1-2. Omomuano uṋe Omuzuvarise 11:6 mu ri hitasana ku notjiungura tjokuzuvarisa ombuze ombwa yOuhona?

MOMAHI tjiva ovandu ovengi ve vanga okurihonga ovingi ohunga nombuze ombwa indu tji ve i zuu. Irira tjimuna oviṋa mbi va ri amave undju. Momahi warwe, ovandu kave vanga okupuratena kombuze ya Mukuru poo yOmbeibela. Ovandu ovengi momaturiro woye ve raisa ongaro iṋe kombuze ombwa? Kainatja kutja tu ri mongaro iṋe Jehova u vanga kutja tu kayende komurungu okuzuvarisa nga tja tja opuwo atu zuvarisa rukwao.

² Jehova wa tya rukuru kutja otjiungura tjokuzuvarisa matji yanda ruṋe. Nu okuzambo ‘omaandero otji maye ya.’ (Mat. 24:14, 36) Ngunda oruveze ndwo aru hiye ya, hapo matu kayenda vi komurungu okuṱakamisa omambo nga “o suvisa omake woye”? *—Lesa Omuzuvarise 11:6.

3. Matu ka hungirira kuye morupa ndwi?

³ Orupa ndwa kapita twa tarere koviṋa vine mbi matu yenene okutjita kutja tu rire “ovapate vovandu” ovawa. (Mat. 4:19) Nu morupa ndwi matu katara komiano vitatu mbi mavi tu vatere okukayenda komurungu okuzuvarisa nandarire kutja matu munu omauzeu. Matu ke rihonga kutja ongwaye tje ri otjiṋa otjinanḓengu (1) okuyandja ombango kotjiungura tjokuzuvarisa, (2) okukara nomuretima (3) nokukara nongamburiro yomasa.

4. Ongwaye tji matu sokuyandja ombango kotjiungura Jehova tje tupa?

⁴ Jesus wa raera ovahongewa ve ohunga nongaro ovandu ndji mave raisa noviṋa mbi mavi tjitwa momayuva omasenina. Eye aa tjiwa kutja oviṋa mbi mape ya a vi tjiti kutja ovemukongorere ave ha yandja ombango kotjiungura tjokuzuvarisa. Eye wa raera  ovahongewa ve kutja “otji mamu sokukara katumba.” (Mat. 24:42) Moruveze rwa Noa, pa ri oviṋa ovingi mbyaavi tjiti kutja ovandu ave ha yandja ombango kerakiza re. Oviṋa otjingevyo mape ya avi tjiti kutja atu ha yandja ombango ndino. (Mat. 24:37-39; 2 Petr. 2:5) Kunao matu vanga okuyandja ombango kotjiungura Jehova tje tupa.

5. Oviungura 1:6-8 ri raisa vi kutja ombuze ombwa mai zuvarisiwa mouparanga wouye?

⁵ Eṱe tjiri matu sokuyandja ombango kotjiungura tjokuzuvarisa ombuze ombwa yOuhona ndino. Jesus wa hunganeka kutja otjiungura tjokuzuvarisa matji kayenda komurungu okuzuvarisiwa kombunda yonḓiro ye nu matji zuvarisiwa mouye auhe. (Joh. 14:12) Kombunda yonḓiro ya Jesus, ovahongewa ve tjiva va kauta okupata omahundju rukwao. Nu tja za nokupendurwa meyendo, eye wa tjita otjihimise nu wa vatera ovahongewa ve tjiva okupata omahundju omengi. Kombunda yokutjita otjihimise ho, Jesus wa ṋunisa kutja otjiungura tjokuzuvarisa nokukaisapo ovandu ovahongewa tja ri otjinanḓengu okukapita oviungura vyarwe. (Joh. 21:15-17) Ngunda e hiya ronda keyuru, wa raera ovahongewa ve kutja otjiungura tjokuzuvarisa tja uta ka tji nokuzuvarisiwa moIsrael uriri. (Lesa Oviungura 1:6-8.) Ozombura kombunda yanao, Jesus wa yandja otjirimunikise komuapostele Johanes okumuraisira imbi mbi mavi tjitwa “mEyuva ra Muhona.” * Otjiṋa tjimwe Johanes tja muna motjirimunikise ho, ya ri omuengeli ngwa ri “nombuze ombwa yaaruhe” ndjai zuvarisiwa “kovanavisenginina avehe na komihoko avihe na komaraka aehe na koviwaṋa avihe.” (Omavan. 1:10; 14:6) Oukahu kutja Jehova u vanga kutja tu kare norupa motjiungura tjokuzuvarisa ndino nga eye omuini tja tja opuwo.

6. Matu kayenda vi komurungu okutwapo otjiungura tjokuzuvarisa poruveze orutenga mehupo retu?

⁶ Eṱe matu kayenda komurungu okuyandja ombango kotjiungura tjokuzuvarisa indu tji  matu munu omuano Jehova me tu vatera. Otjotjihorera, eye u tupa oviṋa ovingi mbi kurisa oupanga wetu kuna ye okupitira momambo na morungovi, ovipuratenwa nozovidio noviṋa vyarwe mbi ri ko JW-Broadcasting. Ripura uriri notjiṋa hi, korungovi rwetu rwokotjiveta ku nondjivisiro ndji ri momaraka wokombanda 1 000. (Mat. 24:45-47) Ovandu mouye kave i kumwe mena rokuyandja oruvara kozopolotika pekepeke, mena rozongamburiro nḓa panguka nokutja tjiva va tumba ngunda varwe ave ri ovasyona. Posi yokutja ovakarere va Mukuru wokombanda yomangete hambondatu mouye auhe ve yorokera ombwaneno yatjiri. Otjotjihorera, tji ya ri 19 ku April 2019 oritjatano, Ovahongonone va Jehova mouye auhe va yenena okutarera okavidio ketjangwa reyuva. Ongurova ndjo, ovandu 20 919 041 va worongana pamwe okuzemburuka onḓiro ya Jesus. Indu tji matu ripura ohunga novitjitwa oviwa mbi nokukara norupa mu vyo, ku tu hinga kutja tu kayende komurungu okuzuvarisa ombuze ombwa.

7. Otjihorera tja Jesus matji tu vatere vi okuyandja ombango kokuzuvarisa?

⁷ Omuano warwe mu matu yenene okuyandja ombango kotjiungura tjokuzuvarisa omokuhorera kotjihorera tja Jesus. Eye ka yandjerere otjiṋa okumuteya ombango indu tjaa zuvarisa. (Joh. 18:37) Indu Satan tje mu raisira “omauhona aehe wouye nounene wawo auhe,” eye ka nanukirirwe i yomauhona ngo, nu nandarire indu ovandu tjaave vanga kutja ma rire ombara eye wa tupuka. (Mat. 4:8, 9; Joh. 6:15) Eye kee ripurire komautumbe nu kaa tira nandarire kutja aa munu omapirukiro omazeu. (Luk. 9:58; Joh. 8:59) Indu ongamburiro yetu tji mai rorwa, matu yenene okuyandja ombango kotjiungura tjokuzuvarisa indu tji matu ri zemburuka neronga romuapostele Paulus. Eye wa tunduuza Ovakriste okuhorera kotjihorera tja Jesus kokutja ave ha ‘urwa nokurihahiza.’—Hebr. 12:3.

8. Omuretima otjikeṋa, nu ongwaye okukara nomuretima tje ri otjiṋa otjinanḓengu nai?

⁸ Ovandu mbe nomuretima ve undja noupore nga ongaro kaaṋi tji ya runduruka. Matu sokukara nomuretima mozongoro pekepeke. Eṱe mape ya atu vanga kutja ongaro onḓeu mu turi i kapite poo mape ya tu undja otjiṋa kaaṋi otjiwa oure woruveze orure. Omuprofete Habakuk aa zeri kutja ovitjitwa vyoutwe ovandu tjiva moJuda mbyaave tjiti vi ye komaandero. (Hab. 1:2) Ovahongewa va Jesus aave munu kutja Ouhona wa Mukuru “u ri pokuya,” nu mau ye ku ve kutura komananeno wOvaroma. (Luk. 19:11) Tjiri tu undja nonḓero indu Ouhona wa Mukuru tji ma u ka isapo ouvi auhe nokuyeta ouye oupe mu ma mu kara ovandu mbe nonḓuviro ku Mukuru. (2 Petr. 3:13) Posi yokutja, matu sokukara nomuretima nokuundja oruveze Jehova nda twapo. Tara komiano tjiva Jehova me tu honga kutja tu kare nomuretima.

9. Ovihorera viṋe mbi raisa omuretima wa Jehova?

⁹ Jehova wa twapo otjihorera otjiwa tjomuretima. Eye wa yandja oruveze ndwa yenene ku Noa okutunga otjitendeze nokurira “omuzuvarise wousemba.” (2 Petr. 2:5; 1 Petr. 3:20) Jehova wa puratena ku Abraham indu tjee mu pura povikando ovingi ohunga nondando ye yokunyona ovandu mba turire motjihuro Sodom na Gomora. (Gen. 18:20-33) Oure woruveze orure, Jehova wa raisa omuretima wa peke kOvaisrael mbe ha ri nonḓuviro ku ye. (Neh. 9:30, 31) Eṱe tu muna kutja Jehova u nomuretima mena rokutja u yandja oruveze ndwa yenene kovandu avehe mbu mave vanga okurihonga ohunga naye kutja ve “ritanaure komauvi wawo.” (2 Petr. 3:9; Joh. 6:44; 1 Tim. 2:3, 4) Otjihorera tja Jehova tji tjita kutja tu kare nomuretima  indu tji matu zuvarisa nokuhonga. Eye wina u tu honga omuretima okupitira motjihorera tji tji ri mEmbo re Ombeibela.

10. Otjihorera tji tji ri mu Jakobus 5:7, 8, matji tu hongo tjike?

¹⁰ Lesa Jakobus 5:7, 8. Otjihorera tjomuungure wehi romakunino tji tu honga okukara nomuretima. Otjingaperi kutja omiti tjiva vi hapa tjimanga. Posi yokutja, omiti omingi nu tjinenenene imbi mbi hapa ovikurya vi toora orure okuhapa. MoIsrael ovikunwa aavi toora oure womieze ape hamboumwe okuhapa. Omuungure wehi romakunino aa kunu mokuṋi nu aa kondo ovikunwa vye moruteṋi. (Mar. 4:28) Tjiri ma rire otjiṋa otjiwa tji twa horere komuretima womuungure wehi romakunino. Posi yokutja iho katjiṋa otjipupu okutjita.

11. Omuretima mau tu vatere vi motjiungura tjokuzuvarisa?

¹¹ Ovandu mbe he ri ohomonena ve vanga okumuna ouwa woviungura vyawo tjimanga. Posi yokutja tji matu vanga kutja ovikunwa vyetu vi hape nokuyeta ovikurya matu sokuvitjevera nawa aruhe. Eṱe matu sokusa, okukuna, okuzukura ozondombora nokutjatja. Indu tji matu vanga okuisapo ovandu ovahongewa, eṱe wina matu sokuungura oukukutu. Ku kambura oruveze okuvatera ovahongwa vetu vOmbeibela okurihonga kutja ave ha kara nombangu nu ve raise orusuvero. Omuretima mau tu vatere kutja atu he rihahiza indu ovandu tji ve hi nokupuratena kweṱe. Indu ovandu tjiva tji ve nonḓero yokuparatena kweṱe, eṱe wina matu sokukara nomuretima. Eṱe kamaatu ṋiṋikiza omuhongwa wOmbeibela okukara nongamburiro. Povikando tjiva, ovahongewa va Jesus kaave zuu nawa oviṋa mbyaa hongo. (Joh. 14:9) Ngatu zemburuke kutja eṱe tu kuna nokutjatja, nungwari Mukuru ongu hapisa.—1 Kor. 3:6.

12. Matu raisa vi omuretima indu tji matu zuvarisa kovazamumwe vetu mbe he ri Ovahongonone va Jehova?

¹² Mape ya kutja a rire ouzeu kweṱe okukara nomuretima indu tji matu zuvarisa ku imba oveṱunḓu retu mbe he ri Ovahongonone  va Jehova. Omurari mbu ri mOmuzuvarise 3:7 mbu tja: ‘Pe noruveze rwokumwina norwokuhungira,’ mau yenene okutuvatera. Ongora yetu ombwa mai yenene okutjita kutja ovazamumwe vetu ve vange okupuratena kombuze yetu. Nungwari eṱe wina matu sokuveraera ohunga na Jehova. (1 Petr. 3:1, 2) Eṱe matu sokuzuvarisa nokuhonga noupyuke, posi yokutja matu sokukara nomuretima ku novandu avehe nandarire imba oveṱunḓu retu.

13-14. Ovihorera viṋe tjiva vyomuretima mbi matu yenene okuhorera?

¹³ Matu yenene okurihonga omuretima okuza kovihorera vyovandu mba ri ovaṱakame moruveze rwOmbeibela na wina ku imba ovaṱakame ndino. Habakuk aa zeri kutja ovitjitwa vyourunde vi isapewe, posi yokutja eye wa tja: “Ami me rondo koruhungu rwandje rwomatjeverero.” (Hab. 2:1) Omuapostele Paulus wa tja aa vanga ‘okuyenenisa’ otjiungura tje tjokuzuvarisa. Nandarire nao, eye wa kayenda komurungu nomuretima “okuhongonona Ombuze Ombwa.”—Oviung. 20:24.

¹⁴ Tara kotjihorera tjovakupasane mba mana poskole ya Gilead nu mba hindwa kehi mu mwa ri nOvahongonone va Jehova ovaṱiṱi, nu mu mwa ri ovandu ovengi mbe ha ri Ovakriste. Ovandu ovengi kaave vanga okurihonga Ombeibela. Posi yokutja, ovakambure ovakwao mbu va ri pamwe koskole ya Gilead, mbaave karere momahi warwe aave ve raera ohunga novandu avehe mbaave rihongo Ombeibela ku nawo nu mba rira Ovahongonone va Jehova. Posi yokutja ovakupasane mbo va kayenda komurungu okuzuvarisa nomuretima nandarire kutja ovandu ovengi kaave puratene. Kombunda yokuzuvarisa oure wozombura hambondatu kovandu ovengi mbe ha puratene, owo korusenina va muna ondjoroka indu omuhongwa wawo wOmeibela tja papitisiwa. Hapo ovihorera vyorukapitaveze mbyo na mbi tjitwa ndino mavi tu hongo tjike? Ovakambure ovaṱakame mbo va kayenda komurungu okuzuvarisa, nu Jehova we ve sera ondaya komuretima wawo mbo. Ngatu ‘horere ku imba mbe nongamburiro nomuretima, kokutja tu rumate imbi Ndjambi mbya kwizika.’—Hebr. 6:10-12.

15. Omomuano uṋe umwe ongamburiro mui tjita kutja tu zuvarise?

¹⁵ Mena rokutja tu nongamburiro mombuze ndji tu zuvarisa ku tjita kutja tu raere ovandu ovengi otja pu matu yenene. Tu nongamburiro momakwizikiro nge ri mEmbo ra Mukuru. (Eps. 119:42; Jes. 40:8) Eṱe tu muna omayenenisiro womaprofetero wOmbeibela nge yenenisiwa ndino. Wina tu muna omuano ehupo rovandu mu ri runduruka indu tji va utu okuṱakamisa omirari vyOmbeibela. Oviṋa otja imbyo vi tjita kutja tu kare nongamburiro yomasa kutja ombuze ombwa yOuhona wa Mukuru mai sokuzuvakwa kovandu avehe.

16. Otja kEpsalme 46:1-3, omomuano uṋe ongamburiro mu Jehova na Jesus mui tu vatera okukayenda komurungu okuzuvarisa?

¹⁶ Eṱe wina tu nongamburiro mu Jehova ngu ri Omburo yombuze ndji tu zuvarisa, na mu Jesus ngwa zikwa otjOmbara yOuhona we. (Joh. 14:1) Kainatja kutja pa tjitwa tjike kweṱe, Jehova aruhe u ri mbo okutuvatera nokutupa omasa. (Lesa Epsalme 46:1-3.) Nu wina tu nongamburiro kutja Jesus u hongorera po otjiungura tjokuzuvarisa okuza meyuru, mokuungurisa omasa nouvara mbwa pewa i Jehova.—Mat. 28:18-20.

17. Yandja otjihorera tjokutja ongwaye tji matu sokukayenda komurungu okuzuvarisa.

¹⁷ Ongamburiro i tjita kutja atu ha keyakeya kutja Jehova ma sere ozongondjero zetu ondaya momiano mbi tu hi nokuundjira ko. (Omuzuv. 11:6) Otjotjihorera, eyuva arihe ovandu omayovi omengi ve muna omambo wetu poutiha.  Hapo imbo omuano omuwa wokuzuvarisa? Ii. Mokambo nga Oviungura vyEtu vyOuhona ka Novemba 2014 ka hungira ohunga nomutanda ngwa ri komahongero wokombanda nu ngwaa vanga okutjanga ehungi ohunga nOvahongonone va Jehova. Eye kaa yenene okumuna Etuwo rwOmerikotameneno, posi yokutja wa yenena okumuna omambo wetu poutemba pomahongero wokombanda paa hiti, nu eye wina wa yenena okumuna ondjivisiro ndja hepa kehungi re. Kombunda, eye wa papitisiwa nu nai u karera otjomukandjira woruveze aruhe. Ovihorera otja imbyo vi tupa omasa okukayenda komurungu okuzuvarisa, mena rokutja pe novandu ngamba mbe hepa okuzuva ombuze yOuhona.

18. Ongwaye tji tu nongamburiro kutja otjiungura tjokuzuvarisa ombuze yOuhona matji yenenisiwa otja Jehova pe vanga?

¹⁸ Eṱe tu nongamburiro kutja otjiungura tjokuzuvarisa matji yanda moruveze ndu ri rwo. Tara ku imbi mbya tjitwa moruveze rwa Noa. Jehova wa raisa kutja eye aruhe u ungura oviṋa moruveze orusemba. Ozombura ape 120 komurungu omupupo, Jehova aa tjiwa rukuru kutja omupupo mau utu ruṋe. Ozombura ozengi kombunda yanao, Jehova wa raera Noa okutunga otjitendeze. Nu ozombura ape 40 poo 50 ngunda omupupo au hiya uta, Noa wa kayenda komurungu okuungura oukukutu. Nandarire kutja ovandu kaave puratene ku ye, eye wa kayenda komurungu okuverakiza nga Jehova tja tja oruveze rwa yenene nambano okuhitisa ovinamuinyo motjitendeze. Nu moruveze ndu ri rwo, “Muhona otja patera Nao moukoto.”—Gen. 6:3; 7:1, 2, 16.

19. Ovikwaye mbi matu kamuna indu tji twa kayenda komurungu okuzuvarisa?

¹⁹ Moruveze rwa tjimanga Jehova me tu raere kutja otjiungura tjokuzuvarisa ombuze ombwa yOuhona tja manuka. Nu okuzambo ma nyono ouye wa Satan nu ma eta ouye oupe mbu mau kara novandu mbe nonḓuviro ku Mukuru. Ngunda oruveze ndwo aru hiye ya, ngatu horere ku Noa, Habakuk na varwe mba kayenda komurungu okuzuvarisa. Nu ngatu yandje ombango kotjiungura tjokuzuvarisa, okukara nomuretima nokukara nongamburiro mu Jehova nomakwizikiro we.