MOUPARANGA wouye auhe, ovanene vombongo ve nondjoroka moviungura vyawo mbi ve ungura mokati kovandu va Mukuru. Tjiri owo ondaya kweṱe atuhe! Nungwari oruveze orusupi ndwa kapita, pa tjitwa omarundurukiro. Ovanene vombongo mba rira ovakurundu va ningirwa okuyandja omerizirira wawo ngo kovanene vombongo omitanda. Omomuano uṋe?

Omarundurukiro omape ya yetwa mena rokutja ovatarere mbe varura ozombongo na imba mbe yandja omahongero motjira tja Jehova, kave kara nomasa okuungura oviungura vyawo mbyo tji va vaza ozombura 70. Wina, ovanene vombongo mbe nozombura 80 ve yandja omerizirira yawo tjiva kovanene wombongo omitanda, tjimuna okurira omuworonganise wOkomiti yOrutavi romberoo poo omuworonganise worutu rwovanene vombongo. Ovanene vombongo ovakurundu mba va raisa ongaro iṋe komarundurukiro nga? Owo va raisa ouṱakame wawo ku Jehova notjira tje!

“Ami tjiri mba itavera okuura nongurameno ndji,” Ken wa tja nao, ngwa karera otjomuworonganise wOkomiti yOrutavi rwomberoo oure wozombura ape 49. “Ami mba kumba ku Jehova, ame raisa ounanḓengu wovakambure omitanda okukarera otjovaworonganise, nu tjiri okuza mbo omuhuka omunene mbo oo ku zuva ombuze  ombwa ndjo.” Ongaro ya Ken i raisiwa i yovakurundu ovengi ovaṱakame mouye auhe ndino. Mena rokutja owo va suvera okuvatera ovakambure ovakwao, ka ya ri oupupu okuisa omerizirira wawo ngo.

“Otjiṋa hi tja hara okundjiwisa momuinyo kaṱiṱi,” Esperandio wa tja nao, eye ngwa kara otjomuworonganisa worutu rovanene vombongo yawo. Nungwari kombunda wa kayakura na tja: “Ami tjiri ee hepa oruveze okuripurira kouveruke wandje.” Otja ovengi vetu tji ve tjita, Esperandio wa kayenda komurungu okukarera Jehova nouṱakame nokuvatera ombongo ye.

Hapo tjike novatarere mbe varura ozombongo mba ungura otjiungura ho orure nu nai mba rundurukira koviungura vyarwe? Allan, ngwa karere otjomutarere ngwa varura ozombongo oure wozombura 38, wa tja: “Tji mba zuva ongurameno ndja toorwa ndjo, mba uruma.” Nungwari, eye wa muna ounanḓengu wokuhonga ovakambure omitanda oviungura, nu wa kayenda komurungu okukarera Jehova nouṱakame.

Russell, ngwa karera otjomutarere ngwa varura ozombongo nokuyandja omahongero oure wozombura 40, wa tja eye nomukazendu we pomautiro va wire momuinyo. “Eṱe twa suverere otjiungura tjetu tjinene nu aa tu munu kutja ngunda tu nomasa okukaenda komurungu na tjo.” Russell nomukazendu we ndino ve ungurisa ondjiviro yawo ndji va toora ndjo okuvatera ovazuvarise varwe mombongo yawo.

Nandarire kutja ove omuini ko ya rora okukara mongaro tjimuna yovakwetu mba tamunwa mba, ehungi ndi ri ri mu 2 Samuel ma ri ku vatere kutja u zuve kutja ongwaye tji ve raisa ozongaro nḓo.

Ripura noruveze indu Absalom, omuatje wOmbara David tje mu pirukira. David wa taura okuza mo Jerusalem okuyenda ko Mahanaim, koutjiro wOnḓonḓu Jordan. David ngunda ee ri ngo, eye na imba mbu va ri pamwe ka va ri novihepwa vyawo vyeyuva arihe. Mo tjiwa kutja pakayenda ye?

Ovarumendu vetatu ve ve etera ovirare, novikurya pekepeke, novitjuma mbyaa ve hepa. Barsilai wa ri umwe wovarumendu mba. (2 Sam. 17:27-29) Omapirukiriro wa Absalom tji ya yanda, David wa ri kamwaha okuyaruka ko Jerusalem, nu Barsilai we mu ṱika ngandu po Jordan. David we mu ningira kutja meye ko Jerusalem. Ombara ya kwizika kutja me ke mu pa ovikurya, nandarire kutja Barsilai “wa ri omutumbe tjinene” nu kaa hepa okupewa ovikurya. (2 Sam. 19:31-33) David mape ya aa tjaterwa i yovikaṋena vya Barsilai nondunge ngamwa aihe ndjee mu pe. Nu tjiri ihi a tja tji rira otjiṋa otjiwa okukaungura mondanda yondjuwo yombara!

Mena rokutja wari omurisusuparise nokumuna oviṋa omuano mbu vi ri, Barsilai wa hungira oukahu kutja eye wa ri nozombura 80. Okuzambo wa tja: “Kape tji notjiṋa mu mbi nonyuṋe.” Hapo nu aa hee tjike? Barsilai mape ya wa toora ounongo oure momuinyo we mbwa hupa. Nu aa yenene okuyandja ondunge ombwa kovandu, tjimuna “ovakururume” kombunda mba yandja  ondunge kOmbara Rehabeam. (1 Ozomb. 12:6, 7; Eps. 92:12-14; Omiano 16:31) Okutja Barsilai tjaa tja ke notjiṋa me nonyuṋe, eye aa hee ongaro ombi uriri noungundipare omundu mbwe kara na wo moukurundu. Eye wa yakura kutja okurira omukurundu kwa tjita kutja a ha sora okutjatisa otjiṋa tji ma ri na tji ma zu. (Omuzuv. 12:4, 5) Monao Barsilai omuini wa ningira David okutwaerera Kimham omurumendu omutanda ko Jerusalem, mape ya ngwa ri omuatje wa Barsilai.​—2 Sam. 19:35-40.

Omarundurukiro nga tjitwa mena roukurundu nga hungirwa pomautiro, ye hitasana noumune mbwa raisiwa i Barsilai. Nungwari moruveze rwetu, omarundurukiro nga ka ye tjitirwe mena rokutja omundu wa rire omukurundu poo wa mana omasa uriri, tjimuna tji pa ri na Barsilai, nungwari pe noviṋa vyarwe ovinahepero ku ku yandjwa ombango. Pa ri ohepero yokuyandja ombango koviṋa mbi mavi vatere ovanene vombongo ovaṱakame mouye auhe.

Ovakriste ovakurundu overisusuparise mba mave yenene okumuna kutja otjira tja Jehova ma tji zikamisirwa omekuriro wa tjo woruyaveze, ndovazu omerizirira ngu va kara na wo orure maye yandjwa komitanda. Povikando ovingi, ovarumendu ovakambure ovanene motjiwondo o mbe honga imba omitanda, tjimuna Barsilai tja honga omuatje we omuzandu nomuapostele Paulus tja honga Timoteus. (1 Kor. 4:17; Fil. 2:20-22) Ovarumendu ovakambure omitanda mba tjiri ve raisa kutja owo “oviyandjewa kovandu,” nu mave yenene okuvatera “kokutja ve tunge orutu rwa Kristus.”​—Ef. 4:8-12; sasaneka na Numeri 11:16, 17, 29.

Ovandu ovengi mozombongo za Mukuru mouye auhe mbu va yandja omerizirira ngu va ri nayo, nai ve yenena okuyorokera otjiungura otjipe tji ve na tjo poo nandarire okuneneparisa otjiungura tja wo ku Jehova.

“Omerizirira ngu mbi nawo nai ye ndji pa oruveze okuzuvarisa kovarumendu mba kupa ovaṱena kwetu nu mbe he ri ovakambure,” Marco ngwa ri omutarere ngu varura ozombongo oure wozombura 19, wa tja nao.

“Ozondando zetu nai ozokuvatera imba mba yaruka ombunda mongamburiro nokuhonga ovandu ovengi Ombeibela,” Geraldo, ngwa karera otjomutarere ngu varura ozombongo ozombura 28, wa tja nao. Eye nomukazendu we va tja, nai ve novahongwa 15 vOmbeibela nu otjingi tja imba mba yarukire ombunda mongamburiro nai ve ya kozombongarero zombongo nawa.

Allan, ngwa tamunwa rukuru, wa tja: “Nai tu noruveze oruingi okuyandja ombango kotjiungura tjokuzuvarisa. Twa suvera okuzuvarisa poutemba, na potuveze tozongetjefa, nokuzuvarisa kovararanganda vetu, nu vevari ve ya kEtuwo romerikotameneno.”

Pe nomuano warwe wapeke mu mo yenene okuvatera, indu tji u ri omurumendu omukambure ngwa munu otjiungura otjipe mokati kovandu va Mukuru, nu tji u ri omuṱakame nu wina u nombango. Mo yenene okuyandja oruvara kotjiungura tja Jehova mokuvatera ovarumendu omitanda nondjiviro yoye mombongo. Russell, ngwa tamunwa rukuru, wa tja: “Jehova u rongerisa nokuungurisa omitanda, momwano omuwa. Ovaṱena nomarumbi wetu ve muna ouwa komahongero wawo omawa nomuano wawo wokurisa ozonḓu za Jehova!”​—Tara kokaongo nga “ Vatera ovarumendu omitanda okuungura mbi mave yenene okuura.”

Tji wa pewa omerizirira warwe omape, kara noumune ouwa. Ove wa raisa otjihorera otjiwa tji tja ṱuna ovandu ovengi, nu ove wina mo yenene okutjita nao nomerizirira yoye omape. Owo ve ku suvera nu wina mave kayenda komurungu okukusuvera.

Otjiṋa otjinanḓengu, ove wa yorokisa Jehova omutima, otjiṋa tje hi nokuzemba. Eye “ke nokuzemba otjiungura tjeṋu, norusuvero ndu mwa raisa ku ye mokukarera ovakriste ovakweṋu, nu ngamba mu ve karera.” (Hebr. 6:10) Etjangwa  ndo ri yanḓiparisa avehe kutja omakwizikiro ya Mukuru ye kamburira mozongondjero zetu nḓu twa tjita. Tjiri oove omuhuze ku Jehova nu eye ka maa zembi oviungura mbi we mu ungurira nomuano mbu kayenda komurungu okumuyorokisa!

Nu tjike ove tji u ha perwe omerizirira omape? Oviṋa ku twa hungirire mbi wina mavi yenene okuṱuna kove. Omomuano uṋe?

Indu nai tji ungura puna imba ovanene motjiwondo nu mbaa pewa otjiungura tjarwe, mo munu mouwa mounongo nozondunge zawo nḓu va toora motjiungura tja wo tji va ri na tjo ho. Paha ondunge yawo. Pura oumune wawo. Nu tara kutja eye ma ṱakamisa vi omerizirira we omape.

Ndovazu oove omukurundu nu ngwa pewa omerizirira omape poo oove omukambure ngu mo yenene okumuna ouwa movakarere ovakurundu mba, tjiwa kutja Jehova u vara ouṱakame wa imba mbe mu karera oruveze orure nu ngamba mbe kaenda komurungu okumukarera.