat. 5:5) Okurira ongozu ku eta vi ouṋingandu? Ovandu ve runduruka indu tji va zu nokurihonga ouatjiri. Nu tjiva mape ya kutja rukuru va ri ovandu mbe nombeze, mba suvera oviposa nu vomazenge. Nu nai nambano nai owo ve rihwikika “omundu omupe,” nu ve raisa “otjari nounyaṋutima nomerisusuparisiro noupore nomuretima.” (Kol. 3:9-12) Mena ra nao, owo nai ve noupore nohange, norusuvero, nehupo eṋingandu. Na kombanda ya nao, Embo ra Mukuru ra kwizikira ovandu mbo kutja “ma ve rumatisiwa indi ehi.”​—Eps. 37:8-10, 29.

9. (a) Omomuano uṋe imba ozongozu mu mave “rumatisiwa indi ehi”? (b) Ongwaye imba mbe “nondjara nonyota yaimbi mbi ri ovisemba” tji ve ri ovaṋingandu?

⁹ Omomuano uṋe imba ozongozu, mu mave “rumatisiwa indi ehi”? Ovahongewa va Jesus mba twirisiwa nombepo ondjapuke mave rumata ehi indu tji mave ri honaparere okuza keyuru otjozombara novapristeri. (Omavan. 20:6) Ovandu omangete omengi tjinene mbe ha twirisirwe okuyenda keyuru, mave rumatisiwa ehi mokuyandjerwa okutura mu ro aruhe nga kongaaruhe mouhomonena, mohange na mouṋingandu. Nu imba ombe ri imba ovaṋingandu mena “rondjara nonyota yaimbi mbi ri ovisemba.” (Mat. 5:6) Ondjara nonyota yawo ku imbi mbi ri ovisemba mai kaisapewa mouye oupe. (2 Petr. 3:13) Nu Mukuru tja zu nokuisapo ourunde auhe ngamwa kombanda yehi, kape nouhasemba ngamwa mbu mau katjitwa nu ovandu mave kara nondjoroka nouṋingandu.​—Eps. 37:17.

10. Okukara notjari ku heya tjike?

¹⁰ “Ovaṋingandu imba mbe notjari, owo tjinga amave ṱirwa otjari.” (Mat. 5:7) Embo rOtjiheberi nda torokwa ku indi otjari ri nomaheero wokutja “okuṱunwa komutima tjiri, okukara nozongama; . . . okukara nondjenda.” Nu wina, etjitambo rOtjigrike ri raisa kutja okukara notjari ku kamburiramo okuritwa mozongaku zomundu warwe. Nungwari, otjari tji kamburira mo ovingi kombanda yokufula omuano mbo uriri. MOmbeibela, ri heya ondjenda ndji mai yenene okuraisiwa movitjitwa vyotjari.

11. Matu rihongo tjike ohunga nokukara notjari kotjihorera tjOmusamaria?

¹¹ Lesa Lukas 10:30-37. Omasasanekero wa Jesus wOmusamaria ye raisa oukahu kutja okukara notjari ku heya tjike. Mokuhingwa i yotjari nondjenda onene okuza komutima tjiri, Omusamaria wa toora omukambo omuwa okuyama omundu ngwa ri mouzeu. Tja za nokuhungira omasasanekero ngo, Jesus wa tja: “Twende, nu ove wina katjite nao.” Okutja nao eṱe wina matu sokuripura oveni kutja: ‘Hapo ami mbi tjita nao? Mbi tjita tjimuna Omusamaria omunatjari? Me yenene okutoora omikambo nu e raisa otjari ku imba mbe ri mouzeu? Otjotjihorera, me yenene vi okuyandja ombatero kOmukriste omukurundu, komuhepundu, nomitanda rumwe mbi hi nomaṱunḓu wawo mouatjiri? Mape tjiti vi tjimba toora omukambo ‘wokuyanḓiparisa imba vomitima omitarazu’?’​—1 Tes. 5:14; Jak. 1:27.

12. Okukara notjari ku eta vi ouṋingandu?

 ¹² Nambano, okukara notjari ku eta vi ouṋingandu? Tji matu raisa otjari tu muna ondjoroka nouṋingandu mbu u za mokuyandja. Kombanda ya nao, tu tjiwa kutja matu yorokisa Jehova. (Oviung. 20:35; lesa Ovaheberi 13:16.) Ku ingwi ngu ripurira ku varwe, Ombara David wa tja: “Muhona me ve yama nu me ve hupisa, me ve ṋingaparisa kombanda yehi.” (Eps. 41:1, 2) Tji matu raisa otjari ku varwe Jehova wina me tu raisire otjari, otjo tji matji tjiti kutja tu rire ovaṋingandu ngaaruhe.​—Jak. 2:13.

13, 14. Omutima omukohoke nouṋingandu vi ungura vi kumwe?

¹³ “Ovaṋingandu imba mbe nomitima omikohoke,” Jesus wa tja nao, “owo tjinga amave munu Ndjambi!” (Mat. 5:8) Okuṱiza omitima vyetu oukohoke, nga tu rire ovakohoke moukoto nokukurisa ovikaṋena oviwa momitima vyetu. Tu hepa okukara nomeripura omakohoke kutja atu ha zunḓaka komurungu wa Jehova.​—Lesa 2 Ovakorinte 4:2; 1 Tim. 1:5.

¹⁴ Imba mbe nomitima omikohoke mave yenene okukara nongurameno ombwa komurungu wa Jehova, eye ngwa tja: “Ovaṋingandu imba mbe koha ozombanda zawo.” (Omavan. 22:14) Maku hee tjike “okukoha ozombanda zawo”? Ovakriste ovatwirisiwa va “koha ozombanda zawo,” pu ma pe hee kutja owo ovakohoke komurungu wa Jehova nu mave pewa otutu tu tu hi na indu maa tu koka nu mave yorokere ouṋingandu waaruhe moviungura vyawo meyuru. Imba votjimbumba otjinene mbe nomaundjiro wokukahupa kombanda yehi wina mave yenene okukara nomitima omikohoke otjomapanga wa Mukuru. Owo nandarire nai ve ‘koha ozombanda zawo nokuzeyepaerisa mombinḓu yondjona.’​—Omavan. 7:9, 13, 14.

15, 16. Omomuano uṋe imba mbe nomitima omikohoke mu mave “munu Mukuru”?

¹⁵ Nu hapo imba vomitima omikohoke ve “muna vi Mukuru” ndovazu Mukuru wa tja “kape nomundu ngu me Ndji munu na kara nomuinyo”? (Eks. 33:20) Embo rOtjigrike ku indi “okumuna” ri he ya “okumuna mourizemburuka, okupaha, nokutjiwa.” Imba mbe muna Mukuru ‘neho romutima wawo’ owo mba tjiri mbe mu tjiwa nawa, nokuraisa ondangi kovikaṋena vye oviwa. (Ef. 1:18) Jesus aa raisa ovikaṋena vya Mukuru okuura, okutja o pa zokutja: “Auhe ngwa munu Ami wa munu Tate.”​—Joh. 14:7-9.

¹⁶ Kombanda yokutjiwa Mukuru, ovakarere ve ovaṱakame mave yenene “okumuna Mukuru” mokuripurira komuano eye mbwe ungura puna wo. (Job 42:5) Owo wina ve tara ‘neho romutima wawo’ kozondaya Mukuru nḓe yandja ku imba mbe zera okukara nomitima omikohoke  nokumukarera nouṱakame. Nu wina otjiperi tjiri kutja ovatwirisiwa mba pendurwa mave munu Jehova omuini nomeho wawo indu tji va i keyuru.​—1 Joh. 3:2.

17. Ohange i tu vatera vi okurira ovaṋingandu?

¹⁷ Jesus okuzambo wa tja: “Ovaṋingandu imba mbe hangana.” (Mat. 5:9) Imba mbe toora omukambo wokutjita ohange ve nepu ewa rokukarera nouṋingandu. Omuhongewa Jakobus wa tjanga kutja: “Otjihape tjousemba tji za mozondwi nḓa, ovanahange nḓu ve kuna mohange.” (Jak. 3:18) Ndovazu tu nonyengo nomukwetu, kutja omombongo poo meṱunḓu, ngatu kumbe ku Mukuru kutja me tu vatere okutjita ohange. Okutja, ombepo ya Jehova ondjapuke, omeritjindiro omawa, nouṋingandu mavi utu okuhonapara. Jesus wa ṋuṋisa ounanḓengu wokutoora omukambo okutjita ohange indu tja tja: “Tji we yokupunguhira Ndjambi otjiyandjewa tjoye kotjipunguhiro no zemburuka kutja omukweṋu u nombiri na ove, indino tji esa otjiyandjewa tjoye mbo komurungu wotjipunguhiro, nu u hakahane okukahangana nomukweṋu, tjazumba u kotoke u yekupunguhira Ndjambi otjiyandjewa tjoye.”​—Mat. 5:23, 24.

18, 19. Ongwaye Ovakriste tji mave yenene okukara nenyando nandarire kutja mave tatumisiwa?

¹⁸ “Ovaṋingandu eṋe, ovandu tji mave mu yamburura nave mu tatumisa nave mu hungirire ovizeze ngamwa avihe pu pe he ri po, tjinga amu ri ovendjikongorere.” Jesus aa hee tjike mba? Eye wa kayenda komurungu a tja: “Nyandeye nu mu yoroke, ondjambi yeṋu tjinga ai ri onene meyuru. Ovaprofete mba ri po komurungu weṋu wina otjinga ava tatumisirwe nao.” (Mat. 5:11, 12) Indu ovaapostele tji va za nokutonwa nokurakiziwa okuisa okuzuvarisa, “va kayenda amave nyanda.” Nu otjiperi kutja kaa ve tjaterwa i ozongora nḓu va tonwa. Posi yokutja, aa ve yoroka “orondu Ndjambi tjinga e ve vara kutja owo va pwa pokutatumisiwa mena ra Jesus.”​—Oviung. 5:41.

¹⁹ Moruveze rwetu, ovandu va Jehova ve kara nondjoroka tji mave munu omauzeu nomarorero mena rena ra Jesus. (Lesa Jakobus 1:2-4.) Tjimuna ovaapostele, eṱe katu vanga okutatumisiwa poo okumuna omauzeu. Nungwari tji twa panḓere pu Jehova ngunda atu ri momauzeu, eye me tu vatere okutuurunga nomasa aehe. Otjotjihorera, mu Auguste 1944, ouhonapare wa twara Henryk Dornik nomuangu we kokamba yovakamburwa. Nungwari, ovapirukire mbo va tja: “Tjiri ouzeu okuṋiṋikiza ovandu mba okutjita otjiṋa tji matji pirukire ongamburiro yawo. Nandarire ondatumisire ndji mave munu i ve perako ondjoroka.” Mbuti Dornik wa tja: “Nandarire kutja hee vanga okutatumisiwa nao, ondatumisire mu mbari nouṱakame wandje ku Jehova kwe ndji yorokisa tjiri. . . . Okukumba nokuhaisa kwe ndji eta popezu na Jehova, nu tjiri Jehova wa raisa kutja eye Omuyame ku me yenene okuṱaṱera.”

20. Ongwaye tji tu ri ovaṋingandu okukarera “Mukuru omuwa”?

²⁰ Tjiri matu yenene okumeṱameṱa mena rokuyakurwa i “Mukuru omuwa,” matu rire ovaṋingandu nandarire kutja twa tatumisiwa mena rongamburiro yetu, kutja matu pirukirwa i omaṱunḓu wetu, kutja ouvere, poo nandarire oukurundu. (1 Tim. 1:11) Nu tjiri oweṱe ovaṋingandu mena romakwizikiro omawa wa Mukuru wetu, “ngu ha wovisa.” (Tit. 1:2) Tjiri omakwizikiro wa Jehova tji maye yenenisiwa maye rire omahimangongo tjinene nga tji matu ka zemba omauzeu ngu tu muna nai. Mo Paradisa ndji mai ya, ozondaya Jehova nḓu me ke tu sera ma ze rire ozohimise kombanda ya indu tji tu ripura poo tji tu nangarasi. Nu ondjoroka ndji matu ka muna ka maa isasanekwa notjiṋa ngamwa atjihe. Ii, tjiri matu “vyarere ohange onene.”​—Eps. 37:11.