ORUPA RWOMAKONḒONONENO 38
“Indjeye ku Ami . . . nu Ami me mu suvisa”
“Indjeye ku Ami eṋe amuhe mbu mwa pungarisiwa i okutjinda omitwaro omizeu, nu Ami me mu suvisa.”—MAT. 11:28.
EIMBURIRO 17 “Ami me vanga”
OMAPU KU MATU KATARA *
1. Otja ku Mateus 11:28-30, omakwizikiro yeṋe Jesus nga tjita?
JESUS wa tjita omakwizikiro omawa kotjimbumba tjaa tji puratene ku ye. Eye wa tja: “Indjeye ku Ami . . . nu Ami me mu suvisa.” (Lesa Mateus 11:28-30.) Inga ka ya ri omakwizikiro nge hi nokuyenenisa. Otjotjihorera, ripura ohunga noviṋa Jesus mbya tjitira omukazendu ngwa verere omutjise omuzeu.
2. Ovikwaye Jesus mbya tjitira omukazendu ngwaa verere?
2 Omukazendu ngwi aa hepa ombatero ya tjimanga. Eye wa ya kozonganga ozengi, mena rokutja wa ri nomaundjiro wokutja maze mu verura. Eye wa kara nomutjise mbo oure wozombura 12 nu ka pa ri omundu ngwa yenene okumuvatera. Otja kOmatwako Jehova nga yandja ku Moses, eye wa ri omuhakohoke. (Lev. 15:25) Omukazendu ngwi wa zuva kutja Jesus aa yenene okuverura ovavere, kunao wa ya okukemupaha. Indu tje mu muna, eye wa ṱuna kotjikoro tjombanda ye, nu tjimanga wa verurwa komutjise we! Posi yokutja Jesus ke mu verukisire uriri, nungwari eye we mu tjinda nondengero norusuvero. Otjotjihorera, eye we mu raisira kutja we mu suvera nokumutenga indu tja tja “muatje wandje.” Omukazendu ngwi tjiri wa muna omahuhumiṋino!—Luk.8:43-48.
3. Matu kazira omapuriro yeṋe?
3 Omukazendu ngwi wa ya ku Jesus, nu wa tjita ozongondjero okuyenda ku ye. Ndino wina eṱe matu hepa okutjita ozongondjero ‘okuyenda’ ku Jesus. Moruveze ndwi, Jesus kaverura imba mba vera nu ‘mbe yenda’ ku ye. Posi yokutja ngamba eye u tu ṋanga kutja, “Indjeye ku Ami . . . nu Ami me mu suvisa.” Morupa ndwi matu kazira omapuriro yetano nga: ‘Matu i’ vi ku Jesus? Hapo Jesus a hee tjike indu tja tja: “Tooreye omutenge wandje”? Matu rihongere ko tjike ku Jesus? Ongwaye oviungura Jesus mbye tupa tji vi tupa omasa omape? Nu matu kayenda vi komurungu okumuna omasa kehi yomutenge wa Jesus?
“INDJEYE KU AMI”
4-5. Omiano viṋe tjiva mu matu yenene ‘okuyenda’ ku Jesus?
4 Omuano umwe mu matu yenene ‘okuyenda’ ku Jesus omokurihonga ovingi ohunga noviṋa mbyaa hungire nokutjita. (Luk. 1:1-4) Omerizirira wetu oveni okukonḓonona kutja Ombeibela i tjavi ohunga na Jesus. Wina tu ‘yenda’ ku Jesus indu tji matu toora omukambo wokupapitisiwa nokurira ovahongewa va Kristus.
5 Omuano warwe mu matu yenene ‘okuyenda’ ku Jesus omokuyenda kovanene vombongo tji matu hepa ombatero. Jesus u ungurisa “oviyandjewa kovandu” mbi, okuṱakamisa orupanda rwe. (Ef. 4:7, 8, 11; Joh. 21:16; 1 Petr. 5:1-3) Matu sokutjita ozongondjero okupaha ombatero. Eṱe katu sokuundjira ko kutja ovanene vombongo mave sokutjiwa kutja matu ripura ye nokutja ovikwaye mbi matu hepa. Omurumendu omukambure wena Julian wa tja: “Ami ee sokuisa otjiungura tjandje tjokuvatera poBetel mena rouvere, nu epanga randje re ndji pa ondunge yokupura ovanene vombongo okundjivarura kutja ve ndji yanḓiparise. Rutenga, ami hee munu kutja ohepero. Posi yokutja kombunda mba ningira ombatero yawo, nu omavaruriro ngo tjiri ya ri otjiyandjewa otjiwa tji mba muna.” Ovanene vombongo ovaṱakame, tjimuna ovarumendu vevari mbo mba karyangera Julian, mave yenene okutuvatera okutjiwa ‘Ombepo ya Kristus,’ ndji ri okutjiwa nokuhorera komeripura nongaro ye. (1 Kor. 2:16; 1 Petr. 2:21) Indu tji mave tu vatere momuano mbo, iho otjiyandjewa otjiwa tji mave yenene okutupa.
“TOOREYE OMUTENGE WANDJE”
6. Jesus a hee tjike indu tja tja: “Tooreye omutenge wandje”?
6 Indu Jesus tja tja: “Tooreye omutenge wandje,” eye mape ya a hee kutja, “Yakureye omananeno wandje.” Eye wina mape ya a hee kutja, “Kareye kehi yomutenge puna ami, nu atuyevari tu ungurire Jehova.” Omaheero ayeevari nga maye hee kutja matu sokuungura.
7. Otja ku Mateus 28:18-20, twa pewa otjiungura tjiṋe, nu tu nongamburiro ya ye?
7 Tu yakura omaṋangero wa Jesus indu tji matu riyandja ku Jehova na tu papitisiwa. Jesus u ṋanga ovandu avehe okuya ku ye, nu kamaa nakaura auhe ngu ma vanga okukarera Mukuru tjiri. (Joh. 6:37, 38) Ovakongorere va Kristus avehe va pewa ondjingonekero yokukara norupa motjiungura Jehova tja ningirire Jesus okutjita. Tu nongamburiro kutja Jesus aruhe u ri mbo okutuvatera okuungura otjiungura ho.—Lesa Mateus 28:18-20.
“RIHONGERE KU AMI”
Yandja omasa ku varwe otja Jesus tja tjiti (Lesa oparagrafa 8-11) *
8-9. Ongwaye ovandu overisusuparise tjaave vanga okukara puna Jesus, nu omapuriro yeṋe ngu matu sokuripura oveni?
8 Ovandu overisusuparise aave vanga okukara puna Jesus. (Mat. 19:13, 14; Luk. 7:37, 38) Omena ra ye? Tara kombangu ndja ri pokati ka Jesus nOvafarisei. Ovanane vozongamburiro mbo kaave raisa orusuvero nu va ri overitongamise. (Mat. 12:9-14) Jesus wari norusuvero nu wa ri omurisusuparise. Ovafarisei aave vanga okutjiukwa nokuvarwa pondondo yokombanda. Jesus wa tja katjiṋa otjiwa okukara nao. Kunao eye wa honga ovahongewa ve okurira overisusuparise nokukarera varwe. (Mat. 23:2, 6-11) Ovafarisei aave ungurisa ouvara wawo kombanda yovandu mena rokutja ovandu aave tira kutja mave ve tjiti otjipo tji ve hina okupuratena ku wo. (Joh. 9:13, 22) Jesus aa yandja omasa omape ku varwe mokuveraisira orusuvero nokuhungira omambo omawa.
9 Hapo ove u rihongera kotjihorera tja Jesus? Ripura omuini omapuriro nga: ‘Hapo mbi tjiukwa otjomundu ngu mbi ha pindike tjimanga nu omurisusuparise? Mbi ungura oviungura mbi raisa kutja owami omukarere? Hapo mbi raisa ouwa ku varwe?’
10. Jesus aa tjiti kutja pe kare ongaro iṋe mokati kovandu mbaave ungura puna ye?
10 Jesus aa tjiti kutja pe kare ombepo ombwa nu yohange mokati kovandu mbaave ungura puna ye, nu wa ri nonḓero yokuvehonga. (Luk. 10:1, 19-21) Eye aa tunduuza ovahongewa ve okupura omapuriro, nu aa vanga okutjiwa oumune wawo. (Mat. 16:13-16) Tjimuna omiti motjikunino tji vi hapa nawa indu tji mavi pewa ombango, ovahongewa va Jesus ve kurira ko. Owo aave rihongere koviṋa Jesus mbyaa hongo nu oviungura vyawo vya ririra ko oviwa.
Rira omundu omuwa nomupaturuke
Ungura nu kara noupatje
Risusuparisa nu ungura oukukutu *
11. Matu sokuripura omapuriro yeṋe?
11 Hapo ove u nouvara tjiva kombanda ya varwe? Tji pe ri nao, ripura omuini omapuriro nga: ‘Hapo mbi tjinda vi varwe poviungura poo ponganda? Mbi tjita kutja pe kare ohange? Hapo mbi tunduuza varwe okupura omapuriro? Nu mbi puratena koumune wawo?’ Katu sokukara tjimuna Ovafarisei. Owo aave pindike indu ovandu tji ve hi nokukambura moviṋa mbya ve hongo, nu aave raisa ongaro ombi ku imba mbe noumune mbwa panguka ku imbwi owawo.—Mar. 3:1-6; Joh. 9:29-34.
“MAMU MWINE OMIINYO VYEṊU ORUSUVO”
12-14. Ongwaye otjiungura Jesus tje tupa tji tji tupa orusuvo?
12 Ongwaye okuungura otjiungura Jesus tje tupa tje ri orusuvo kweṱe? Pe nomapu omengi, posi yokutja matu katara ku tjiva.
13 Eṱe tu novatarere ovasemba. Jehova, Omutarere wetu wOkombandambanda, eye ka muhona ngu ha raisa ondangi kovakarere ve poo ngu hi rikendere wo. Eye u nondangi koviungura mbi tu mu tjitira. (Hebr. 6:10) Nu u tupa omasa kutja tu yenenise omerizirira wetu. (2 Kor. 4:7; Gal. 6:5) Jesus, Ombara yetu, we tupa otjihorera otjiwa tjokutjinda varwe. (Joh. 13:15) Nu ovanene vombongo mbe tu tjevera ve kondja okuhorera ku Jesus, ngu ri “omurise omunene.” (Hebr. 13:20; 1 Petr. 5:2) Owo ve kondja pu mave yenene okuturaisira otjari, okututunduuza, nokuraisa ouvanḓe otja tji mave tu hongorere po nokututjevera.
14 Eṱe tu nomapanga omawa. Kape novandu mbe nomapanga worusuvero noviungura oviwa tjimuna mbi tu navyo. Ripura uriri, eṱe tu ungura ku novakambure ovakwetu mbe ritjinda nawa posi yokutja mbe ha munu kutja owo ovasemba pu varwe. Owo ve nondjiviro onyingi posi yokutja kave rihivi, nu ve vara varwe otja ovanene pu wo. Nu kave tu vara otja ovaungure va pamwe na wo uriri, nungwari wina oweṱe omapanga. Orusuvero rwawo oruingi tjinene nga tji ve yenena okuriyandjera okuṱira eṱe!
15. Matu sokukara noumune uṋe ohunga noviungura mbi tu tjita?
15 Eṱe tu noviungura ovisemba. Tu honga ovandu ouatjiri ohunga na Jehova nokutjiukisa ovizeze vyOmudiaboli. (Joh. 8:44) Satan u ṋiṋikiza ovandu novizeze mbi tjita kutja ovandu ve rihahize. Otjotjihorera, eye u vanga kutja tu kambure kutja Jehova ke nokutuisira omauvi wetu nokutja kape nomundu ngu metu suvere. Tjiri imbyo ovizeze ovivi tjinene, mbi tjita kutja ovandu ve we momuinyo! Indu tji ‘twe ya’ ku Kristus, omauvi wetu maye isirwa. Nu ouatjiri owo mbwi wokutja Jehova wetu suvera atuhe nomasa. (Rom. 8:32, 38, 39) Tjiri ondjoroka onene okuvatera ovandu okurihonga okuṱaṱera ku Jehova nokumuna omarundurukiro ngu mave tjiti mehupo rawo!
KAYENDE KOMURUNGU OKUMUNA ORUSUVO KEHI YOMUTENGE WA JESUS
16. Omutwaro Jesus mbwe tu ningira okutjinda wa panguka vi komitwaro vyarwe mbi tu sokutjinda?
16 Omutwaro Jesus mbwe tu ningira okutjinda wa panguka komitwaro vyarwe mbi tu sokutjinda. Otjotjihorera, kombunda yoviungura, ovandu ovengi ve urwa nu kave kara nondjoroka. Posi yokutja, indu tji twa ungurisa oruveze rwetu okukarera Jehova na Kristus, tu kara nondjoroka. Kombunda yoviungura eṱe mape ya tu urwa posi yokutja tu tjita ozongondjero okuyenda kombongarero yombongo ongurova ndjo. Nungwari, povikando ovingi tji twa zire kombongarero yombongo ndjo tu kara nohange momuinyo nomasa. Momuano otjingewo, tji matu tjiti ozongondjero okuzuvarisa nokukonḓonona Ombeibela yetu, matu kara nohange momuinyo nomasa omape!
17. Ongwaye tji tu sokuzuva nawa ongaro mu tu ri, nu matu sokukengeza ye?
17 Atuhe matu sokuyakura kutja omasa wetu yena poṋa pu ye yandera. Kunao matu sokuripura nawa ohunga noviṋa mbi matu vanga okutjita. Otjotjihorera, eṱe mape ya atu ungurisa omasa wetu mokupaha omauini. Tara ku imbi Jesus mbya hungira komuzandona omutumbe, ngwe mu pura na tja: “Hi tjite vi kutja mbi mune omuinyo waaruhe?” Omuzandona omutumbe ngwi aa ṱakamisa Omatwako. Eye mape ya wa ri omurumendu omuwa mena rokutja Evangeli ra Markus ri tja Jesus we ‘mu suverere.’ Jesus wa raera omuzandona ngwi, na tja: “Twende u karandise avihe mbi u na vyo . . . tjazumba kotoka nu u yekukongorera Ami.” Omurumendu ngwi aa vanga okukongorera Jesus. Posi yokutja eye kaa yenene okuisa ‘outumbe’ poo ovimariva vye. (Mar. 10:17-22) Mena ranao eye wa nakaura omutenge wa Jesus nu wa kayenda komurungu okurira omukarere ‘wovimariva.’ (Mat. 6:24) Ove otjo tjita vi?
18. Povikando tu sokutjita vi, nu omena ra ye?
18 Otja oruveze tji maru kayenda eṱe matu sokuripura kutja ovikwaye mbi ri ovitenga mehupo retu. Omena ra ye? Kutja tu ungurise omasa wetu nawa. Tara kotjihorera tjomurumendu wena Mark ngwa tja: “Oure wozombura ozengi, ee munu kutja mbi hupa ehupo ndi hi noviṋa ovingi. Mba ri omukandjira, posi yokutja aruhe ee ripura ohunga novimariva nokutjita ehupo randje ri rire ewa tjinene. Ehupo randje ra ri ezeu nu ee ripura kutja ongwaye. Okuzambo mba kamuna kutja ee yandja ombango tjinene kozonḓero zandje omwini, nu ee yandja oruveze nomasa nga sewa ko ku Jehova.” Mark wa rundurura omeripura we nehupo re, kokutja ma yenene okuungurira Jehova tjinene. Mark wa tja: “Povikando tjiva mbi rikenda ohunga novimariva, posi yokutja nombatero ya Jehova na Jesus, mbi yenena okuyandja ombango kokukarera Jehova.”
19. Ongwaye okukara noumune ouwa tje ri otjiṋa otjinanḓengu?
19 Kutja tu kayende komurungu okumuna omasa omape kehi yomutenge wa Jesus matu sokutjita oviṋa vitatu. Otjitenga, okukara noumune ouwa. Eṱe tu ungura otjiungura tja Jehova, kunao matji sokuungurwa momuano eye mbwe vanga. Oweṱe ovaungure nu Jehova ongu ri Omuhona wetu. (Luk. 17:10) Indu tji matu kondjo okuungura otjiungura tje momuano wetu oveni, eṱe matu tjiti kutja otjiungura ho tji rire otjizeu kweṱe. Nandarire ondwezu yomasa mape ya ai urwa nokurihihamisa oini indu tji mai kondjo aruhe okuyenda momuhunga wayo oini nokupirukira omutenge womuhona wayo. Posi yokutja tji twa ungura otjiungura tja Jehova otja kombango ye, eṱe matu yenene okuungura nokutuurunga omauzeu ngaatu munu kutja kamaatu yenene okutuurunga. Zemburuka kutja kape nomundu ngu ma yenene okutjaera ombango ye okuyenenisiwa!—Rom. 8:31; 1 Joh. 4:4.
20. Indu tji matu riwisa kehi yomutenge wa Jesus, matu sokukara nondando iṋe?
20 Otjitjavari, ungura nondando ombwa. Ondando yetu oyo ku yandja ohiviro ku Tate wetu worusuvero, Jehova. Meserewondo etenga ovandu mbaave ripurire ku wo oveni tjimanga va uta okuhinokukara nondjoroka nu va isa omutenge wa Jesus. (Joh. 6:25-27, 51, 60, 66; Fil. 3:18, 19) Nungwari imba mbe hina aave ripurire ku wo oveni nu mba suverere Mukuru novakwao va ri nondjoroka okutjinda omutenge mbo oure wehupo ra wo kombanda yehi, ave nomaundjiro wokukanana puna Kristus meyuru. Tjimuna wo, eṱe matu kara nondjoroka indu tji matu tjindi omutenge wa Jesus nondando ombwa.
21. Otja ku Mateus 6:31-33, tu nongamburiro yokutja Jehova ma tjiti tjike?
21 Otjitjatatu, kara nomaundjiro omasemba. Eṱe twa toorora ehupo romeriyandjerero nokuungura oukukutu. Jesus wetu rakiza kutja matu munu ondatumisire. Posi yokutja tu nongamburiro kutja Jehova metu pe omasa okutuurunga ouzeu ngamwa. Otja tji matu panḓere po aruhe, matu kara nomasa. (Jak. 1:2-4) Eṱe wina tu nongamburiro kutja Jehova me tupe imbi mbi matu hepa, Jesus metu hongorerepo, nu ovakambure ovakwetu mave tu tunduuza. (Lesa Mateus 6:31-33; Joh. 10:14; 1 Tes. 5:11) Eṱe tjiri tu noviṋa avihe mbi matu hepa okutuurunga omauzeu ngamwa!
22. Matu sokukara nondangi ku ye?
22 Omukazendu Jesus ngwa verura wa muna omasa omape meyuva ndo. Posi yokutja eye atja muna omasa omape nga aruhe indu tja rire omuhongewa wa Kristus omuṱakame. Ove mo munu kutja eye wa tjita vi? Ripura nozondaya nḓa tja muna tja rire omuhongewa wa Jesus. Eye atja ka honapara puna Jesus meyuru! Oviṋa avihe mbya tja isa kongotwe mena ra Kristus katja vi rira omungandjo. Kainatja kutja omaundjiro wetu owo ku ka hupa meyuru poo kombanda yehi, tjiri tu nondangi kutja twa yakura omaṋangero wa Jesus nga: “Indjeye ku Ami!”
EIMBURIRO 13 Kristus, otjihorera tjetu
^ par. 5 Jesus u tu ṋanga kutja tu ye ku ye. Ovikwaye mbi matu sokutjita okutja tu yakure omaṋangero we ngo? Orupa ndwi maru kazira epuriro ndo, nokutuzemburikisa omuano mu matu yenene okumuna omasa omape mokuungura pamwe na Kristus.
