1. Omuapostele Johanes wa ri mongaro iṋe komaandero weserewondo etenga O.Z.?

KOMAANDERO weserewondo etenga O.Z., omuapostele Johanes wa ri mongaro ongendise. Eye wa ri omukurundu, ngwa huurirwe mokakoverwahi ka Patmos, nu mape ya wa ri omuapostele erike ngwa ri nomuinyo. (Omavan. 1:9) Eye aa tjiwa kutja ovapirukire aave pukisa ovandu mozombongo nokuyeta ohaṋi. Mape ya aape munika tjimuna kapari Ovakriste vatjiri rukwao.—Judas 4; Omavan. 2:15, 20; 3:1, 17.

2. Otja kOmavandururiro 7:9-14, otjirimunikise tjiṋe otjiwa tjomaprofetero Johanes tja muna? (Tara kotjiperendero tjokombanda yokambo nga.)

² Ngunda Johanes e ri kehi youzeu mbwi Mukuru we mu pa otjirimunikise otjiwa ohunga noruyaveze. Motjirimunikise ho, omuengeli umwe wa raera ovaengeli varwe vane kutja ngave ṱize ovivepo vine vyondatumisire ondirise ngandu otjiyambo tji tja twa kewa kovipara vyovakarere. (Omavan. 7:1-3) Otjimbumba ho tji novandu 144 000 mbu mave ka honapara puna Jesus meyuru. (Luk. 12:32; Omavan. 7:4) Okuzambo Johanes wa tamuna otjimumba tjarwe otjinene, nu wa tja: “Kombunda yaimbi ami mba tarere ne munu otjimbumba otjinene tjovandu omundu tje hi nokusora okuvara. Owo va zire movanavisenginina avehe, na momihoko noviwaṋa avihe, na momaraka aehe, nowo va kuramene momurungu wotjihavero tjouhona na momurungu wOndjona.” (Lesa Omavandururiro 7:9-14.) Ripura nondjoroka Johanes ndja ri nayo okurihonga kutja moruyaveze maku kara ovandu ovengi mbu mave rikotamene ku Jehova momuano omuwa!

3. (a) Ongwaye otjirimunikise tja Johanes tji matji sokukurisa ongamburiro yetu? (b) Matu ke rihonga tjike morupa ndwi?

³ Tjiri otjirimunikise ho tja yanḓiparisa ongamburiro ya Johanes.  Kunao, ongamburiro yetu mai kurire ko mena rokutja tu hupa moruveze romayenenisiro wotjirimunikise ho! Moruveze rwetu, omangete wovandu va uta okurikotamena ku Jehova nu ve nomaundjiro wokutuurunga ondatumisire ondirise nokuhupa nga aruhe. Morupa ndwi matu kerihonga ohunga nomuano Jehova maa tjiukisa otjimbumba otjinene kovakarere ve ozombura zokombanda 80 nḓa kapita. Okuzambo matu tara koviṋa vivari ohunga notjimbumba ho: (1) ounene wa tjo (2) nokutja ovandu va tjo mave zuu mouye auhe. Omapu nga ye sokupamisa ongamburiro ya imba avehe mbu mave kara norupa motjimbumba ho tji tja serwa ondaya.

4. Ouatjiri uṋe mbu ri mOmatjangwa Ovakriste voposyo mbu ve ha zuu nawa, nu Ovakonḓonone vOmbeibela va pangukire vi?

⁴ Ovakriste voposyo kave hongo ouatjiri mbu ri mOmatjangwa wokutja ovandu mbe nonḓuviro mave kahupa nga aruhe kombanda yehi. (2 Kor. 4:3, 4) Ndino, ozokereka ozengi zoposyo ze honga kutja ovandu avehe ovawa tji va koka ve yenda keyuru. Posi yokutja okambumba okaṱiṱi kOvakonḓonone vOmbeibela mbaave pitisa okambo kOruhungu okuza mombura ndji 1879, ka pangukire. Owo aave tjiwa kutja Mukuru ma kotora Oparadisa kombanda yehi, nu ovandu omangete mbe nonḓuviro mave kara kombanda yehi nu kameyuru. Nungwari, kwa kambura oruveze ku wo okutjiwa nawa kutja ovandu mbe nonḓuvrio mba oouṋe.—Mat. 6:10.

5. Ovakonḓonone vOmbeibela aave tjiwa tjike ohunga notjimbumba tjovandu 144 000?

⁵ Otjiperi kutja Ovakonḓonone vOmbeibela va muna okuza kOmatjangwa kutja ovandu tjiva mave ‘randwa ave kuturwa kouye’ okukahonapara puna Jesus meyuru. (Omavan. 14:3) Otjimbumba ho aatji sokukara novandu 144 000 ovaṱakame nu mbe riyandja okukarera Mukuru nouṱakame tji va ri kombanda yehi. Hapo owo aave kambura tjike ohunga notjimbumba otjinene?

6. Ovakonḓonone vOmbeibela aave tjiwa tjike ohunga notjimbumba otjinene tjovandu?

⁶ Motjirimunikise, Johanes wa muna otjimbumba tji tja “kuramene momurungu wotjihavero tjouhona na momurungu wOndjona.” (Omavan. 7:9) Omambo ngo ya tjita kutja Ovakonḓonone vOmbeibela ve mune kutja otjimbumba otjinene tjovandu matji kakara meyuru, tjimuna imba 144 000. Tjinangara ovimbumba aviyevari mbi mavi kakara meyuru, hapo otjimbumba tjimwe matji panguka vi ku tjarwe? Ovakonḓonone vOmbeibela aave munu kutja otjimbumba otjinene tjovandu aatji sokukara nOvakriste mbe hina va ri nonḓuviro okuura mu Mukuru ngunda ave ri kombanda yehi. Nandarire kutja aave hupu otja komirari vyOmbeibela, mape ya tjiva vawo va kayenda komurungu okukara norupa mozongamburiro zoposyo. Ovakonḓonone vOmbeibela aave munu kutja ovandu mbo va raisa orusuvero ku Mukuru posi yokutja kaaru yenene okutjita kutja owo ve honapare puna Jesus. Mena rokutja orusuvero rwawo ku Mukuru karwa ri nomasa tjinene, otjimbumba otjinene hi aatji yenene okukurama momurungu wotjihavero tjouhona nungwari ka ku haama kutjo.

7. Otja kOvakonḓonone vOmbeibela, oouṋe mbu mave ka kara kombanda yehi mozombura 1000, nu owo aave kambura tjike ohunga novarumendu ovaṱakame ovakuru?

⁷ Hapo oouṋe mbu mave kakara kombanda yehi? Ovakonḓonone vOmbeibela aave kambura kutja ovandu varwe omangete mave munu ozondaya kombanda yehi, kehi youhonapare wa Kristus oure wozombura 1 000 indu ovandu mba 144 000 notjimbumba otjinene tji va i keyuru. Ovakonḓonone vOmbeibela kaave munu kutja ovandu omangete mbo mave karere Jehova ngunda Kristus e hiya uta Okuhonapara.  Posi yokutja owo aave munu kutja ovandu mbo mave rihongo ohunga na Jehova mozombura 1 000. Nu okuzambo, imba mbe kongorera omirari vya Jehova mave pewa ondjambi yokukahupa nga aruhe kombanda yehi, posi yokutja imba mbe mu pirukira mave nyonwa. Ovakonḓonone vOmbeibela wina aave munu kutja ovandu tjiva mave honapara otja “ozombara” kombanda yehi ku novarumendu ovaṱakame mba ṱa komurungu wa Kristus. Nu mave kapewa ondjambi yokukahupa meyuru komaandero wozombura 1000.—Eps. 45:16.

8. Ovimbumba viṋe vitatu mbya vi munika tjimuna vya ri norupa mondando ya Mukuru?

⁸ Ovakonḓonone vOmbeibela aave munu kutja pa ri novimbumba vitatu. (1) Ovandu mba 144 000, mbu mave ka honapara puna Jesus meyuru. (2) Otjimbumba otjinene tjOvakriste tji tji ha ri norusuvero okuura, tji matji ka kurama momurungu wotjihavero tjouhona wa Jesus meyuru, nu (3) ovandu omangete mbu mave hongwa ohunga na Jehova kombanda yehi ngunda Kristus ama honapara oure wozombura 1000. * Posi yokutja kombunda Jehova we ve vatera okuzuva epu ndi nawa.—Omiano 4:18.

9. (a) Omomuano uṋe otjimbumba otjinene kombanda yehi mu matji ‘kurama momurungu wotjihavero tjouhona na momurungu wOndjona’? (b) Ongwaye omazuviro nge ri mOmavandururiro 7:9 tji ye ri omakahu?

⁹ Mombura ndji 1935, Ovahongonone va Jehova va zuva nawa kutja otjimbumba otjinene tjovandu oouṋe. Owo va muna kutja otjimbumba otjinene katji nokuhepa okukara meyuru kutja tji ‘kurame momurungu wotjihavero tjouhona na momurungu wOndjona.’ Nungwari, oviṋa mbi mavi tjitwa momuano womasasanekero uriri. Nandarire kutja otjimbumba otjinene matji kara kombanda yehi, otjo matji yenene okukurama “komurungu wotjihavero tjouhona” mokuyakura kutja Jehova ongu ri omuhonapare wevaverwa nokukara nonḓuviro kouhonapare we. (Jes. 66:1) Owo mave yenene okukurama “momurungu wOndjona” mokukara nongamburiro mombunguhiro yotjisuta tjonguturiro tja Jesus. Momuano otjingewo, mu Mateus 25:31, 32, ‘oviwaṋa avihe’ na imba ovarunde pe munika tjimuna “mavi woronganene” komurungu wotjihavero tja Jesus tjouhona. Ouhaku kutja oviwaṋa avihe mbi, vi ri kombanda yehi nungwari ka meyuru. Omarundurukiro nga tjiri omakahu. Oyo ye kahurura kutja ongwaye Ombeibela tji ha tja otjimbumba otjinene matji i keyuru. Otjimbumba tjimwe tjovandu mba 144 000 uriri otji matji kakara nga aruhe meyuru nu matji ‘honaparere po kombanda yehi’ puna Jesus.—Omavan. 5:10.

10. Ongwaye otjimbumba otjinene tji matji sokurihonga ohunga na Jehova komurungu wozombura 1000?

¹⁰ Okuza mombura ndji 1935, Ovahongonone va Jehova va zuva nawa kutja otjimbumba otjinene tji tji ri motjirimunikise tja Johanes tji kamburira mo Ovakriste ovaṱakame mbe nomaundjiro wokukahupa nga aruhe kombanda yehi. Kutja ve yenene okutuurunga ondatumisire ondirise, otjimbumba otjinene hi matji sokurihonga ohunga na Jehova nokurikotamena ku ye komurungu wozombura 1000. Owo mave sokuraisa ongamburiro yomasa “okutuurunga nokuhinotjipo mu imbi avihe mbi mavi tjitwa” ngunda ozombura zomananeno wa Kristus aze hiya uta.—Luk. 21:34-36.

11. Ongwaye Ovakonḓonone tjiva vOmbeibela tjaave munu kutja ovandu tjiva mave pendurwa okuyenda keyuru kombunda yozombura 1000?

¹¹ Hapo tjike noumune wokutja ovandu tjiva mbe notjihorera otjiwa kombanda yehi mave pendurwa okuyenda keyuru kombunda yozombura 1000? Oumune mbo wa kahururwa ozombura ozengi nḓa kapita mokambo kOruhungu 15 ku Februari, 1913. Ovandu tjiva mape ya ave  ripura kutja, ‘Ongwaye ovakarere va Mukuru ovaṱakame woruveze orukuru mba pendurwa tji mave yandjerwa okukahupa kombanda yehi uriri, ngunda Ovakriste mbe hina vari ovaṱakame okuura tji mave i keyuru?’ Otjingaperi kutja owo vari noumune woposyo mena romapu yevari nga. Otjitenga aave munu kutja otjimbumba otjinene matji tura meyuru. Nu otjitjavari, otjimbumba otjinene ho matji kamburire mo ovandu mbe nongamburiro onḓiṱi.

12-13. Ovatwirisiwa na imba votjimbumba otjinene ve tjiwa tjike ohunga nondjambi yawo?

¹² Otja tji twa munu, okuza kombura ndji 1935, Ovahongonone va Jehova va zuva nawa kutja ovandu mbu mave tuurunga Armagedon mave rire otjimbumba otjinene tji tji ri motjirimunikise tja Johanes. Ovandu mba mave tuurunga ‘ondatumisire ondirise’ ndji mai kara kombanda yehi, nu mave ravaere “neraka enene ave tja: ‘Ondjamo i za ku Ndjambi wetu ngwa haama kotjihavero tjouhona, na kOndjona!’” (Omavan. 7:10, 14) Nu wina Omatjangwa ye honga kutja imba mba pendurwa okuyenda keyuru mave munu “otjiṋa otjiwa” poo omaundjiro omawa kombanda yovarumendu ovaṱakame woruveze orukuru. (Hebr. 11:40) Ovakambure ovakwetu va uta okuṋanga ovandu nonḓero kutja ve rikotamene ku Jehova nokukara nomaundjiro wokukahupa nga aruhe kombanda yehi.

¹³ Imbo votjimbumba otjinene ve yorokera omaundjiro wawo. Owo ve tjiwa kutja Jehova ongu toorora kutja ovakarere ve ovaṱakame mave rikotamene ku ye meyuru poo kombanda yehi. Mena rotjari Jehova tje tu raisira okupitira motjisuta tjonguturiro tja Jesus Kristus, ovatwirisiwa na imba votjimbumba otjinene ve tjiwa kutja ve nomaundjiro wokukamuna ondjambi.—Rom. 3:24.

14. Kombunda yombura ndji 1935, ongwaye ovandu ovengi tjaave himwa kutja omaprofetero ohunga notjimbumba otjinene maye yenenisiwa vi?

¹⁴ Kombunda yomazuviro omakahu wOvahongonene va Jehova mombura ndji 1935, ovandu ovengi aave ripura kutja omomuano uṋe ovandu mbe nomaundjiro wokukahupa kombanda yehi mu mave rire otjivarero otjingi. Otjotjihorera, Ronald Parkin wari nozombura 12 indu omazuviro wotjimbumba otjinene tji ya zuvakwa nawa. Eye wa tja: “Moruveze ndo, pari novazuvarise ape 56 000 mouye auhe nu ngahino ovengi vawo vari ovaturisiwa. Otjimbumba otjinene aatji munika aayo katji novandu ovengi.”

15. Omomuano uṋe otjimbumba otjinene mu tji kurirako?

¹⁵ Mozombura omurongo nḓa kongorera ko, ovahindwa va hindwa komahi omengi nu otjivarero tjOvahongonone va Jehova tje kurirako. Okuzambo mombura ndji 1968, pa utwa  oprograma yomakonḓononeno wOmbeibela yembo ndi The Truth That Leads to Eternal Life. Oro ra kahurura ouatjiri wOmbeibela momuano omupupu mbwa u tjiti kutja ovandu ovengi veye ku Jehova. Mozombura ine uriri, ovahongewa ovape wokombanda 500 000 va papitisiwa. Ovandu omangete omengi va papitisiwa indu Okereka yOkatolika tji ya pandjara omasa wayo kombanda ya Latin America nomahi warwe. Na wina indu oviungura vyetu tji vya uta okuyandjerwa rukwao koutjiro wa Europe nomahi tjiva moAfrica. (Jes. 60:22) Ndino, otjira tja Jehova tji kayenda komurungu okupitisa oviungurisiwa mbi mavi vatere ovandu okurihonga imbi Ombeibela mbi i honga. Tjiri nai ku notjimbumba otjinene tjovandu vokombanda yomangete hambondatu.

16. Otjimbumba otjinene hi matji zu pi?

¹⁶ Indu Johanes tja tjanga otjirimunikise tje, eye wa tja otjimbumba otjinene matji “zire movanavisenginina avehe, na momihoko noviwaṋa avihe, na momaraka aehe.” Omuprofete Sakarja wa hunganeka otjiṋa otjinge ho indu tja tjanga: “Momayuva ngo ovandu vozonganda omurongo mave ya kOmujuda umwe ave tja: ‘Matu vanga okurikuta kuna eṋe, tjinga atwa zuva kutja Ndjambi u ri puna eṋe!’”—Sak. 8:23.

17. Ovikwaye mbi tjitwa okuvatera ovandu woviwaṋa nomaraka aehe?

 ¹⁷ Ovahongonone va Jehova ve muna kutja ombuze ombwa mai sokuzuvarisiwa momaraka pekepeke kutja ovandu vomihoko avihe ve kare norupa motjimbumba otjinene. Eṱe aatu toroka omambo nga zikamena kOmbeibela oure wozombura 130, posi yokutja nai tu tjita omatorokero momaraka omengi tjinene. Tjiri oukahu kutja Jehova u tjita otjihimise nai mokuworonganisa otjimbumba otjinene okuza moviwaṋa avihe. Mena rokutja Ombeibela nomambo nga zikamena kOmbeibela ye ri momaraka omengi tjinene, ihi tji tjita kutja otjimbumba ho tji rikotamene ku Jehova mombwaneno nandarire kutja vaza komahi pekepeke. Ovahongonone va Jehova ve tjiukirwa kokuzuvarisa noupatje nokuraisasana orusuvero. Tjiri otjiṋa ho tji yanḓiparisa ongamburiro yetu!—Mat. 24:14; Joh. 13:35.   

18. (a) Otja ku Jesaja 46:10, 11, ongwaye tje he ri otjikumise okumuna omuano Jehova ma yenenisa omaprofetero wotjimbumba otjinene? (b) Ongwaye imba mbe nomaundjiro wokukahupa kombanda yehi tji ve ha munu kutja kave ya pewa ondjambi ombwa?

¹⁸ Tjiri tu nondjoroka ohunga nomaprofetero wotjimbumba otjinene! Katjikumise okumuna omuano Jehova ma yenenisa omaprofetero ngo momauno omuhimise. (Lesa Jesaja 46:10, 11.) Otjimbumba otjinene tji nondangi komaundjiro Jehova nge ve pa. Otjo katji munu kutja katji ya pewa ondjambi ombwa mena rokutja katji ya twirisiwa nombepo ya Mukuru okukahonapara kuna Jesus meyuru. Okuza kOmatjangwa, pe novarumendu novakazendu ovaṱakame mbaave hongorerwa po i yombepo ondjapuke, posi yokutja mbe he ri orupa rwa imba 144 000. Umwe wawo wa ri Johanes Omupapitise. (Mat. 11:11) Warwe oDavid. (Oviung. 2:34) Imbo na varwe ovengi mave kapendurwa moparadisa kombanda yehi. Avehe mbo notjimbumba otjinene mave ka raisa ouṱakame wawo ku Jehova na komananeno we.

19. Omayenenisiro wotjirimunikise tja Johanes ohunga notjimbumba otjinene tji raisa vi ounahepero woruveze mu tu hupa?

¹⁹ Ihi otjikando otjitenga Mukuru ma wanisa ovandu omangete okuza moviwaṋa avihe okurikotamena pamwe kuye. Nandarire kutja omaundjiro wetu owokukahupa kombanda yehi poo meyuru, matu hepa okuvatera ovandu ovengi kutja ve rire orupa rotjimbumba otjinene ‘tjozonḓu zarwe.’ (Joh. 10:16) Moruveze rwopopezu, Jehova ma eta ondatumisire ondirise ndja hunganekwa okunyona ozohoromende nozongamburiro nḓe yeta omihihamo kovandu. Tjiri ondjingonekero yapeke kovandu avehe votjimbumba otjinene okurikotemena ku Jehova kombanda yehi nga aruhe!—Omavan. 7:14.