1. Ovakazendu ovakambure ve yandja vi oruvara kotjira, posi yokutja ovengi ve muna omauzeu yeṋe? (Tara kotjiperendero tjokombanda yokambo nga.)

TJIRI tu nondangi okukara novakazendu ovakambure ovengi mbe ungura oukukutu mombongo. Otjotjihorera, owo ve yandja omaziriro pozombongarero zombongo nu ve kara norupa motjiungura tjokuzuvarisa. Varwe ve kara norupa momaṱunino wEtuwo rwOmerikotameneno nokuraisa onḓero movakambure ovakwao. Otjiperi kutja, owo ve muna omauzeu. Tjiva ve tjevera ovanene vawo mba kurupa. Varwe ve muna omapirukiro okuza kovazamumwe vawo. Nu varwe ve novanatje posi yokutja kave ya kupwa, kunao ve hepa okuungura oukukutu okutumba ovanatje vawo.

2. Ongwaye tji twa sokuvatera ovakazendu ovakambure?

² Ongwaye tji twa sokuvatera ovakazendu ovakambure? Mena rokutja potuingi ovandu mouye kave yandja ondengero kovakazendu momuano mbu va sokutjindwa. Nu wina, Ombeibela i tunduuza kutja tu vatere ovakazendu. Otjotjihorera, omuapostele Paulus wa ningira ombongo moRoma kutja ve yakure Febe nu ve mu “vatere motjiungura ngamwa.” (Rom. 16:1, 2) Indu Paulus tja ri Omufarisei, eye wa ri orupa rotjimbumba tjovandu tjaa tji kambura kutja ovakazendu kava nanḓengu nu ve sokutjindwa momuano mbwo. Posi yokutja, indu tja rira Omukriste eye aa horere ku Jesus nu aa tjindi ovakazendu nondengero nu momuano omuwa.—1 Kor. 11:1.

3. Jesus aa tjindi vi ovakazendu, nu aa vara vi ovakazendu mbaave tjiti ombanga ya Mukuru?

³ Jesus aa tjindi ovakazendu avehe nondengero. (Joh. 4:27) Eye kee ve tjindi tjimuna ovanane vozongamburiro zOvajuda woruveze rwe. Nu nandarire, Ombeibela imwe i tja: “Jesus kena pa hungira momuano omuvi kovakazendu.” Posi yokutja, Jesus aa raisa ondengero onene kovakazendu mbaave tjiti ombango ya Ihe. Eye  eeve vara otjovaṱena nu we ve tamuna pamwe novarumendu eye mbaa vara otjeṱunḓu re.—Mat. 12:50.

4. Morupa ndwi matu ka hungirira kuye?

⁴ Jesus aruhe wa ri kamwaha okuvatera ovakazendu mbaave karere Mukuru. Eye aa raisa ondangi ku wo nu we ve vatera. Ngatu tare kutja matu horere vi ku Jesus mokuripurira kovakazendu ovakambure.

5. Omena raye tje rira ouzeu kovakazendu ovakambure tjiva okutwapo oruve okukara pu novakambure ovakwao?

⁵ Atuhe tu hepa okukara nomapanga omawa. Povikando tjiva, i rira ouzeu kovakazendu ovakambure okutjita omapanga omawa. Omena raye? Tara komambo ovakazendu ovakambure tjiva ngu va hungira. Omukazendu wena Jordan * wa tja: “Mena rokutja owami omukombe, potuingi mbi muna kutja hi mu nanḓengu mombongo nu kawami orupa rwombongo.” Omukandjira ngwa tjindira kehi rarwe kokutja ma kazuvarise ku ku nouhepe, wena Kristen wa tja: “Indu tji u ri omupe mombongo u ri muna ourike.” Ovarumendu ovakambure tjiva mape ya ave kara noumune mbwo. Imba mbe kara pu novandu mbe he ri Ovahongonone va Jehova mape ya ave munu ko ouzeu okuwana ku neṱunḓu rawo, novakambure ovakwao mombongo. Ovakazendu ovakambure tjiva mape ya ave rimunu ourike mena rokutja va vera nu kave yenene okupita mozoyawo, poo mena rokutja ve tjevera ovazamumwe vawo mba vera. Annette wa tja: “Ami kee yenene okuyakura omaṋangero komeero wapamwe mena rokutja ee tjevere mama.”

6. Jesus wa vatera vi Marta na Maria, otja ku Lukas 10:38-42?

⁶ Jesus aa twapo oruveze okukara pu novakazendu ovakambure nu wa ri epanga ewa ku wo. Tara koupanga mbwa ri nawo kuna Maria na Marta, pe munika tjimuna aveyevari va ri ovakombe. (Lesa Lukas 10:38-42.) Oukahu kutja Jesus wa tjita kutja ave he mu tira momambo novitjitwa vye. Otjotjihorera, Maria kaa tira okuhaama pozombaze za Jesus otjomuhongewa. * Nu indu Marta tja pindikire mena rokutja Maria kee mu vatere okurongerisa eriro, Marta kaa tira okuraera Jesus oumune we. Nu otjikando ho, Jesus wa vatera ovakazendu vevari mbo okurihonga omapu omananḓengu. Nu eye wina we ve raisira kutja u rikendera wo nomuṱena kwawo Lasarus mokuveryangera povikando pekepeke. (Joh. 12:1-3) Kunao indu Lasarus tja verere nomasa, Maria na Marta aave tjiwa kutja mave yenene okuningira ombatero ku Jesus.—Joh. 11:3, 5.

7. Omuano uṋe umwe mu matu yenene okuyanḓiparisa ovakazendu ovakambure?

⁷ Okukara pozombongarero zombongo ooruveze aruyerike kovakazendu ovakambure tjiva ndu ve yenena okukara pu novakambure ovakwao. Kunao matu vanga okuungurisa oruveze ndwo okuveyakura, okuhungira kuna wo nokuveraisira kutja tu nonḓero mu wo. Jordan ngwa tamunwa rukuru, wa tja: “Ku ndji yanḓiparisa tjinene indu varwe tji mave ndji tanga mena reziriro ndi mba yandja pozombongarero zombongo, okundjiṋanga kutja tu kazuvarise pamwe poo tji mave ndji raisire kutja ve rikendera ami.” Eṱe matu sokuraisira ovakazendu ovakambure kutja ovananḓengu kweṱe. Kia wa tja: “Indu tji mbi haire kombongarero yombongo, mbi tjiwa kutja ovakambure tjiva mave ndji hindire ombuze okupura kutja mbi ri vi. Iho tji ndji raisira kutja ovakambure ovakwetu ve ripurira kwami.”

8. Omomiano viṋe vyarwe mu matu yenene okuhorera ku Jesus?

 ⁸ Tjimuna Jesus, eṱe matu yenene okutwapo oruveze okukara pu novakazendu ovakambure. Ngahino okuveṋanga keriro poo okukara noruveze pamwe okurikuturisa ouruvi. Indu tji twa tjiti nao ngatu kondje okuhungira oviṋa mbi mavi ve tunduuza. (Rom. 1:11, 12) Ovanene vombongo mave sokukara nombepo Jesus ndja ri nayo. Eye aa tjiwa kutja okurira omukombe mape ya a rire otjiṋa otjizeu kutjiva, posi yokutja wa raisa oukahu kutja okukupa poo okukupwa nokukara novanatje kamaa ku tu yetere ondjoroka yatjiri. (Luk. 11:27, 28) Posi yokutja, ondjoroka yatjiri i za mokutwapo Jehova poruveze orutenga mehupo retu.—Mat. 19:12.

9. Ovanene vombongo mave yenene okutjita ye okuvatera ovakazendu ovakambure?

⁹ Tjinenenene ovanene vombongo mave sokutjinda ovakazendu Ovakriste tjimuna ovaṱena kwawo nooina. (1 Tim. 5:1, 2) Ma rire nawa kovanene vombongo okuhungira ku novakazendu ovakambure ngunda ombongorero yombongo ai hiya uta poo indu tji ya piti. Kristen ngwa tamunwa rukuru, wa tja: “Omunene wombongo umwe wa muna kutja mbi kara nouviungura ovingi nu aa vanga okutjiwa kutja mbi twapo vi oruveze rwandje. Ami tjiri mba ri nondangi kutja eye ee rikendere ami.” Indu ovanene vombongo tji mave twapo oruveze okuhungira ku novakazendu ovakambure, owo ve raisa kutja ve rikendera  wo. * Annette ngwa tamunwa rukuru, wa hungira kutja ongwaye tje ri otjiṋa otjiwa okuhungira ku novanene vombongo aruhe. Eye wa tja: “Mba uta okuvetjiwa nawa nu owo va uta okundjitjiwa wina. Nu indu tji mbi ri mouzeu i rira oupupu kwami okuhungira kuna wo.”

10. Otjikwaye tji matji vatere ovakazendu ovakambure okukara nondjoroka?

¹⁰ Kainatja kutja oweṱe ovarumendu poo ovakazendu, atuhe tu kara nondangi indu varwe tji mave tu raere kutja ve nondangi koviungura mbi tu ungura. Nungwari, indu tji pe hi nomundu ngu ma raisa ondangi koviungura mbi tu ungura tu wa momuinyo. Omukazendu omukandjira omukombe wena Abigail wa tja: “Ovandu kave ndji tjiwa nawa. Owo ve tjiwa ovangu novaṱena kwandje poo ovanene vandje nokutja owami omuzamumwe wawo. Povikando tjiva mbi ri muna ourike.” Tara ku imbi omukazendu omukambure wena Pam mbya hungira. Ngunda e ri omukombe, eye wa ri omuhindwa oure wozombura ozengi. Nu kombunda wa yaruka konganda okukatjevera ovanene ve. Nai eye u ri motjiwondo tjozombura 70 nu ngamba omukandjira. Pam wa tja: “Otjiṋa tji tje ndji vatera tjinene ya ri indu varwe tjaave ndji raere kutja ve nondangi koviungura mbi mbi ungura.”

11. Jesus wa raisa vi kutja wa ri nondangi koviungura vyovakazendu ovaṱakame mba ri puna ye motjiungura tjokuzuvarisa?

¹¹ Jesus wa ri nondangi kombatero ndja muna okuza kovakazendu ovakambure mbe mu vatera “nouini wawo oveni.” (Luk. 8:1-3) Eye ke ve yandjerere okumuvatera uriri posi yokutja wina we ve honga ouatjiri ounanḓengu ohunga na Mukuru. Otjotjihorera, eye we ve raera kutja ma ṱu nu okuzambo ma pendurwa. (Luk. 24:5-8) Jesus wa rongerisa ovakazendu mbo, tjimuna tja rongerisa ovaapostele komarorero ngu mave kamuna. (Mar. 9:30-32; 10:32-34) Nu nandarire kutja ovaapostele va tupuka indu Jesus tja kamburwa, ovakazendu tjiva mbaave mu vatere va ri mbo indu tjaa ṱu komuti wondatumisire.—Mat. 26:56; Mar. 15:40, 41.

12. Jesus wa yandja oviungura viṋe kovakazendu?

¹² Jesus wa yandja oviungura ovinanḓengu kovakazendu. Otjotjihorera, ovakazendu omba ri ovandu ovatenga okumuna kutja Jesus wa pendurwa. Eye we ve ningira kutja ve karaere ovaapostele kutja eye wa pendurwa movakoke. (Mat. 28:5, 9, 10) Nu mu Pentekoste 33 O.Z., ovakazendu mape ya va ri mbo indu ovahongewa tji va twirisiwa nombepo ondjapuke. Ndovazu owo va ri mbo, ovakazendu ovatwirisiwa mba mape ya kutja aave hungira momaraka pekepeke nokuraera varwe ohunga ‘noviungura ovihimise vya Ndjambi.’—Oviung. 1:14; 2:2-4, 11.

13. Ovakazendu Ovakriste ve ungura ye ndino, nu matu raisa vi ondangi yetu koviungura mbi ve ungura?

¹³ Ovakazendu ovakambure ve hepa okutangwa ku imbi avihe mbi ve tjita motjira tja Jehova. Imbyo vi kamburira mo omatungiro nomaṱunino womatuwo, okuzuvarisa momaraka warwe nokuvatera po Betel. Owo ve kara norupa mokuvatera indu tji kwatjitwa oumba, okuvatera okutoroka omambo wetu nokukarera otjovakandjira novahindwa. Tjimuna ovarumendu ovakambure, ovakazendu ovakambure ve yenda kOskole yOviungura vyOvakandjira, Oskole yOvazuvarise vOuhona nOskole ya Gilead. Kombanda yanao, ovakazendu mba kupwa ve vatera ovarumendu vawo kokutja ve yenenise omerizirira wawo mombongo na motjira tja Jehova. Atja rira ouzeu kovarumendu ovakambure mba okurira “oviyandjewa kovandu” nokuhinombatero yovakazendu vawo. (Ef. 4:8) Omomiano viṋe mu mo yenene okuvatera ovakazendu ovakambure?

14. Otja kEpsalme 68:11, ovanene vombongo mave sokutjita ye?

 ¹⁴ Ovanene vombongo ve tjiwa kutja ovakazendu ovakambure ‘otjimbumba otjinene’ tjovandu mbe ungura oukukutu nu potuingi mbe zuvarisa nawa ombuze ombwa. (Lesa Epsalme 68:11.) Kunao ovanene vombongo ve kondja okurihongera ku wo. Abigail ngwa tamunwa rukuru, u yanḓiparisiwa indu ovakambure varwe tji mave mu pura kutja omiano viṋe omiwa vyokuuta ehungi ku novandu momaturiro mu ve zuvarisa. Eye wa tja: “Iho tji ndji vatera okumuna kutja Jehova u noviungura ovinanḓengu kwami motjira tje.” Nu wina, ovanene vombongo ve tjiwa kutja ovakazendu ovaṱakame ovanene motjiwondo ve tjiwa okuvatera ovakazendu ovakambure omitanda indu tji ve ri momauzeu. (Tit. 2:3-5) Tjiri ovakazendu ovakambure ve hepa okuraisirwa orusuvero nondangi.

15. Oruṋe ovakazendu ovakambure tji ve hepa omundu okuvehungirira po?

¹⁵ Povikando tjiva, ovakazendu ovakambure mape ya ave hepa omundu okuvevatera indu tji ve ri mouzeu kaaṋi. (Jes. 1:17) Otjotjihorera, omukazendu omuhepundu poo ngwa haṋika ku nomurumendu we mape ya a hepa omundu okumuhungirira po nokumuvatera noviṋa tjiva omurumendu we mbyaa tjiti. Omukazendu omukambure omunene motjiwondo mape ya a hepa ombatero yokuhungira ku nozonganga. Poo omukazendu omukandjira ngu ungura oviungura vyarwe motjira tja Jehova mape ya a hepa omundu okumuhungirira po, indu tji ma hungirwa navi i varwe mena rokutja ka kara motjiungura tjokuzuvarisa aruhe tjimuna ovakandjira varwe. Omomiano viṋe vyarwe mu matu vatere ovakazendu ovakambure? Ngatu tare kotjihorera tja Jesus rukwao.

16. Jesus wa vatera vi Maria, otja ku Markus 14:3-9?

¹⁶ Jesus aa hungirire po ovakazendu ovakambure indu varwe tjaave ve pangura. Otjotjihorera, eye wa hungirira po Maria indu Marta tje mu hungira navi. (Luk. 10:38-42) Nu eye wina wa hungirira po Maria otjikando otjitjavari, indu varwe tjaave munu kutja wa tjiti otjiṋa otjivi nokumuhungira omambo omavi. (Lesa Markus 14:3-9.) Jesus aa tjiwa kutja ongwaye Maria tja tjita nao nu we mu tanga kutja, “Eye we Ndji ungurire otjiungura otjiwa. . . . Omukazendu ngwi wa tjiti pu ma sora.” Nu eye wa hunganeka kutja oviungura vye oviwa mbyo mavi tjiukisiwa “akuhe Ombuze Ombwa ndji ku mai zuvarisiwa mouye auhe,” nu iho ootjiṋa orupa ndwi ndu rwa raisa mba. Tjiri otjiṋa otjiwa kutja Jesus wa tja ombuze ombwa mai zuvarisiwa mouye auhe indu tja tanga Maria koviungura vye oviwa mbya tjita. Tjiri omambo we ngo ya tarareka omutima wa Maria indu ovandu varwe tjaave mu pangura.

17. Yandja otjihorera kutja oruṋe tji matu hepa okuhungirira po omukazendu omukambure.

¹⁷ Hapo ove u hungirira po ovakazendu ovakambure indu varwe tji mave ve pangura? Tara kotjihorera hi. Ovakambure tjiva ve muna omukazendu omukambure ngwa kupwa i yomurumendu ngu he ri Omuhongonone wa Jehova, ngu ya kozombongarero zombongo oruveze arwa kapita nu ngu hakahana okuyaruka konganda kombunda yombongarero. Nu ve muna kutja eye ka yeterere ovanatje ve potuingi. Kunao owo ve muna kutja ma sokutya omurumendu we kutja me mu yandjere okutwaerera ovanatje kozombongarero zombongo. Nungwari, owo kave tjiwa kutja omukazendu omukambure ngwo u kondja pu ma yenene. Eye ke nousemba wokutwapo kutja mape sokutjitwa tjike nu wina ke nousemba okuura kovanatje ve. Hapo ove mo tjiti vi indu tji wa zuu varwe amave hungire omukazendu ngwo momuano omuvi? Indu tji wa tanga omukazendu omukambure ngwo kozongondjero azehe nḓe tjita noraera varwe kutja ovikwaye oviwa mbye tjita, ove mape ya otjiti kutja varwe ave he mu pangura.

18. Omomiano viṋe vyarwe mu matu vatere ovakazendu ovakambure?

 ¹⁸ Matu sokuraisira ovakazendu ovakambure kutja tu rikendera wo mokuvevatera indu tji mave hepa ombatero. (1 Joh. 3:18) Annette ngu tjevera ina ngwa vera, wa tja: “Ovakambure tjiva aave ya okuyekundjivatera okutjevera mama kokutja mbi ungurire po oviṋa vyarwe. Otjiṋa ho tja tjita kutja mbi mune kutja mba suverwa nokutja owami orupa rwombongo.” Jordan wa muna ombatero wina. Omurumendu omukambure we mu vatera okuṱuna ohauto ye. Eye wa tja: “Otjiṋa otjiwa okutjiwa kutja ovakambure ovakwetu ve rikendera kwami nu ve vanga kutja mbi kare mondjeverero ombwa indu tji me hingi ohauto yandje.”

19. Omomiano viṋe vyarwe ovanene vombongo mu mave vatere ovakazendu ovakambure?

¹⁹ Ovanene vombongo wina ve kondja okuvatera ovakazendu ovakambure. Owo ve tjiwa kutja Jehova u vanga kutja ve tjindwe momuano omuwa. (Jak. 1:27) Kunao ovanene vombongo ve horera kotjihorera tja Jesus. Owo ve tjita nao mokuhinokutwapo ozoveta zokutja oruṋe tji mave sokuraisa otjari nokuvezuva nawa. (Mat. 15:22-28) Ovanene vombongo mbe kondja okuvatera ovakazendu ovakambure, ve tjita kutja owo ve mune kutja Jehova notjira tje ve rikendera wo. Indu Omutarere wokambumba kokuzuvarisa mu mwa ri Kia tja tjiwa kutja eye matjindire kondjuwo yarwe, eye wa hakahana okumuvatera. Kia wa tja: “Otjiṋa ho tja tjita kutja e he rikende tjinene. Mena rokutja ovanene vombongo ve ndji tunduuza nu ve ndji pa ombatero ndjee hepa, owo ve ndji raisira kutja owami omunanḓengu mombongo nokutja kawami erike.”

20-21. Matu raisa vi kutja twa suvera ovakazendu Ovakriste avehe?

²⁰ Indu tji twa tara mombongo tu muna ovakazendu ovakambure ovengi mbe ungura oukukutu, nu mbe hepa ombatero yetu. Otja tji twe rihongo okuza kotjihorera tja Jesus, eṱe matu yenene okuvatera ovakazendu ovakambure indu tji twa twapo oruveze okukara puna wo nokuvetjiwa nawa. Matu yenene okuraisa kutja tu nondangi koviungura mbi ve ungura motjira tja Jehova. Nu matu yenene okuvehungirira po indu tje ri ohepero.

²¹ Komaandero worutuu rwe kOvaroma, omuapostele Paulus wa tamuna ovakazendu Ovakriste muvyu. (Rom. 16:1, 3, 6, 12, 13, 15) Tjiri ovakazendu mbo va yanḓiparisiwa i yomambo omawa wa Paulus ngo. Eṱe atuhe wina matu sokuvatera ovakazendu ovakambure mombongo. Indu tji twa tjiti nao, tu raisa kutja twe ve suvera.