1-2. (a) Otja kOmiano 16:31, eṱe matu sokukara noumune uṋe ohunga novakambure ovanene motjiwondo? (b) Morupa ndwi matu kazira omapuriro yeṋe?

PE NORUVEZE rwomerinaneno moAmerica ndu mo yenene okuvaza mo ozondiamanda pehi. Posi yokutja, ozondiamanda nḓa kaze ya keṋakeṋisiwa. Kunao, ovengi mbe muna ozondiamanda nḓa kave tjiwa kutja owo omawe omahuze nu ve kapita uriri pu zo.

² Momuano otjingewo, ovakambure ovanene motjiwondo mave yenene okusasanekwa nozondiamanda nḓa mena rokutja owo wina ovihuze. Embo ra Mukuru ri sasaneka ozonḓi zovakurundu kekori rouhona. (Lesa Omiano 16:31; 20:29) Posi yokutja, eṱe mape ya atu ha munu ovihuze mbi. Imba ovaṱiṱi motjiwondo tji va yandja ombango konḓengu ya imba ovanene motjiwondo, owo mave yenene okumuna ouwa mbwa kapita outumbe. Morupa ndwi, matu kazira omapuriro yetatu nga: Ongwaye Jehova tje vara ovakambure ovanene motjiwondo otjovihuze? Ongwaye ovakambure ovanene motjiwondo tji ve ri ovananḓengu motjira tja Jehova? Eṱe matu sokutjita vi kutja tu rihongere kovihorera vyawo?

3. Otja kEpsalme 92:12-15, ongwaye ovakambure ovanene motjiwondo tji ve ri ovihuze ku Jehova?

³ Ovakambure ovanene motjiwondo ovihuze ku Jehova Mukuru. Eye u tjiwa kutja ovandu mbe ri vi, nu u tjiwa ovikaṋena vyawo oviwa. Eye u kara nohange indu owo tji mave hongo imba omitanda ohunga noviṋa avihe mbi ve rihonga oure woruveze ndu va karera Jehova. (Job 12:12; Omiano 1:1-4) Jehova wina u tjaterwa i yonḓaro orure yawo. (Mal. 3:16) Owo va muna omauzeu omengi mehupo rawo, posi yokutja va kayenda komurungu  okukara nongamburiro yomasa mu Jehova. Owo nai ve nongamburiro yomasa moruyaveze Jehova ndwa kwizika pu indu tji va uta okurihonga ouatjiri. Nu Jehova we ve suvera mena rokutja owo ve kayenda komurungu okutjivisa ena re ‘nangarire moukurupe wawo.’—Lesa Epsalme 92:12-15.

4. Otjikwaye tji matji yenene okutunduuza ovakambure ovanene motjiwondo?

⁴ Indu tji u ri omunene motjiwondo, tjiwa kutja Jehova u zemburuka oviṋa avihe mbi we mu ungurira morukapitaveze. (Hebr. 6:10) Tate wetu womeyuru u nondjoroka mena rokutja ove wa ungura oukukutu motjiungura tjokuzuvarisa. Ove wa tuurunga omauzeu omengi, tjiva nga ri omazeu okutjinda. Nu wina wa kara nonḓuviro komirari vya Jehova mbi ri mOmbeibela, wa kara nomerizirira omananḓengu motjira tja Jehova, nu wa yenena okuhonga varwe. Ove wa tjita ozongondjero kutja u yenene okukongorera omarundurukiro omengi nge tjitwa motjira tja Jehova. Ove wa yandja oruvara nu wa tunduuza varwe mbe karera Jehova oruveze aruhe. Jehova we ku suvera tjinene mena rouṱakame woye. Eye wa kwizika kutja, “kamaa isa ovaingona ve.” (Eps. 37:28) Eye wina we ku kwizikira kutja, ‘me ku tjevere ngandu tji wa kurupa nu tji wa hara ozonḓi.’ (Jes. 46:4) Kunao, o munu kutja mena rokutja wa kurupa ove ko nonḓengu rukwao motjira tja Jehova. Ove tjiri oove omunanḓengu.

5. Ovikwaye ovakambure ovanene motjiwondo mbi mave sokuzemburuka?

⁵ Ovakambure ovanene motjiwondo mave yenene okuungurisiwa motjira tja Jehova momiano omingi pekepeke. Nandarire kutja owo mape ya ave ha kara nomasa ngu va ri na wo, owo ve nondjiviro onyingi ndji va muna mehupo rawo. Jehova ma yenene okuveungurisa momiano omingi pekepeke otja tji matu katara kovihorera mbi mavi kongorere mba.

6-7. Yandja ovihorera okuza mOmbeibela vyovakambure ovanene motjiwondo mba serwa ondaya mena rouṱakame wawo ku Jehova.

⁶ Eṱe matu yenene okumuna ovihorera oviwa mOmbeibela vyovakarere va Mukuru mba kayenda komurungu okukarera Jehova indu tji va ri ovanene motjiwondo. Otjotjihorera, Moses wa ri nozombura ape 80 indu tja uta okukarera otjomuprofete wa Jehova nomuhongorere po  wotjiwaṋa tjOvaisrael. Indu Daniel tja ri nozombura zokombanda 90, Jehova wa kayenda komurungu okumuungurisa otjomuprofete. Omuapostele Johanes mape ya wina wa ri notjiwondo tjozombura 90 indu tja hingwa i yombepo ondjapuke okutjanga embo rOmavandururiro.

⁷ Ovakarere varwe va Jehova ovanene motjiwondo kava ri ovandu ovatjiukwa nu ya ri oupupu kovandu okuhina okutwara ko ombango kuwo. Nungwari, owo va ri ovananḓengu ku Jehova neye we ve sera ondaya. Otjotjihorera, Simeon omurumendu “omusemba nomupore” wa tamunwa ousupi mOmbeibela. Posi yokutja, Jehova ee mu tjiwa nawa nu we mu pa ondjingonekero yokumuna okanatje Jesus nokuhunganeka ohunga nokanatje na ina. (Luk. 2:22, 25-35) Wina ripurira komukazendu omuhepundu Ana, ngwa ri omuprofete. Eye wa ri notjiwondo tjozombura 84, posi yokutja “kaa zu mo mOndjuwo ondjapuke ya Muhona.” Jehova we mu sera ondaya mena rokukara pondjuwo ondjapuke ya Muhona aruhe neye wa tjita kutja ma kamune okanatje Jesus. Simeon na Ana va ri ovaingona ku Jehova.—Luk. 2:36-38.

8-9. Ovikwaye omukazendu omukambure omuhepundu mbya tjita motjira tja Jehova?

⁸ Moruveze rwetu, ovakambure ovengi ovanene motjiwondo ovihorera oviwa komitanda. Tara kotjihorera tjomukazendu omukambure wena Lois Didur. Eye wa ri nozombura 21 indu tja uta okukarera otjomukandjira wapeke moCanada. Kombunda yanao, eye wa kara motjiungura tjokukavarura ozombongo oure wozombura ozengi pu nomurumendu we John. Kombunda owo va kakarera poBetel ya Canada oure wozombura zokombanda 20. Indu Lois tja ri nozombura 58, eye nomurumendu we va ṋangwa okukaungurira moUkraine. Owo atjave tjita vi? Hapo owo atjave muna kutja va kurupa okutjindira kehi rarwe? Owo va yakura otjiungura ho, nu John wa zikwa otjokaṋepo kOkomiti yOrutavi rwomberoo moUkraine. Kombunda yozombura hambombari indu John tja za nokuṱa, Lois wa kayenda komurungu motjiungura tje. Lois nai u nozombura 81, neye ngamba u karera Jehova nouṱakame pu neṱunḓu roBetel ya Ukraine nowo ve mu suvera tjinene.

⁹ Omuhepundu tjimuna Lois mape ya a ha varwa otjomunanḓengu tjimuna indu omurumendu we tja ri nomuinyo, nungwari eye omunanḓengu ku Jehova. Jehova u vara ovakazendu ovakambure mbaave vatere ovarumendu vawo oure wozombura ozengi nu nai mbe kayenda komurungu okumukarera nouṱakame. (1 Tim. 5:3) Owo wina ve tunduuza ovakambure omitanda.

10. Otjihorera tjiṋe otjiwa Tony tja raisa?

¹⁰ Ovakambure ovanene motjiwondo mbe kara mozonganda mu mu ṱizirwa ovakurundu na mozohospitala wina ovananḓengu ku Mukuru. Otjotjihorera, omurumendu omukambure wena Tony nai u kara mozonganda otja inḓo. Eye wa papitisiwa tja ri nozombura 20 moPennsylvania tja America, mu Auguste 1942. Kombunda yombapitisimo ye eye wa ṋiṋikiziwa okukaungura morupa rwovita. Mena rokupanḓa okutjita nao,  eye wa kapaterwa motjovakamburwa oure wozombura mbari nohinga. Eye nomukazendu we Hilda ve kurisa ovanatje vawo omuzandu nomukazona mouatjiri. Oure wozombura ozengi Tony wa karera mozombongo ndatu otjomunene ngu hongorera ovitjitwa vyombongo (ndino omunene wombongo ngu nomerizirira ngo u tjiukwa otjomuworonganise worutu rwovanene vombongo), nu wina wa karera otjomuworonganise womaworonganeno worukondwa. Eye aa kavarura otjovakamburwa a katjita ko ozombongarero zombongo nokukakonḓonona Ombeibela kuna wo. Tony nai u nozombura 98, neye u kayenda komurungu okukarera Jehova. Eye u kondja pu ma yenene okukarera Jehova nokuungura pamwe novakambure ovakwao mombongo.

11. Omomuano uṋe mu matu yenene okuraisa kutja tu ripurira ku imba mbe ri mozonganda mu mu ṱizirwa ovakurundu?

¹¹ Omomuano uṋe mu matu yenene okuraisa ondengero kovakambure mbe ri mozonganda mu mu ṱizirwa ovakurundu? Indu tji mape yenene ovanene vombongo mave yenene okuvevatera okukara pozombongarero zombongo poo okupuratena ku zo nokuzuvarisa. Eṱe matu yenene okuveraisira onḓero mokuvevarura poo okuhungira kuna wo mongoze. Nu wina matu vanga okuyandja ombango tjinene ku imba mba tura mozonganda zovakurundu nḓe ri kokure nombongo yawo. Indu tji tu hi nakuyandja ombango ku wo eṱe mape ya atu ve zembi. Indu tji matu hungire ku novakambure ovanene motjiwondo mape ya a ha rire oupupu ku tjiva okuhungira kuna eṱe, poo ave munu kutja kahepero okuhungira ohunga na wo oveni. Posi yokutja, matu munu mo ouwa indu tji twe ve pura ohunga noviṋa mbi va tuurunga mo motjira tja Jehova na tu puratene ku wo nombango.

12. Ovakambure veṋe mbu mo yenene okuvaza mombongo yoye?

¹² Eṱe mape ya atu ha tjiwa kutja mombongo yetu mu novakambure ovakurundu wovihorera oviwa. Omukazendu omukambure wena Harriette wa karera Jehova oure wozombura ozengi moNew Jersey tja America. Nu okuzambo eye wa tjindira kwarwe okukatura pu nomuatje we omukazona. Ovakambure mombongo ye ombe va yenena okumutjiwa nawa, nowo va muna kutja eye otjihorera otjiwa. Eye ee ve serekarere ohunga noviṋa mbya tjitwa ku ye motjiungura tjokuzuvarisa indu rutenga tje rihonga ouatjiri mombura ndji 1925, nu omahungi ngo ye ve yanḓiparisa. Oruveze ndwo eye aa tjindi okakombo komayo aruhe indu tjaa kazuvarisa mena rokutja aa munu kutja mape ya a kamburwa a paterwa motjovakamburwa. Nu povikando vivari eye wa yenena okupaterwa motjovakamburwa oure wotjivike mombura ndji 1933. Indu tja ri motjovakamburwa, omurumendu we ngu ha ri Omuhongonone kaa ri nouzeu okutjevera ovanatje vawo vetatu. Otjiperi kutja ovakambure ovanene motjiwondo ovaṱakame tjimuna Harriette va pwa okupewa ondengero.

13. Twe rihongo tjike ohunga nounanḓengu wovakambure ovanene motjiwondo motjira tja Jehova?

¹³ Ovakambure ovanene motjiwondo ovananḓengu tjinene ku Jehova na kotjira tje. Owo va muna omiano pekepeke Jehova ma sera ondaya kotjira tje nomuano me ve sera ondaya. Owo ve rihongera kozondataiziro nḓu va tjita. Eṱe matu sokuvevara otja “oruharwi rwounongo” nokurihongera kovihorera vyawo. (Omiano 18:4) Indu tji wa tjiti oruveze okuvetjiwa, ongamburiro yoye mai kurire ko nu mo rihongo ovingi okuza ku wo.

14. Deuteronomium 32:7 ri tunduuza omitanda okutjita vi?

¹⁴ Kondja okuhungira kuna imba ovanene motjiwondo. (Lesa Deuteronomium 32:7.) Owo mape ya kave yenene okumuna nawa poo okukayenda hakahana nu kave zuvaka nawa tji mave hungire, posi yokutja ngunda ve nonḓero yokuungura ovingi mehupo nu ve ripahera ‘ena ewa’ komurungu wa Jehova. (Omuzuv. 7:1)  Zemburuka kutja ongwaye Jehova tje ve vara otjovananḓengu. Kayende komurungu okuveraisira ondengero. Kara tjimuna Elisa. Eye aa vanga okukara puna Elia meyuva rawo esenina. Elisa wa raera Elia povikando vitatu kutja, “ami himee ku esa.”—2 Ozomb. 2:2, 4, 6.

15. Omapuriro yeṋe ngu mape ya atu pura imba ovanene motjiwondo?

¹⁵ Raisa onḓero yatjiri kovakurundu mokuvepura omapuriro. (Omiano 1:5; 20:5; 1 Tim. 5:1, 2) Ove mo yenene okuvepura omapuriro otja inga: “Indu tji wa ri omutanda otjikwaye tji tje ku pa ongamburiro kutja wa munu ouatjiri?” “Omomuano uṋe oviṋa mbya tjitwa kove mu vye ku vatera okuya popezu na Jehova?” “Otjikwaye tji tje ku vatera okukarera Jehova nondjoroka?” (1 Tim. 6:6-8) Nu puratena nawa indu tji mave serekarere.

16. Ouwa wa ye omundu omunene nomundu omutanda mbu mave munu indu tji mave serekarere?

¹⁶ Indu ovakambure ovanene motjiwondo na imba omitanda tji mave serekarere owo ve yenena okutunduuzasana. (Rom. 1:12) Eṋe imba omitanda ma mu kara nongamburiro kutja Jehova u rikendera kovakarere ve ovaṱakame, nu ingwi omunene motjiwondo ma munu kutja wa suverwa. Eye ma kara nondjoroka okuraera omundu omutanda omuano Jehova me mu sera ondaya.

17. Ongwaye tji matu yenene okutja ovakambure ovanene motjiwondo ve ririra ko ovawa otja ozombura tji maze kayenda?

¹⁷ Otja ozombura tji maze kayenda ouwa womundu u kururuka, posi yokutja imba mbe ri ovaṱakame ku Jehova ve ririra ko ovawa komurungu we. (1 Tes. 1:2, 3) Omomuano uṋe? Otja ozombura tji maze kayenda, owo ve yandjera ombepo ya Mukuru ondjapuke okurundurura ongaro yawo nokuvevatera okukara novikaṋena oviwa. Otja tji matu kayenda komurungu okutjiwa ovakambure ovanene motjiwondo, okuveraisira ondengero nokurihongera ku wo, iho tjiri matji tjiti kutja tu ve vare otjovihuze.

18. Matu kahungirira ku ye morupa ndu maru kongorere ko?

¹⁸ Ombongo i kurira ko indu imba omitanda tji mave raisa ondengero kovakambure ovanene motjiwondo, nu wina indu imba ovanene motjiwondo tji mave raisa ondengero komitanda. Morupa ndu maru kongorere ko matu kahungirira komuano imba ovanene motjiwondo, mu mave yenene okuraisa kutja imba omitanda mombongo ovananḓengu.