1. Ozondando zeṋe nḓu matu yenene okuritwapera indu tji twa rire ovanene motjiwondo?

INDU tji twa rire ovanene motjiwondo, mape ya atu rikende kutja kamaatu ungurisiwa rukwao i Jehova tjimuna indu tji twa ri omitanda. Nandarire kutja eṱe katu nomasa tjimuna ngu twa ri na wo indu tji twa ri omitanda, eṱe matu yenene okuungurisa ounongo nondjiviro yetu okuhonga omitanda kutja ve ungurisiwe motjira tja Jehova nokuyakura omerizirira. Omurumendu omukambure ngwa karera orure otjomunene wombongo wa tja: “Indu tjee ha yenene okuungura ovingi rukwao mena roukurundu, ami mba ri nondangi kutja pa ri novarumendu omitanda mbaave yenene okuungura oviungura mbyee ungura.”

2. Morupa ndwi matu kahungirira ku ye?

² Orupa ndwa kapita rwa hungirire komuano ovakambure omitanda mu mave yenene okumuna ouwa indu tji va pangasana ku novakambure ovanene motjiwondo. Morupa ndwi, matu katara kovikaṋena otja imbi, omerisusuparisiro, okukara nondangi nouharupu mbi mavi yenene okuvatera ovakambure ovanene motjiwondo okuungura pamwe nomitanda. Nu tji va tjiti nao matji yeta ouwa kombongo aihe.

3. Otja kOvafilipi 2:3, 4 omerisusuparisiro otjikeṋa, nu maye yenene okuvatera vi Omukriste?

³ Ovakambure ovanene motjiwondo mave sokurira overisusuparise indu owo tji mave vanga okuvatera imba omitanda. Omundu omurisusuparise u vara varwe otja ovanene pu ye. (Lesa Ovafilipi 2:3, 4.) Omukambure omunene motjiwondo omurisusuparise u tjiwa kutja pe nomiano omingi  vyokuyenena okuungura otjiṋa, nu mbi ri otja komirari vyOmbeibela nu mbi ungura. Kunao, owo kave undjire ko omundu warwe okutjita oviṋa momuano otjingewo mbwi mbwaave ungura morukapitaveze. (Omuzuv. 7:10) Nandarire kutja owo ve nondjiviro ndja yenene okuhaṋasana ku novakambure omitanda, owo ve tjiwa kutja “ouye mbwi” wa runduruka nu ve tjiwa kutja ohepero ku wo okurihonga omiano omipe vyokuungura oviṋa.—1 Kor. 7:31.

4. Ovatarere vorukondwa ve raisa ongaro iṋe ndja sana na indji yOvalevi?

⁴ Ovakambure ovanene motjiwondo noverisusuparise ve yakura kutja indu tji mave yende amave kurupa, owo kave yenene okuungura ovingi tjimuna indu tjaave tjiti. Otjotjihorera, tara kovatarere vetu votukondwa. Indu tji va vaza ozombura 70, owo ve ningirwa okukauta otjiungura tjarwe. Iho mape ya arire ouzeu. Owo va ri nondjoroka tjinene okuvatera ovakambure ovakwao. Iho otjiungura tji va suverere nowo ngamba ve nonḓero okutjiungura. Posi yokutja, ve tjiwa kutja ma rire nawa ovakambure omitanda tji va ungura otjiungura ho. Owo ve raisa ongaro otjingeyo ndji yOvalevi mu Israel otjikuru, mbaave kuturwa koviungura pondanda yomaturiro indu tji va vaza otjiwondo tjozombura 50. Kainatja kutja aave ungura otjiungura tjiṋe, Ovalevi ovanene motjiwondo mbo va ri nondjoroka. Owo aave ungura otjiungura atjihe tji tji ri po naave kondjo pu mave yenene okuvatera omitanda. (Num. 8:25, 26) Ndino, indu ovatarere  vorukondwa tji va vaza otjiwondo tjozombura 70 ve isa okuvarura ozombongo ozengi, posi yokutja owo ve vatera nokuyanḓiparisa ombongo pu ve ri.

5. Ovikwaye mbi mo yenene okurihongera kotjihorera tja Dan na Katie?

⁵ Tara kotjihorera tja Dan, ngwa karere otjomutarere worukondwa oure wozombura 23. Indu Dan tja vaza otjiwondo tjozombura 70, eye nomukazendu we Katie, va pewa otjiungura otjovakandjira vapeke. Hapo owo ve nondjoroka ndji ṱa pi motjiungura tjawo ho? Dan wa tja eye nai u noviungura ovingi tjinene. Eye u nomerizirira mombongo, u vatera ovarumendu ovakambure kutja ve rire ovavatere mombongo. Nu wina u vatera varwe kutja ve yenene okukara norupa motjiungura tjokuzuvarisa momivanda, nokuzuvarisa motjovakamburwa. Otjomukambure omunene motjiwondo mo yenene okuvatera varwe okuungura ovingi nandarire kutja ko karere Jehova oruveze aruhe. Omomuano uṋe? Yakura ongaro mu u ri, u twa po ozondando ozombe nu u yandje ombango koviṋa mbi mo yenene okutjita pendje na imbi mbi u hi nakuyenena okutjita.

6. Ongwaye tje ri ounongo okurira omurisusuparise? Sasaneka.

⁶ Omundu omurisusuparise u tjiwa oungundipare we. (Omiano 11:2) Mena rokutja eye omurisusuparise ka undjire ko ovingi ku ye omuini. Kunao, eye u kara nondjoroka nokukondja okuungura oukukutu otja pu ma yenene. Eṱe matu yenene okusasaneka omundu omurisusuparise ku nomundu ngu ma hingi ohauto okuronda omutumba. Omuhinge wohauto ma hepa okutjendja ongera kutja ma ronde omutumba. Otjiperi kutja, eye tja tjiti nao ma kayenda komurungu nandarire kutja ma hingi kaṱiṱi. Momuano otjingewo, omundu omurisusuparise u tjiwa kutja oruṋe tji ma hepa okutjita omarundurukiro nokukayenda kaṱiṱi kokutja ma yenene okukarera Jehova nokuvatera varwe.—Fil. 4:5.

7. Barsilai wa raisa vi omerisusuparisiro?

⁷ Tara kotjihorera tja Barsilai ngwa ri nozombura 80, indu Ombara David tje mu ṋanga okurira orupa rwondjuwo youhona. Mena rokutja wa ri omurisusuparise eye ka yakurire ko omaṋangero wombara. Eye aa tjiwa kutja kaa yenene okuungura ovingi mena rotjiwondo tje, kunao wa ningira Kimham kutja ma yende moruveze rwe. (2 Sam. 19:35-37) Tjimuna Barsilai ovarumendu ovanene motjiwondo ve nohange okuyandja omerizirira kovarumendu ovakambure omitanda.

8. Omomuano uṋe Ombara David ma raisa omerisusuparisiro indu tja vanga okutunga ondjuwo ondjapuke ya Muhona?

⁸ Ombara David wina otjihorera otjiwa tjomundu ngwa ri omurisusuparise. Nomutima we auhe, eye aa vanga okutungira Jehova ondjuwo ondjapuke. Posi yokutja, Jehova we mu tjivisa kutja ondjingonekero ndjo mai yandjewa ku Salomo ngwa ri omutanda oruveze ndwo. David wa yakura ondyero ya Jehova ndjo neye wa yandja oruvara nomutima we auhe kotjiungura ho. (1 Ekuruh. 17:4; 22:5) David kaa munu kutja eye ongwaa sokutunga ondjuwo ondjapuke ya Muhona, mena rokutja Salomo wa ri ‘omutanda nu kaa ri nondjiviro.’ (1 Ekuruh. 29:1) David aa tjiwa kutja ondjuwo ya Muhona mai tungwa mena rokutja Jehova aa hongorere po otjiungura ho. Nungwari, kamena rondjiviro poo ozombura za imba mbaave hongorere po otjiungura ho. Tjimuna David, ovakambure ovanene motjiwondo ve kayenda komurungu okuungura oukukutu motjira tja Jehova nandarire kutja omerizirira wawo ya runduruka. Nowo ve tjiwa kutja Jehova ma sere ondaya kovakambure omitanda mbe ungura oviungura mbyaave ungura.

9. Omurumendu omukambure ngwa ri okaṋepo kOkomiti yOrutavi rwomberoo wa raisa vi omerisusuparisiro?

 ⁹ Moruveze rwetu omurumendu omukambure wena Shigeo wa raisa kutja omurisusuparise. Mombura ndji 1976, indu tja ri nozombura 30, eye wa zikwa otjokaṋepo kOkomiti yOrutavi rwomberoo. Mombura ndji 2004, eye wa zikwa otjomuworonganise wOkomiti yOrutavi rwOmberoo. Kombunda, eye wa muna kutja wa ngundipara morutu nu kaa yenene okumana oviungura vye moruveze. Eye wa kumba ne ripurire kouwa mbu mau ya indu omukambure omutanda tja ungura otjiungura ho. Nandarire kutja Shigeo kaari omuworonganise wOkomiti yOrutavi rwOmberoo, eye wa kayenda komurungu okuungura ku nouṋepo worutavi ndwo. Otja tji twa munu kovihorera vya Barsilai, Ombara David na Shigeo, omundu tje risusuparisa ka yandja ombango ko ku hi nondjiviro kwomitanda, posi yokutja u yandja ombango ku imbi mbi mave yenene okutjita. Eye ke risasaneke kuna wo, posi yokutja u ve vara otjovaungure va pamwe naye.—Omiano 20:29.

10. Ovakambure ovanene motjiwondo ve noumune uṋe ohunga novakambure omitanda mombongo?

¹⁰ Ovakambure ovanene motjiwondo ve vara ovakambure omitanda otjotjiyandjewa okuza ku Jehova. Nowo ve nondangi ku imbi mbi ve tjita. Otja tji mave ngundipara imba ovanene motjiwondo ve kara nondangi kutja pe nomitanda mbi nomasa okuungura oviungura mombongo.

11. Omomuano uṋe Rut 4:13-16 mu ri raisa kutja ovakambure ovanene motjiwondo mave munu ouwa, indu tji va yakura ombatero okuza kovakambure omitanda?

¹¹ MOmbeibela mu notjihorera otjiwa tja Naomi, omukazendu omunene motjiwondo ngwaa yakura ombatero okuza komukazendu omutanda. Omuatje wa Naomi omuzandu tja za nokuṱa, Naomi wa tunduuza Rut kutja  ma yaruke keṱunḓu re. Posi yokutja, Rut wa panḓa okuisa Naomi nu wa yaruka koBetlehem kuna ye. Naomi wa ri nondjoroka tjinene nu wa yakura ombatero ya Rut. (Rut 1:7, 8, 18) Iho tjiri tja ri otjiṋa otjiwa kovakazendu aveyevari mbo. (Lesa Rut 4:13-16.) Omerisusuparisiro maye vatere ovakambure ovanene motjiwondo okuhorera ku Naomi.

12. Omomuano uṋe omuapostele Paulus ma raisa ondangi?

¹² Omuapostele Paulus wa ri nondangi kombatero ndja muna okuza kovakambure ovakwao. Otjotjihorera, eye wa ri nondangi kOvakriste moFilipi koviyandjewa mbi ve mu hindira. (Fil. 4:16) Eye wa ri nondangi kombatero Timoteus ndje mu pa. (Fil. 2:19-22) Nu Paulus wa tja ndangi ku Mukuru ku imba mbe ya okuyekumutunduuza indu tja twarewa koRoma otjomukamburwa. (Oviung. 28:15) Paulus wa ri omundu epatje ngwaa toora ouyenda oure okukazuvarisa nokukayanḓiparisa ozombongo. Posi yokutja, wa ri omurisusuparise nu aa yakura ombatero okuza kovakambure ovakwao.

13. Omomuano uṋe ovakazendu ovakambure ovanene motjiwondo mu mave yenene okuraisa ondangi yawo kovakambure omitanda?

¹³ Ovakambure ovanene motjiwondo mave yenene okuraisa ondangi kovakambure omitanda mombongo yawo momiano omingi pekepeke. Indu owo tji mave vanga okukuvatera notjitoore, okukaranda oviṋa poo okukuvatera noviṋa vyarwe mbi mo hepa, arikana yakura ombatero yawo. Nu zemburuka kutja ombatero yawo omuano umwe Jehova me raisa orusuvero rwe kove. Ove na imba mbe ku vatera mape ya amu rire omapanga wopopezu. Aruhe kondja okuvatera omapanga woye omitanda okurira omapanga wopopezu na Jehova. Nu ve raera kutja ove u nondjoroka okumuna ovakambure omitanda amave kondjo okuungura ovingi mombongo. Nu twa po oruveze okuveraera ohunga noviṋa mbya tjitwa mehupo roye. Indu tji wa tjiti nao mo raisa “okuhepa” ku Jehova kovakambure omitanda mbe nanena kombongo.—Kol. 3:15; Joh. 6:44; 1 Tes. 5:18.

14. Omomuano uṋe Ombara David ma raisa ouharupu?

¹⁴ Otjihorera tjOmbara David wina tji tu honga otjikaṋena tjarwe otjinanḓengu ovanene motjiwondo tji mave hepa okuraisa. Tji tji ri otjikaṋena tjouharupu. Eye wa yandja ovimariva ovingi noviṋa vyarwe ovihuze, kutja ma yandje oruvara komatungiro wondjuwo ondjapuke ya Muhona. (1 Ekuruh. 22:11-16; 29:3, 4) Eye wa tjita nao nandarire kutja aa tjiwa kutja ondjozikiro yokutunga ondjuwo ondjapuke ya Muhona mai yandjewa komuatje we Salomo. Indu tji tu hi nakuyenena okukara norupa momatungiro womatuwo wetu womerikotameneno, eṱe matu yenene okukayenda komurungu okuyandja oruvara koviungura mbyo mokuyandja ovimariva vyouharupu. Nu matu yenene okuvatera omitanda okumuna ouwa okuza kondjiviro ndji twa muna mehupo retu.

15. Omuapostele Paulus wa vatera vi Timoteus?

¹⁵ Tara kotjihorera tjouharupu omuapostele Paulus tja raisa. Eye wa ṋanga Timoteus okuyenda puna ye motjiungura tje otjomuhindwa. Neye wa honga omuzandona ngwo omiano vye vyokuhonga nokuzuvarisa. (Oviung. 16:1-3) Paulus wa vatera Timoteus okurira omuzuvarise nomuhonge omuwa wombuze ombwa. (1 Kor. 4:17) Nu Timoteus wa ungurisa oviṋa Paulus mbye mu honga okuhonga varwe.

16. Ongwaye Shigeo tje honga varwe?

¹⁶ Ovakambure ovanene motjiwondo ndino, kave tira kutja kave nakuyenena okuungurisiwa rukwao, indu tji va hongo ovakambure omitanda oviungura mbyaave ungura mombongo. Otjotjihorera, Shigeo ngwa tamunwa  rukuru, aa ungurisa oruveze rwe okuhonga ouṋepo wOkomiti yOrutavi rwOmberoo omitanda. Eye aa tjiti nao kokutja ma yandje oruvara kotjiungura tjOuhona mehi ma tura. Nu mena ranao, indu tje hi na aa yenene okurira omuworonganise rukwao, pa ri omurumendu omukambure ngwa ri nondjiviro ndjaa i heperwa po okuungura otjiungura tja ungura. Shigeo wa karera otjokaṋepo kOkomiti yOrutavi rwomberoo oure wozombura zokombanda 45, nu u kayenda komurungu okuungurisa ondjiviro ndje na yo okuvatera ovakambure omitanda. Tjiri otjiyandjewa okukara novakambure otja imbo mokati ketu.

17. Otja ku Lukas 6:38, ovikwaye ovakambure ovanene motjiwondo mbi mave yenene okuyandja ku varwe?

¹⁷ Eṋe vakambure ovanene motjiwondo oweṋe otjiraisiro otjikahu tjokutja okukara nongamburiro nouṱakame mu Jehova oomuano omusemba wokuhupa. Okuza kotjihorera tjeṋu eṋe mwe tu raisira kutja ounanḓengu ku eṱe okurihonga omirari vyOmbeibela nokuviṱakamisa mehupo retu. Eṋe mamu tjiwa omuano oviṋa maa vi ungurwa morukapitaveze, posi yokutja wina mu tjiwa kutja mamu hepa okutjita omarundurukiro otja oviṋa tji mavi runduruka. Ovakambure ovanene motjiwondo mba papitisiwa oupe wina mave yenene okuvatera varwe momiano omingi. Eṋe mamu yenene okuraera varwe ohunga nouwa mbu mwa muna nandarire kutja mwa yenena okutjiwa Jehova mounene. Ovakambure omitanda mave kara nondjoroka okupuratena komahungi weṋu noviṋa mbi mwe rihonga. Indu tji mwa ‘yandja’ komitanda namu haṋasana imbi mbi mwe rihonga mehupo reṋu, Jehova me mu sere ondaya.—Lesa Lukas 6:38.

18. Omomuano uṋe ovakambure ovanene motjiwondo na imba omitanda mu mave yenene okuvaterasana?

¹⁸ Indu ovakambure ovanene motjiwondo tji va kara noupanga wopopezu ku novakambure omitanda, owo mave yenene okutunduuzasana. (Rom. 1:12) Auhe u notjiyandjewa omukwao tje hi na tjo. Ovakambure ovanene motjiwondo ve nounongo nondjiviro ndji va toora mehupo rawo, nu imba omitanda ve nomasa morutu. Indu omitanda novakambure ovanene motjiwondo tji mave ungura kumwe otjomapanga, owo ve yandja ondjozikiro ku Tate wetu womeyuru nu ve yeta ouwa ku auhe mombongo.