Etjangwa ndo ri tja: “Tji wa munu kutja ovasyona mave ṋiṋikiziwa, nokutja mave yekwa ousemba nouatjiri mehi, indino o kumwa notjiṋa hi, orondu ove mo raerwa kutja ingwi ngu ri kombanda u na warwe kombanda ye, nu imba aveyevari ve na warwe ngu ri kombanda yawo wina.”—Omuzuv. 5:8.

Otja koumune wovandu, ezeva ndo ri munika tjimuna ri hungira ohunga nouhonapare wovandu. Posi yokutja tji twe ripurire ko nawa, oro wina ri hungira owatjiri ohunga na Jehova mbu tu huhumiṋa nokutuyanḓiparisa.

Omuzuvarise 5:8 ri hungira ohunga nomuhonapare ngu ṋiṋikiza ovasyona nokuvetjinda nouhasemba. Omuhonapare ngo u sokuzemburuka kutja u nomundu warwe ngu nouvara kombanda ye ngu mu tarera. Nu nandarire, mape ya kutja omuhonapare ngo u novandu varwe mbe nouvara kambanda ye. Tjiri otjihihamise kutja avehe mbe ri mouhonapare ve nana neke rotjitenda, nu ovandu ve muna omauzeu omengi mena romananeno wowo omavi ngo.

Kainatja kutja oviṋa mouye vya sana pi, matu yenene okukara nongamburiro kutja Jehova u tarera ‘ovahonapare vokombanda’ mozohoromende zovandu. Nu matu yenene okuyumba omerikendero wetu ku Mukuru mongumbiro. (Eps. 55:22; Fil. 4:6, 7) Matu tjiwa kutja “Muhona u tjevera kombanda youye auhe okuyandja omasa ku imba mbe ṱakama mu Ye.”—2 Ekuruh. 16:9.

Kunao, Omuzuvarise 5:8 ri tu zemburukisa ohunga nouye mu tu hupa mo nokutja aruhe pe kara omundu ngu nouvara wokombanda. Kombanda yanao, ezeve ndo ri tu zemburukisa kutja Jehova ongu ri Omuhonapare wOkombandambanda. Nu nai u honapara okupitira mOmuna we Jesus Kristus, ngu ri Ombara yOuhona we. Mukuru Omunamasaehe ngu muna avihe, we ura nousemba na wina Omuna we.