1. Oruṋe tje rira ouzeu okurikotamena ku Jehova?

HAPO oruṋe tje rira ouzeu okurikotamena ku Jehova? Irira indu tji u nomauzeu omengi mehupo poo indu tji u hi nomauzeu omengi? Indu tji tu nomauzeu i rira oupupu okuṱaṱera ku Jehova. Hapo tjike indu tji tu hi nokumuna omauzeu? Hapo povikando tjiva tu zemba kutja matu sokurikotamena ku Mukuru? Jehova wa rakiza Ovaisrael kutja otjiṋa ho mape ya a tji tjitwa ku wo.—Deut. 6:10-12.

2. Ombara Asa ya twapo otjihorera tjiṋe?

² Ombara Asa otjihorera otjiwa tjomurumendu ngwa raisa ounongo mokuṱaṱera ku Jehova. Eye kaa karere Jehova uriri indu tja ri nomauzeu nungwari wina tje ha ri nomauzeu. Oure womuinyo we, Asa ‘wa karera Muhona nouṱakame.’ (1 Ozomb. 15:14) Omuano umwe eye ma raisa kutja aa karere Mukuru nomutima auhe, ya ri indu tja isa po omerikotameneno koomukuru wovisenginina moJuda. Ombeibela i tja: “Eye wa isa po ovipunguhiro vyovisenginina nopoṋa pomerikotameneno kovisenginina kozondunda, na teya ozongunḓe zomawe ozonḓere, na ke ovihenḓe ovizere.” (2 Ekuruh. 14:3, 5) Eye nandarire wa yeka ombara oserekaze ina mukurukaze Maaka ouhona. Omena raye? Mena rokutja aa tunduuza ovandu okurikotamena ku mukuru wotjisenginina.—1 Ozomb. 15:11-13.

3. Matu katara ku ye morupa ndwi?

³ Asa ka isa pere oomukuru wovisenginina uriri. Eye wina wa vatera ovandu moJuda okurikotamena ku Jehova rukwao. Jehova wa sera Asa ondaya novandu va Juda okukara noruveze  rwohange. * Oure wozombura omurongo indu Asa tja ri ombara mehi ndo, “kamwa ri ovita.” (2 Ekuruh. 14:1, 4, 6) Morupa ndwi, matu katara komuano Asa ma ungurisa oruveze ndwo tji kwa ri nohange mehi. Nu wina matu katara kovihorera vyOvakriste veserewondo etenga mba ungurisa oruveze rwawo nawa indu tji kwa ri nohange, tjimuna Asa. Nu korusenina matu kazira epuriro ndi: Indu tji wa tura mehi ohoromende mui yandjera Ovahongonone va Jehova okurikotamena ku Jehova, hapo ove mo ungurisa vi oruveze ndwo nawa?

4. Otja 2 Ekuruhungi 14:2, 6, 7, omomuano uṋe Asa ma ungurisa oruveze rwohange?

⁴ Lesa 2 Ekuruhungi 14:2, 6, 7. Asa wa raera ovandu kutja Jehova we vepa “orusuvo kominda avihe.” Posi yokutja eye kaa munu kutja indwo oruveze rwokusuva uriri. Nu Asa wa uta okutunga otumbo twomawe notuhungu nomivero vyotumbo. Eye wa raera ovandu va Juda kutja, “tu nouvara mehi.” Hapo Asa a hee tjike? Eye a hee kutja owo va ri nouyara wokuryanga mehi ndi va pewa i Mukuru nokutunga nokuhinomundu ngu me ve tjaere. Eye wa rakiza ovandu okuungurisa oruveze rwohange ndwo nawa.

5. Ongwaye Asa tja tunduuza ovarwe ve wovita?

⁵ Asa wina wa ungurisa oruveze rwohange okutunduuza ovarwe ve wovita. (2 Ekuruh. 14:8) Hapo iho matji hee kutja kaari nongamburiro mu Jehova? Kako. Posi yokutja Asa aa tjiwa kutja omerizirira we otjombara okurongerisa ovandu koumba mbu mape ya ave munu moruyaveze. Asa aa tjiwa kutja ehi ka ri nokukarerera mohange, nu imbwo wa ri ouatjiri.

6. Omomuano uṋe Ovakriste veserewondo etenga mu va ungurisa oruveze rwohange?

⁶ Nandarire kutja potuingi Ovakriste veserewondo etenga va munine ondatumisire, owo wina va ri notuveze twohange. Hapo owo va tjita vi moruveze rwohange? Ovarumendu novakazendu ovaṱakame mbo va kayenda komurungu okuzuvarisa ombuze ombwa noupyuke nu aave yandja ombango okurikotamena ku Jehova. Nu mena ranao, owo va takavarera ko motjivaro. Iho tji raisa kutja Jehova wa sera ozongondjero zawo nḓo ondaya.—Oviung. 9:26-31.

7-8. Paulus na varwe va tjita vi indu tji va ri noruveze? Kahurura.

⁷ Ovahongewa veserewondo etenga aave zuvarisa oruveze aruhe ndu mave yenene. Otjotjihorera, indu omuapostele Paulus tja muna kutja ma yenene okuzuvarisa kovandu ovengi moEfesus, eye wa kara motjihuro ho okuzuvarisa.—1 Kor. 16:8, 9.

⁸ Paulus novakambure varwe wina va yenena okuzuvarisa kovandu ovengi mombura ndji 49 O.Z, indu ovaapostele novatarere moJerusalem tji va toora omukambo ohunga nomasukarero. (Oviung. 15:23-29) Kombunda ya indu Paulus na varwe tji va raera ozombongo ohunga nondyero ndjo, owo va kondja oukukutu ‘okuzuvarisa embo ra Muhona.’ (Oviung. 15:30-35) Hapo kwa kongorera tjike? Ombeibela i tja: “Ozombongo otji za zeuparisiwa mongamburiro naze takavarere ko pevapa reyuva.”—Oviung. 16:4, 5.

9. Omahi omengi ye ri mongaro iṋe ndino, nu mo yenene okuripura omuini epuriro riṋe?

⁹ Momahi omengi ndino, tu yenena okuzuvarisa nokuhinokutjaerwa. Hapo ove wa tura mehi ndi ri ri nao? Ndovazu pe ri nao ripura omuini kutja, ‘Hapo mbi ungurisa vi ouyara mbwo?’ Omayuva omasenina nga omawa kovakarere va Jehova, mena rokutja ve norupa motjiungura otjinene tjomazuvarisiro nokuhonga tji tji tjitwa mouye auhe. (Mar. 13:10) Pe noviṋa ovingi mbi matu yenene okutjita motjiungura hi.

10. 2 Timoteus 4:2 ma ri tu tunduuza okutjita tjike?

¹⁰ Mo yenene vi okuungurisa oruveze rwohange momuano omuwa? (Lesa 2 Timoteus 4:2.) Tara kutja ove poo umwe meṱunḓu roye ma yenene okutjita omarundurukiro kutja ma ungurire Jehova tjinene motjiungura tjokuzuvarisa, nandarire okurira omukandjira? Eṱe katu sokukondja okurira ovatumbe nai, mena rokutja imbi mbi tuna vyo kamaa vi tuurunga puna eṱe mondatumisire ondirise.—Omiano 11:4; Mat. 6:31-33; 1 Joh. 2:15-17.

11. Ovakambure tjiva va tjita vi kutja ve vatere ovandu ovengi okuzuva ombuze ombwa?

¹¹ Ovakambure ovengi ve rihonga eraka rarwe kokutja ve vatera varwe okurihonga ohunga na Jehova. Otjira tja Jehova tje tupa oviungurisiwa ovingi mbi mavi yenene okutuvatera okuzuvarisa momaraka omengi. Otjotjihorera, mombura ndji 2010, omambo wetu ya ri momaraka ape 500. Ndino, otjivarero ho tja yeruruka kombanda 1 000.

12. Okuzuva ombuze yOuhona meraka romundu omuini ku ṱuna vi kovandu? Yandja otjihorera.

¹² Hapo ovandu ve kara noumune uṋe indu tji mave zuu ohunga na Jehova meraka rawo oveni? Tara kotjihorera tjomukazendu omukambure ngwa muna ouwa momaworonganeno wotukondwa motjihuro hi Memphis, moTennessee, tja U.S.A. Omaworonganeno ngo ya ri meraka rOtjikinyarwanda, eraka ndi hungirwa moRwanda, moCongo (Kinshasa) na moUganda. Kombunda yomaworonganeno omukazendu omukambure ngwo wa tja: “Ihi  tja ri otjikando tjandje otjitenga okuzuva omaworonganeno wotukondwa nawa, oure wozombura 17 nḓa kapita nga mba tjindira ko United States.” Tjiri oukahu kutja omukazendu omukambure ngwi wa ṱuninwe tjinene i yoprograma meraka re omuini. Indu tji mo yenene, hapo mape ya orihongo eraka rarwe okuvatera ovandu tjiva momaturiro mu u zuvarisira? Hapo mape ya ovandu momaturiro mu u zuvarisa ave vanga okupuratena kombuze yOmbeibela, indu tji mo hungire meraka rawo? Ozongondjero zoye maze ku yetere ondjoroka tjinene.

13. Ovakambure ovakwetu moRussia va ungurisa vi ouyara wawo wokuzuvarisa?

¹³ Kavakambure avehe mbe nouyara wokuzuvarisa noupaturuke. Momahi tjiva, ovakambure ovakwetu kave yenene okuzuvarisa noupaturuke mena rokutja ozohoromende za tjaera otjiungura tjokuzuvarisa. Otjotjihorera, tara kovakambure ovakwetu moRussia. Oure wozombura ozengi owo va muna omapirukiro, posi yokutja mu Marta 1991 ohoromende ye vepa ousemba wokuzuvarisa. Oruveze ndwo, pa ri ovazuvarise ape 16 000 moRussia. Ozombura omirongo vivari kombunda yanao, pa kara ovazuvarise wokombanda 160 000. Otjiperi kutja, ovakambure ovakwetu va ungurisa oruveze rwawo nawa indu tji va ri nouyara wokuzuvarisa. Ouyara mbwo kau kamburire orure. Nu nandarire kutja oviṋa vya runduruka mehi ndo, owo ngamba ve kayenda komurungu okukarera Jehova nondjoroka. Owo ve kondja pu mave yenene okutjita atjihe kutja ve rikotamene ku ye.

14-15. Jehova wa ungurisa vi omasa we okuvatera Asa?

¹⁴ Moruveze rwOmbara Asa, oruveze rwohange korusenina rweya komaandero. Ovarwe wovita mba ri kombanda yeyovi rimwe mba  zire ko Etiopie va wira Juda. Omuhongorerepo Serak, wa ri nongamburiro kutja eye novarwe ve wovita mave havere Juda. Posi yokutja, Ombara Asa wa ri nongamburiro mu Jehovah nungwari ka motjivaro tjovandu. Asa wa kumba kutja, “Tu vatera nambano, Muhona, Ndjambi wetu, eṱe tjinga atwe riyameka kOve, nu mena roye twa piti okurwa kuna otjimbumba tjovarwe otjinamasa hi.”—2 Ekuruh. 14:11.

¹⁵ Nandarire kutja ovarwe wovita Ovaetopi va ri ovengi tjinene, Asa aa tjiwa kutja Jehova u nomasa nu ma yenene okuvevatera. Nu Jehova wa vatera ovakarere ve nu ovarwe wovita Ovaetopi va haverwa.—2 Ekuruh. 14:8-13.

16. Matu tjiwa vi kutja ouyara mbu tu nawo kamaau karerere?

¹⁶ Katu nokutjiwa kutja mape tjitwa tjike ku auhe wetu moruyaveze, posi yokutja matu tjiwa kutja ouyara ovakarere va Jehova mbu ve nawo kamaau karerere. Zemburuka kutja Jesus wa hunganeka kutja momayuva omasenina, ovahongewa ve ‘mave tondwa’ i yovandu avehe. (Mat. 24:9) Momuano otjingewo, omuapostele Paulus wa tja: “Avehe mbe vanga okukara mongamburiro mu Kristus Jesus mave tatumisiwa.” (2 Tim. 3:12) Satan u “nomazenge omanene,” nu matu riwovisa oveni tji matu munu kutja matu yenene okuyepa omazenge we.—Omavan. 12:12.

17. Omomiano viṋe ongamburiro yetu mu mape ya ai rorwa?

¹⁷ Moruyaveze rwopopezu, ongamburiro yetu atuhe mai rorwa. Ma ku kara “ozombamisiro ozonene tjinene nḓe hi na indu za karere po okuza kombutiro youye nga ku ndinondi.” (Mat. 24:21) Moruveze ndwo, mape ya omaṱunḓu yetu aye tu pirukire nu oviungura vyetu avi tjaerwa. (Mat. 10:35, 36) Hapo auhe wetu ma kara nongamburiro mu Jehova yokutja me tu vatera nokututjevera, tjimuna Asa?

18. Otja kOvaheberi 10:38, 39, ovikwaye mbi mavi tu vatere okurirongerisa nawa ngunda atu nouyara wokuzuvarisa?

¹⁸ Nai Jehova u tu rongerisa, kokutja ongamburiro yetu i kare nomasa. Eye u hongorera po “Omukarere omuṱakame nomunazondunge” okutupa “ovikurya moruveze ndwa tuwa po” mbi mavi tu vatere okukara nongamburiro  yomasa. (Mat. 24:45) Posi yokutja auhe wetu ma hepa okuungura oukukutu kutja ma kare nongamburiro yomasa mu Jehova.—Lesa Ovaheberi 10:38, 39.

19-20. Otja 1 Ekuruhungi 28:9, omapuriro yeṋe ngu matu sokuripura oveni, nu ongwaye?

¹⁹ Tjimuna Ombara Asa, matu hepa okutjiwa “ombango ya Muhona.” (2 Ekuruh. 14:4; 15:1, 2) Eṱe tu uta okutjiwa kutja ombango ya Jehova ooiṋe indu tji matu rihongo ohunga naye nokupapitisiwa. Tu kondja pu matu yenene kutja tu kurise orusuvero rwetu ku Jehova. Kunao ripura omuini epuriro ndi: ‘Hapo mbi yenda kozombongarero zombongo aruhe?’ Pozombongarero zombongo tu pewa omasa okukayenda komurungu okurikotamena ku Jehova nu ovakambure ovakwetu ve tu yanḓiparisa. (Mat. 11:28) Eṱe wina mape ya atu ripura oveni omapuriro nga: ‘Hapo mbi kara nomakonḓononeno wandje omuini wOmbeibela aruhe? Ndovazu ove u kara pu neṱunḓu roye, hapo ove u kara nomerikotameneno weṱunḓu otjivike atjihe? Poo indu tji u kara erike, hapo ove u twapo oruveze okukara nomerikotameneno weṱunḓu? Nu wina u kara norupa motjiungura tjokuzuvarisa nokuhonga, otja pu mo yenene?’

²⁰ Ongwaye tji matu sokuripura oveni omapuriro ngo? Ombeibela i tu raera kutja Jehova u konḓonona omeripura noviṋa mbi ri momitima vyetu, kunao eṱe wina matu sokutjita nao. (Lesa 1 Ekuruhungi 28:9.) Indu tji twa munu kutja matu hepa okurundurura ozondando zetu, ongaro poo omeripura wetu, matu sokuningira Jehova okutuvatera okutjita omarundurukiro ngo. Nai oruveze orusemba okurirongera komarorero ngu maye ya moruyaveze. O yandjere otjiṋa okukutjaera kutja o ha ungurisa oruveze rwoye nawa.