ORUPA RWOMAKONḒONONENO 36
Armagedon ombuze ombwa!
“Nozombepo nḓa otji za woronganisira inḓa ozombara . . . ku Armagedon.”—OMAVAN. 16:16.
EIMBURIRO 150 Paheye Muhona kondjamo yeṋu
OMAPU KU MATU KATARA *
1-2. (a) Ongwaye Armagedon tje ri ombuze ombwa kovandu? (b) Matu katara komapuriro yeṋe morupa ndwi?
HAPO ove wa rora okuzuva ovandu amave tja “Armagedon” ovita vyomiku ominawanga poo oviwonga? Posi yokutja, Ombeibela i hungira oviṋa oviwa ohunga na Armagedon, nu imbyo vi tupa ondjoroka! (Omavan. 1:3) Ovita vya Armagedon ka vi nokunyona ovandu nungwari mavi eta ondjamo! Omomuano uṋe?
2 Ombeibela i raisa kutja ovita vya Armagedon mavi yama ovandu mokuyeta omaandero kouhonapare wovandu. Ovita mbyo mavi nyono ovandu ovarunde nokuyama ovasemba. Nu wina ovyo mavi yama ovandu mokutjevera ehi komanyoneno. (Omavan. 11:18) Kutja tu zuve nawa omapu nga, ngatu tare komapuriro yane nga: Armagedon ovikwaye? Ovitjitwa viṋe mbi mavi tjitwa komurungu wa Armagedon? Omomuano uṋe mu matu kara puna imba mbu mave yamwa mu Armagedon? Matu yenene vi okurira ovaṱakame otja tji matu yendere omaandero wouye?
ARMAGEDON OVIKWAYE?
3. (a) Embo ndi “Armagedon” ri heya tjike? (b) Otja kOmavandururiro 16:14, 16, ongwaye tji matu yenene okutja Armagedon karuveze kaaṋi kombanda yehi?
3 Lesa Omavandururiro 16:14, 16. Embo ndi “Armagedon” ri munika potjikando tjimwe uriri mOmatjangwa, nu raza kembo rOtjiheberi ndi heya “Ondundu ya Megido.” (Omavan. 16:16) Megido ya ri otjihuro moIsrael otjikuru. (Jos. 17:11) Posi yokutja, Armagedon karuveze kaaṋi kombanda yehi. Oro ri heya ongaro ndji mai tjiti kutja ‘ozombara azehe zouye’ ze pirukire Jehova. (Omavan. 16:14) Posi yokutja morupa ndwi embo ndi “Armagedon” ma ri hee ovita mbi mavi kongorere ko indu ozombara zouye tji za worongana pamwe. Hapo matu tjiwa vi kutja Armagedon ri heya oruveze romasasanekero? Tjitenga, ondundu ya Megido kaiko. Otjitjavari, oruveze ongondoroka na Megido oruṱiṱi tjinene okutjinda ‘ozombara azehe zouye’ novarwe wovita novirwise vyawo. Otjitjatatu, otja tji matu kamuna morupa ndwi, ovita vya Armagedon mavi utu indu ‘ozombara’ zouye tji maze rwisa ovakarere va Mukuru, mbe ri mouye auhe.
4. Ongwaye Jehova tja sasaneka ovita ovinene vyomaandero wouye kuna Megido?
4 Ongwaye Jehova tja sasaneka ovita ovinene vyomaandero wouye kuna Megido? Moruveze rwOmbeibela, ovita ovingi aavi tjitirwa poMegido na pOmukutu wa Jesreel. Povikando tjiva, Jehova aa vatere ovakarere ve okutaara ovita mbyo. Otjotjihorera, “poruronḓu rwa Megido” Mukuru wa vetera omupangure wOvaisrael Barak okurwisa otjimbumba tjovarwe wovita tjaa tji hungorerwa po i Sisera. Barak nomuprofete Debora va tja ndangi ku Jehova kokutaara otjirwa ho. Owo aave imbura kutja, “Ozonyose iyaze rwire okuza keyuru . . . na Sisera. Okaruronḓu Kison ke ve twarere.”—Ovapang. 5:19-21.
5. Omomuano uṋe ovita vya Armagedon mu mavi panguka kovita vya Barak?
5 Barak na Debora va mana eimburiro rawo ndo nomambo nga: “Ovanavita na Ove avehe, Muhona, ngave ṱe nao! Nungwari imba mbe Ku suvera ngave kare otja eyuva tji ri ri pokupita nomasa waro aehe!” (Ovapang. 5:31) Movita vya Armagedon, ovanavita na Mukuru mave ṱu, nu imba mba suvera Mukuru mave yamwa. Posi yokutja pe nombangu pokati kovita vivari mbi. Movita vya Armagedon, ovakarere va Mukuru kave nokurwa. Owo nandarire kave nokukara novirwise! Nu ‘omasa wawo maye zu mokuporimana na mokuriyameka’ ku Jehova notjimbumba tje tjovita vyomeyuru.—Jes. 30:15; Omavan. 19:11-15.
6. Omomuano uṋe Mukuru mu ma rwisa ovanavita na ye movita vya Armagedon?
6 Omomuano uṋe Mukuru mu ma rwisa ovanavita na ye movita vya Armagedon? Eye mape ya a ungurisa omiano pekepeke. Otjotjihorera mape ya a ungurisa omanyinganyingiro wehi, ozombawe zombura, norutjeno rombura. (Job 38:22, 23; Esek. 38:19-22) Poo a tjiti kutja ovanavita na ye ve yarukasane. (2 Ekuruh. 20:17, 22, 23) Nu mape ya a ungurisa ovaengeli ve okuzepa ovandu ovarunde. (Jes. 37:36) Kainatja kutja Mukuru ma ungurisa ye, eye mataara. Ovanavita na ye avehe mave nyonwa. Nu ovasemba avehe mave yamwa.—Omiano 3:25, 26.
OVITJITWA VIṊE MBI MAVI TJITWA KOMURUNGU WA ARMAGEDON?
7-8. (a) Otja 1 Ovatesalonika 5:1-6, ondjivisiro yaye yapeke ovahonapare vouye ndji mave tjiti? (b) Ongwaye ondjivisiro ndjo tji mai rire otjizeze otjinaumba?
7 Ngunda “Eyuva ra Muhona” ari hiye ya ovandu mave tja, “ku nohange norusuvo!” (Lesa 1 Ovatesalonika 5:1-6. EEP) MOvatesalonika ovatenga 5:2, “Eyuva ra Muhona” ri heya ‘ondatumisire ondirise.’ (Omavan. 7:14) Hapo matu tjiwa vi kutja oruṋe ondatumisire ndjo tji mai utu? Ombeibela i tu raera kutja mape kara omatjivisiro wapeke. Omatjivisiro ngo maye rire otjiraisiro tjokutja ondatumisire ondirise ya tumbuka.
8 Omatjivisiro ngo maye yenenisa omahunganekero wokutja, “ku nohange norusuvo.” Hapo ongwaye ovahonapere vouye tji mave tja nao? Ovanane vozongamburiro mave kara norupa? Ngahino. Matu tjiwa kutja ovahonapare vouye tji va utu okutjivisa kutja “ku nohange norusuvo,” ondjivisiro ndji mai rire otjizeze okuza kozondemone. Otjizeze hi matji rire otjinaumba mena rokutja matji tjiti kutja ovandu ve mune kutja ve ri mondjeverero. Posi yokutja oruveze ndo maru rire omautiro wondatumisire ondirise mekuruhungi rovandu. Otjiperi kutja, “omanyoneno maye ve werereke tjimuna ozongama zomukazendu otjingundi.” Hapo ovakarere va Jehova ovaṱakame mave tjitwa vi? Owo mape ya ave uruma indu iho tji tja tjitwa, posi yokutja mave kara ave rirongere.
9. Mukuru ma nyono vi ouye wa Satan?
9 Jehova ke nokunyona ouye auhe wa Satan, tjimuna tja tjita moruveze rwa Noa. Nungwari me u nyono motupa tuvari. Rutenga, eye ma nyono Babilon Otjinene, tji tji ri ozongamburiro azehe zoposyo. Nu okuzambo movita vya Armagedon eye ma ka nyona ouye wa Satan auhe, mbu mau kamburire mo ozohoromende, orupa rwovita nozongetjefa. Ngatu tare kovitjitwa vivari ovinanḓengu mbyo.
10. Otja kOmavandururiro 17:1, 6 no 18:24, ongwaye Jehova tji ma nyono Babilon Otjinene?
10 “Omukorondu ngwa ingana ma verwa.” (Lesa Omavandururiro 17:1, 6; 18:24.) Babilon Otjinene tja eta ondjambu onene kena ra Mukuru. Otjo tja honga ovizeze ohunga na Mukuru. Otja omukazendu omukorondu, ozongamburiro zoposyo ka ze ṱakamisa oupanga wawo kuna Jehova nu ve yandja oruvara kouhonapare wovandu. Ozongamburiro zoposyo ze ṋiṋikiza ouṋepo wawo nokukambura ovimariva vyawo. Nu za tirahi ombinḓu yovandu ovengi, nandarire ovakarere va Mukuru. (Omavan. 19:2) Hapo Jehova ma nyono vi Babilon Otjinene?
11. ‘Otjipuka otjiserandu’ tji ku ramena po ye nu Mukuru me tji ungurisa vi okunyona Babilon Otjinene?
11 Jehova ma nyono “omukorondu ngwa ingana” okupitira ‘motjipuka otjiserandu . . . tjozonya omurongo.’ Otjipuka ho tji kuramena po Omahi Omakutasane. Ozonya omurungo ze kuramena po ozohoromende nḓe yandja oruvara kotjira ho. Moruveze ndwa pu ku Mukuru, ozohoromende nḓo maze rwisa Babilon Otjinene. Ozo ‘maze mu yeka oviṋa avihe mbye na vyo naze mu esa mutundu,’ mokutoora outumbe we nokuraisa ourunde we kovandu avehe. (Omavan. 17:3, 16) Omanyoneno ngo maye ya tjimanga nu maye munika tjimuna ya tjitwa “meyuva rimwe.” Imba mbe kongorera ozongamburiro zoposyo mave urumisiwa i yotjiṋa ho, mena rokutja eye ee rihivi omuini kutja, “Owami ngwi mba haama otja ombara oserekaze! Himuhepundu, nu himee kara ko noruhoze!”—Omavan. 18:7, 8.
12. Jehova ke nokuyandjera kutja oviwaṋa vi tjite tjike nu omena ra ye?
12 Mukuru kamaa yandjere oviwaṋa okunyona ovakarere ve. Owo ve tjinda ena re nondjoroka, nu va kara nonḓuviro keronga re rokupita mu Babilon Otjinene. (Oviung. 15:16, 17; Omavan. 18:4) Nu wina va ungura oukukutu okuvatera varwe okupita mu ye. Kunao ovakarere va Jehova kave ‘nokukara norupa momberero yatjo.’ Nandarire kutja mave yamwa, owo mave hepa ongamburiro yomasa kutja ve tuurunge omarorero ngu maye kongorere ko.
Kainatja kutja ovakarera va Mukuru va tura pi, owo mave kara nongamburiro mu Ye indu ovanavita tji va utu okuverwisa (Lesa oparagrafa 13) *
13. (a) Gog ouṋe? (b) Otja ku Esekiel 38:2, 8, 9, ovikwaye mbi mavi tjiti kutja Gog ma rwise ovakarere va Mukuru?
13 Gog ma verwa. (Lesa Esekiel 38:2, 8, 9.) Kombunda yomawiro wozongamburiro zoposyo, mape kara ongamburiro imwe kombanda yehi uriri, nu ovakarere va Mukuru aveyerike ombu mave kara ko. Ihi tjiri matji pindikisa Satan tjinene. Eye ma raisa omazenge we ngo mokukora ovizeze okupitira ‘mozombepo ozohakohoke’ nḓu maze tjiti kutja otjimbumba tjoviwaṋa tji rwise ovakarere va Jehova. (Omavan. 16:13, 14) Otjimbumba tjoviwaṋa ho tji isanewa kutja, ‘Gog mehi ra Magog.’ Indu oviwaṋa tji mavi rwisa ovakarere va Jehova, ovita vya Armagedon otji mavi utu.—Omavan. 16:16.
14. Gog ma kamuna tjike?
14 Gog ma kara nongamburiro ‘momasa womundu,’ mbe ri otjimbumba tje tjovita. (2 Ekuruh. 32:8) Eṱe matu kara nongamburiro mu Jehova Mukuru wetu, nu okutjita nao maku munika tjimuna oweṱe omayova koviwaṋa. Ongwaye? Mena rokutja Babilon Otjinene wa ri nomasa, nungwari oomukuru we kave yenenene okumuyama ‘kotjipuka’ na inḓa ‘ozonya omurongo’! (Omavan. 17:16) Kunao oviwaṋa mavi nangarasi mavi tu nyono oupupu. Eye ma rwisa ovakarere va Jehova, tjimuna “otjivepo tji matji hingi okutapakaṋa ehi.” (Esek. 38:16) Posi yokutja oviwaṋa mbyo mavi kamuna kutja kavi nokuyenena okutaara. Tjimuna Farao pOmurongawotuu, Gog ma munu kutja ma rwisa Jehova.—Eks. 14:1-4; Esek. 38:3, 4, 18, 21-23.
15. Jesus ma katjita tjike movita vya Armagedon?
15 Kristus notjimbumba tje tjovita vyomeyuru mave vatere ovakarere va Mukuru mokunyona Gog novarwe ve vovita. (Omavan. 19:11, 14, 15) Hapo tjike nomunavita wa Jehova omunene Satan, ngwa kora ovizeze okutjita kutja oviwaṋa vi karwise ovakarere ve movita vya Armagedon? Jesus ma pandeke Satan nozondemone ze morutjiva rwokehi yehi, nu owo mave paterwa mo oure wozombura eyovi.—Omavan. 20:1-3.
HAPO MO YAMWA VI MOVITA VYA ARMAGEDON?
16. (a) Tu raisa vi kutja tu “tjiwa Ndjambi”? (b) Okutjiwa Jehova ma ku tu yama vi movita vya Armagedon?
16 Nandarire kutja twa kara orure mouatjiri poo oweṱe ovape, matu ‘sokutjiwa Ndjambi’ nokukara “nonḓuviro kOmbuze Ombwa ya Muhona wetu Jesus,” kutja tu yamwe movita vya Armagedon. (2 Tes. 1:7-9) Eṱe tu “tjiwa Ndjambi” indu tji matu tjiwa kutja ovikwaye mbya suvera, nokutja wa tonda tjike nokutjiwa omirari vye. Wina tu raisa kutja tu mu tjiwa indu tji matu mu suvere nokukara nonḓuviro kuye, nokumukarera nomutima auhe. (1 Joh. 2:3-5; 5:3) Indu tji matu raisa kutja tu tjiwa Mukuru, tu kara nondjingonekero ‘yokutjiukwa i Ndjambi’ nu ihi tji tjita kutja tu yamwe movita vya Armagedon! (1 Kor. 8:3) Omomuano uṋe? Mena rokutja ‘okutjiukwa i Ndjambi’ ku heya okuyakurwa i Mukuru.
17. Okukara nonḓuviro “kOmbuze Ombwa ya Muhona wetu Jesus” ku heya tjike?
17 ‘Ombuze Ombwa ya Muhona wetu Jesus,’ i kamburira mo ouatjiri auhe Jesus mbwaa hongo mbu ri mEmbo ra Mukuru. Tu kara nonḓuviro kombuze ombwa indu tji matu u ṱakamisa mehupo retu. Onḓuviro ndjo i kamburira mo okutwapo otjiungura tja Jehova poruveze orutenga mehupo retu, okuhupa otja komirari omisemba vya Mukuru, nokuzuvarisa ombuze yOuhona wa Mukuru. (Mat. 6:33; 24:14) Nu wina tu yandja oruvara kovaturisiwa va Kristus otja tji mave ungura oviungura vyawo ovinanḓengu.—Mat. 25:31-40.
18. Omomuano uṋe ovatwirisiwa va Kristus mu mave yandja ondjambi koruvara ndu va pewa?
18 Ovakarere va Mukuru ovatwirisiwa moruveze ropopezu mave yandja ondjambi ‘kozonḓu zarwe’ kombatero yawo aihe. (Joh. 10:16) Omomuano uṋe? Ngunda ovita vya Armagedon avi hiya uta, imba avehe 144 000 tjandje va twarewa keyuru morutu rombepo. Owo mave karira orupa rotjimbumba tjovita tjomeyuru tji matji nyono Gog, nokuyama “otjimbumba otjinene” tjovakarere va Jehova. (Omavan. 2:26, 27; 7:9, 10) Otjimbumba otjinene tjovandu tjiri matji kara nondjoroka kutja tja yandja oruvara kovakarere va Jehova ovatwirisiwa ngunda ave ri kombanda yehi!
MATU YENENE VI OKURIRA OVAṰAKAME OTJA TJI MATU YENDERE OMAANDERO WOUYE?
19-20. Matu yenene vi okurira ovaṱakame otja tji matu yendere omaandero wouye, nandarire kutja tu muna omauzeu?
19 Moruveze oruzeu romaandero wouye ndwi, ovakarere va Jehova ovengi ve muna omauzeu. Nandarire kutja peri nao matu yenene okutuurunga omauzeu ngo nondjoroka. (Jak. 1:2-4) Otjiṋa tjimwe tji matji yenene okutuvatera tjinene okupanḓera pokukumba. (Luk. 21:36) Katu sokukumba uriri, nungwari matu sokukonḓonona Embo ra Mukuru eyuva arihe nokuripurira ko oukouto koviṋa tjimuna omahunganekero woviṋa mbi mavi katjitwa moruyaveze ropopezu. (Eps. 77:12) Tji twa tjiti oviṋa avihe mbi, na tu kondjo pu matu yenene motjiungura tjokuzuvarisa, ongamburiro nomaundjiro wetu mavi kara nomasa!
20 Ripura uriri kutja mokara nondjoroka ndji ṱa pi indu Babilon Otjinene tji tja nyonwa, novita vya Armagedon tji vya kapita! Nu tjinenenene, ripura nondjoroka ndji mokara nayo indu ovandu avehi tji mave raisa ondengero kena ra Jehova na kouvara we wokuhonapara! (Esek. 38:23) Otjingaperi kutja Armagedon tjiri ombuze ombwa ku imba mbe tjiwa Mukuru, mbe nonḓuviro kOmuna we, na mbe panḓera po nga komaandero.—Mat. 24:13.
EIMBURIRO 143 Kareye pokuungura, kareye katumba nu kareye pokuundja
^ par. 5 Okuza kurukuru ovakarere va Jehova ve undja eyuva ra Armagedon. Morupa ndwi, matu katara kutja Armagedon ovikwaye, nu ovitjitwa viṋe mbi mavi tjitwa komurungu wa Armagedon, nokutja matu yenene vi okurira ovaṱakame otja tji matu yendere omaandero wouye.
^ par. 71 OMAKAHURURIRO WOVIPERENDERO: Indu ovitjitwa pekepeke tji mavi tjitwa ongondoroka na eṱe. Eṱe matu (1) kayenda komurungu okuzuvarisa ngunda tu nouyara wokutjita nao, (2) okukara nomakonḓononeno wetu, (3) nokukara nongamburiro mondjeverero ya Mukuru.
^ par. 85 OMAKAHURURIRO WOVIPERENDERO: Ovarumendu ovaporise mave kondjo okuhita mondjuwo yOvakriste, eṱundu ndi ma ri tjiwa kutja Jesus novaengeli ve mave munu imbi mbi mavi kayenda po.
