ORUPA RWOMAKONḒONONENO 39
Indu omusuverwa wetu tja isa Jehova
“Owo, tjiri, potuingi. . . va hihamisa Ndjambi.”—EPS. 78:40, 41.
EIMBURIRO 102 ‘Vatera imba ovingundi’
OMAPU KU MATU KATARA *
1. Omomuano uṋe varwe meṱunḓu mu ve fula indu umwe wawo tja kondwa kombongo?
HAPO pe nomundu meṱunḓu roye ngwa kondwa kombongo? Iho tjiri otjihihamise. Omukazendu omukambure wena Hilda, wa tja: “Indu omurumendu wandje tja ṱa kombunda yozombura 41 nḓu twa kara pamwe, ami tjiri ee munu kutja ongaro ndji mba ri mo ya ri onḓeu. * Posi yokutja, indu omuatje wandje omuzandu tja isa okukarera Jehova na isa omukazendu we novanatje, mba hihamwa tjinene.”
Jehova u tjiwa kutja u hihamwa pu pe ṱa pi indu omundu ngu wa suvera tja isa okumukarera (Lesa oparagrafa 2-3) *
2-3. Otja kEpsalme 78:40, 41, Jehova u fula vi indu ovakarere ve tji va isa okumukarera?
2 Ripura uriri kutja Jehova wa hihamwa pu pe ṱa pi, indu ovaengeli tjiva meṱunḓu re tji ve mu pirukira. (Judas 6) Nu ripura nomuano ma hihamwa indu Ovaisrael mba suverere tjaave mu pirukire povikando ovingi. (Lesa Epsalme 78:40, 41.) Kara nongamburiro kutja Tate wetu womeyuru wina u hihamwa indu omusuverwa woye tja isa okumukarera. Eye u tjiwa ongaro mu u ri. Eye me ku yanḓiparisa norusuvero nu me ku pe ombatero ndji mo hepa.
3 Morupa ndwi, matu kahungirira koviṋa mbi matu yenene okutjita kutja tu mune ombatero ya Jehova indu omundu ngu twa suvera tja isa okumukarera. Eṱe wina matu katara komuano mu matu yenene okuvatera varwe mombongo indu omuzamumwe wawo tja kondwa kombongo. Posi yokutja, rutenga matu katara komeripura tjiva ngu matu sokunakaura.
O RIMUNU KUTJA U NONDJO
4. Ovanene ovengi ve fula vi indu omuatje wawo tja isa Jehova?
4 Indu omuatje wawo omuzandu poo omukazona ngu va suvera tja isa Jehova, ovanene potuingi ve ripura kutja andakuzu va kondja tjinene okuvatera omuatje wawo okukayenda komurungu okukarera Jehova. Indu omuatje we omuzandu tja za nokukondwa kombongo, omurumendu omukambure wena Luke wa tja: “Ami ee munu kutja ondjo yandje. Ami nandarire mba ri noturoto otuvi. Povikando tjiva ee riri nokuhihamwa omutima.” Omukazendu omukambure wena Elizabeth ngwa ri mongaro otjingeyo potuingi ee ripura kutja, “Ovikwaye ovivi mbi mba tjita? Ami ee munu kutja hi kondjere nomasa okuhonga omuatje wandje omuzandu okusuvera Jehova.”
5. Ondjo ya uṋe indu omundu tja isa Jehova?
5 Eṱe matu sokuzemburuka kutja Jehova wa yandja ku auhe wetu otjiyandjewa tjokuritoororera oveni. Iho matji hee kutja eṱe matu yenene okutoorora kutja matu kara nonḓuviro ku ye poo indee. Ovanatje tjiva mbe ha ri novanene vovihorera oviwa va yenena okutoorora okukarera Jehova, nokurira ovaṱakame ku ye. Varwe mba ri novanene mbaave ungura oukukutu okuvehonga okusuvera Jehova kombunda va isa okukarera Jehova. Kunao, auhe wetu ma sokutoorora kutja ma karere Jehova. (Jos. 24:15) Mena ranao, ovanene mbe hihamwa omutima mena rokutja omuatje wawo wa isa okukarera Jehova kave sokuripa ondjo.
6. Indu omunene tja isa Mukuru, hapo iho tji ṱuna vi kovanatje?
6 Povikando tjiva i rira omunene ngu isa okukarera Jehova, nu nandarire a isa eṱunḓu re. (Eps. 27:10) Iho tji yenena okuhihamisa ovanatje mbaave tara kovihorera oviwa vyovanene vawo. Omukazendu omukambure wena Esther, wa ihe ngwa kondwa kombongo wa tja: “Ami potuingi ee riri mena rokutja tate wa tya okuhina okukarera Jehova rukwao. Ami mba suvera tate, kunao indu tja kondwa kombongo ee rikende tjinene ohunga na ye. Ami nandarire ee handuka omutima mena rotjiṋa ho.”
7. Jehova u fula vi ohunga nomutanda womunene ngwa kondwa kombongo?
7 Mitanda tjiweye kutja eṱe tu hihamwa tjinene, umwe wovanene veṋu tja kondwa kombongo. Nu wina tjiweye kutja Jehova u tjiwa ongaro mu mu ri. Eye we ku suvera nu u nondjoroka kutja u kayenda komurungu okumukarera nouṱakame, neṱe wina tu nondjoroka. Ove wina zemburuka kutja omukambo omunene woye mbwa toora kandjo yoye. Otja tji pa hungirwa rukuru, Jehova wa yandja ku auhe ouyara wokuritoororera omuini kutja me mu karere poo indee. Nu Omukriste auhe ngwa papitisiwa ma “sokutjinda omutwaro we omuini.”—Gal. 6:5.
8. Ouṋepo weṱunḓu mau yenene okutjita vi ngunda amau undju kutja omusuverwa wawo ma kotoke ku Jehova? (Wina lesa okawongo nga “ Kotoka ku Jehova.”)
8 Indu omundu ngu wa suvera tja isa okukarera Jehova, ove u kara nomaundjiro wokutja eyuva rimwe ma kotoka. Nu hapo ovikwaye mbi mo yenene okutjita ngunda mo mu undju kutja ma kotoke? Kondja okutjita avihe otja pu mo yenene kutja ongamburiro yoye i kare nomasa. Indu tji wa tjiti nao, ove mo raisa otjihorera otjiwa ku varwe meṱunḓu nu nandarire ku ingwi ngwa kondwa kombongo. Ove wina mo kara nomasa okutjinda omuhihamwatima woye. Hapo ovikwaye mbi mo yenene okutjita okukurisa ongamburiro yoye?
OVIKWAYE MBI MO YENENE OKUTJITA KUTJA ONGAMBURIRO YOYE I KARE NOMASA?
9. Ovikwaye mbi mo yenene okutjita kutja ongamburiro yoye i kare nomasa? (Wina lesa okawongo nga “ Omatjangwa ngu maye yenene okukuhuhumiṋa indu omusuverwa woye tja isa Jehova.”)
9 Kondja okutjita avihe otja pu mo yenene kutja ongamburiro yoye i kare nomasa. Otjiṋa otjinanḓengu tjinene okukayenda komurungu okukurisa ongamburiro yoye na indjo ya varwe meṱunḓu. Omomuano uṋe mu mo yenene okutjita nao? Kara noruveze rwokulesa Embo ra Mukuru aruhe nokuripurira ko oukoto, na wina okuyenda kozombongarero zombongo. Omukazendu omukambure wena Joanna, wa ihe nerumbi re mba isa ouatjiri wa tja: “Indu tji me lese ohunga na Abigajil, Ester, Job, Josef, na Jesus mOmbeibela, ku tjita kutja e he rikende tjinene. Ovihorera vyawo vi ndji tunduuza nokundjivatera kutja mbi kare nomeripura omawa. Omizumbi mbi pita ko-JW Broadcasting® wina vi ndji yanḓiparisa tjinene.”
10. Omomuano uṋe Epsalme 32:6-8 mu ri tu vatera okutjinda omerikendero wetu?
10 Raera Jehova ohunga nomerikendero woye ayehe. Indu tji mo fula okuwa momuinyo o isa okukumba ku ye. Kayende komurungu okuningira Mukuru wetu worusuvero kutja me ku vatere okuripura ohunga noviṋa tjimuna eye tje ripura nu me ‘ku honge nokukuurikira ondjira, ndji wa sokutwara.’ (Lesa Epsalme 32:6-8.) Otjingaperi kutja mape ya a ha rire oupupu okuraera Jehova omuano auhe mbu mo fula. Posi yokutja Jehova ma tjiwa omuano mbu mo fula. Eye we ku suvera tjinene nu u ku tunduuza kutja u mu raere omauzeu woye ayehe.—Eks. 34:6; Eps. 62:7, 8.
11. Otja kOvaheberi 12:11, ongwaye tji matu sokukara nongamburiro momavyuriro wa Jehova worusuvero? (Wina lesa okawongo nga “ Okukondwa kombongo omuano wa Jehova wokuraisa orusuvero.”)
11 Yakura omuhunga mbwa toorwa i yovanene vombongo. Okukondwa kombongo orupa rwondyero ya Jehova. Omavyuriro we ngo omuano omusemba wokuvatera ingwi ngwa isa okumukarera na wina ku avehe. (Lesa Ovaheberi 12:11.) Ovandu tjiva mombongo mape ya ave tja ovanene vombongo kave toorere omukambo omusemba wokukonda omundu kombongo. Posi yokutja, zemburuka kutja ovandu otja imbo kave vanga okuhungira oviṋa ovivi ohunga nomundu ngwa kondwa kombongo. Neṱe katu nouatjiri auhe. Kunao, kara nongamburiro kutja ovanene vombongo mba ri norupa mokomiti ombangure va kongorere nawa omirari vyOmbeibela nu va pangura “otja kouvara wa Muhona.”—2 Ekuruh. 19:6.
12. Ouwa waye tjiva mbu va muna mena rokuyakura omavyuriro wa Jehova?
12 Indu tji wa yakura ondyero ovanene vombongo ndji va tjiti okukonda omusuverwa woye kombongo, ove mo mu vatere kutja ma kotoke ku Jehova. Elizabeth ngwa tamunwa rukuru wa tja: “Okuhina okuhungira kuna omuatje wetu omuzandu ngwa rira omundu omunene tjiri ya ri otjiṋa otjizeu. Posi yokutja, indu tja kotoka ku Jehova eye wa tja ya ri ondando ombwa ku ye okukondwa kombongo. Kombunda eye wa tja we rihonga omapu omengi omananḓengu. Ami mbe rihonga kutja omavyuriro wa Jehova aruhe omasemba.” Omurumendu we wena Mark wina wa tja: “Omuatje wetu we ndji raera kutja epu rimwe nda tjita kutja ma vange okukotoka ku Jehova, ya ri mena rokutja twa ri nonḓuviro ku Jehova nu kaatu hungire kuna ye poo okukondja okuhakaena kuna ye. Ami tjiri mbi nondjoroka kutja Jehova we tu vatera kutja tu kare nonḓuviro ku ye.”
13. Ovikwaye mbi mavi yenene okukuvatera okutjinda ongaro yoye?
13 Hungira kuna omapanga ngu maye zuu nawa ongaro mu u ri. Kara puna ovakambure mbu mave ku vatere kutja u kare nomeripura omawa. (Omiano 12:25; 17:17) Joanna ngwa tamunwa rukuru wa tja: “Ami ee rimunu ourike. Posi yokutja, okuhungira kuna omapanga mu mbi nongamburiro kwe ndji vatera tjinene.” Hapo ove mo tjiti vi indu tjiva mombongo tji mave hungire oviṋa mbi mavi ku hihamisa?
14. Ongwaye tji matu hepa ‘okutjindasana nokuisirasana umwe tje nombiri nomukwao’?
14 Kara nomuretima novakambure ovakweṋu. Eṱe kamaatu undjire ko kutja ovandu avehe mave hungire oviṋa mbi ri vyo aruhe. (Jak. 3:2) Atuhe kaweṱe ohomonena, kunao undjira ko kutja ovandu tjiva mape ya ave ha tjiwa kutja nga ve tje vi poo ave hungire oviṋa nokuhina okuripura mbi mavi ku hihamisa. Zemburuka erakiza romuapostele Paulus nda tja: “Tjindasaneye nu mu isirasane umwe tje nombiri nomukwao. Nu mamu sokuisirasana otja Muhona punga e mu isira.” (Kol. 3:13) Omukazendu omukambure womuzamumwe ngwa kondwa kombongo wa tja: “Jehova we ndji vatera kutja mbi isire ovakambure ovakwetu mbaave kondjo okundjitunduuza, posi yokutja mbaave ndji hihamisa.” Hapo ovakambure mombongo mave yenene vi okuvatera ouṋepo womaṱunḓu mbu kayenda komurungu okukarera Jehova?
OVAKAMBURE MOMBONGO MAVE YENENE OKUVATERA
15. Ovikwaye mbi matu yenene okutjita okuvatera ouṋepo womaṱunḓu mbu novasuverwa mba kondwa kombongo oupe?
15 Raisa otjari norusuvero kouṋepo womaṱunḓu mbu kayenda komurungu okukarera Jehova. Omukazendu omukambure wena Miriam wa yakura kutja aa tira okuyenda kozombongarero zombongo kombunda ya indu omuṱena kwe tja kondwa kombongo. Eye wa tja: “Ami ee tira kutja ovandu mave tja vi. Posi yokutja, pa ri ovakambure ovengi wina mba ṱunwa i yotjiṋa ho nowo kaave hungire oviṋa ovivi ohunga nomuṱena kwandje. Mena rawo ami hee rimunu ourike.” Omukazendu omukambure warwe wa tja: “Indu omuatje wetu omuzandu tja za nokukondwa kombongo, omapanga wetu ye ya okutuhuhumiṋa. Tjiva aave tu raere kutja kaave tjiwa kutja nga ve tje vi. Nu tjiva aave riri puna ami nu varwe ve ndji hindira otutuu okundjiyanḓiparisa. Imbi mbi va tjita tjiri vye ndji vatera tjinene.”
Ovakambure mombongo mave yenene okuraisa orusuvero mokuvatera ovazamumwe va ingwi ngwa kondwa kombongo (Lesa oparagrafa 17) *
16. Ovakambure mombongo mave yenene vi okukayenda komurungu okuhuhumiṋa nokuvatera imba mbe novazamumwe mba kondwa kombongo?
16 Kayende komurungu okuvatera ouṋepo womaṱunḓu mbu kayenda komurungu okukarera Jehova. Tjinenenene nai owo mave hepa orusuvero nomayanḓiparisiro woye. (Hebr. 10:24, 25) Povikando tjiva ovazamumwe va imba mba kondwa kombongo ve muna kutja tjiva mombongo kave vanga okuvehungirisa, aayo owo wina va kondwa kombongo. Eṱe katu nakuvanga kutja owo ve mune nao. Ovakambure omitanda vovanene mba isa ouatjiri tjinenenene ve hepa okutangwa nokuyanḓiparisiwa. Omukazendu omukambure wena Maria womurumendu ngwa kondwa kombongo nu ngwa isa eṱunḓu re wa tja: “Omapanga wandje tjiva ve ya okutuvarura nave tu zikire ovikurya nokundjivatera okutjita omakonḓononeno wOmbeibela puna ovanatje vandje. Owo aave fula omuhihamwatima wandje nokurira puna ami. Nu indu ovandu tjaave hungire oviṋa mbi he ri ouatjiri ohunga na ami, owo aave ndji hungirire po. Owo tjiri ve ndji yanḓiparisa.”—Rom. 12:13, 15.
17. Omomuano uṋe ovanene vombongo mu mave yenene okuhuhumiṋa imba mbe ri kehi yomauzeu?
17 Vanene vombongo kondjeye pu mamu yenene okuyanḓiparisa ouṋepo womaṱunḓu mbu kayenda komurungu okukarera Jehova. Eṋe mu nomerizirira wapeke wokuhuhumiṋa imba vovasuverwa mba isa okukarera Jehova. (1 Tes. 5:14) Kutja mu ve yanḓiparise hungireye kuna wo komurungu nokombunda yozombongarero zombongo. Ve varureye pozoyawo nokukumba puna wo. Ungureye puna wo motjiungura tjokuzuvarisa poo povikando ve ṋangeye komerikotameneno weṋu weṱunḓu. Ovanene vombongo ve hepa okuṱakamisa imba mbe ri kehi yomauzeu nokuveraisira otjari norusuvero ndu mave hepa.—1 Tes. 2:7, 8.
KAYENDE KOMURUNGU OKUKARA NOMAUNDJIRO NONGAMBURIRO MU JEHOVA
18. Otja ku 2 Petrus 3:9, ovikwaye Mukuru mbye vanga ku imba mba isa okumukarera?
18 Jehova “tjinga e ha vanga kutja omundu nangarire umwe a yandekwe, nungwari tjinga e vanga kutja avehe ve ritanaure komauvi wawo.” (Lesa 2 Petrus 3:9.) Nandarire kutja omundu wa tjiti ouvi ounene, omuinyo we ngunda omunanḓengu ku Mukuru. Zemburuka kutja Jehova wa yandja Omuna we otjotjisuta tjonguturiro ku auhe wetu. Norusuvero Jehova u kondja okuvatera imba mba isa okumukarera kutja ve kotoke ku ye. Eye u nomaundjiro wokutja owo mave kotoka ku ye, tjimuna tji matu munu momasasanekero wa Jesus womuzandu ngwa pandjara. (Luk. 15:11-32) Ovandu ovengi mba isa ouatjiri kombunda va kotoka ku Ihe worusuvero. Nu ovakambure va ri nondjoroka tjinene okuveyakura. Elizabeth ngwa tamunwa rukuru wa ri nondjoroka indu omuatje we tja yakurwa mombongo. Eye wa tja: “Ami tjiri mbi nondjoroka kutja ovakambure ovengi ve ndji tunduuza kutja mbi kare nomaundjiro.”
19. Ongwaye tji matu yenene okukara nongamburiro mu Jehova?
19 Eṱe aruhe matu yenene okukara nongamburiro mu Jehova. Omaronga we aruhe maye tu yetere ouwa. Eye oIhe wouharupu notjari nu u norusuvero ku avehe mbe mu suvera nu mbe rikotamena ku ye. Kara nongamburiro kutja Jehova kemee ku imbirahi ko moruveze rwoye rwouzeu. (Hebr. 13:5, 6) Mark ngwa tamunwa rukuru wa tja: “Jehova kamaa roro okutuimbirahi, eye aruhe u ri mbo okutuvatera indu tji tu ri kehi yomauzeu.” Jehova ma kayenda komurungu okukupa “omasa nge kapita avihe.” (2 Kor. 4:7) Otjingaperi kutja ove mo yenene okukayenda komurungu okurira omuṱakame nokukara nomaundjiro, nandarire indu omusuverwa woye tja isa okukarera Jehova.
EIMBURIRO 44 Ongumbiro yomunandjenda
^ par. 5 Tjiri tji tu hihamisa omutima tjinene indu omusuverwa wetu tja isa okukarera Jehova. Morupa ndwi, matu katara kutja omomuano uṋe otjiṋa hi mu tji ṱuna ku Mukuru. Nu matu kerihonga kutja ovikwaye eṱunḓu ra ingwi ngwa kondwa kombongo mbi mari yenene okutjita, kutja rimune omahuhumiṋino nokukayenda komurungu okukurisa ongamburiro yawo. Orupa ndwi wina maru kahungirira komuano avehe mombongo mu mave yenene okuhuhumiṋa nokuvatera eṱunḓu ndo.
^ par. 1 Omana tjiva morupa ndwi ya rundururwa.
