Otja 1 Ovakorinte 15:8, Paulus wa tja: “Nu korusenina Eye wina we rimunikisa ku ami ngu mba sana nomuatje a kwatwa oruveze aru hi ya yenena.” Rukuru aatu tja Paulus aa hungirire kotjirimunikise tja Jesus tjomeyuru tja muna. Ya ri tjimuna eye wa pewa ondjingonekero yokukwatwa poo okupendurwa otjomundu wombepo, ozombura ozengi ngunda ombendukiro otja indjo ai hi ya tjitwa. Nungwari kombunda yokutjita omakonḓononeno wokomurungu mezeva ndi, mape munika aayo ounahepero okutjita omarundurukiro komakahururiro wezeva ndi.

Ouatjiri kutja imba, Paulus ma hungirire ku imbi mbya tjitwa pondanaukiro ye. Nu hapo aa hee tjike indu tja tja wa “kwatwa oruveze aru hi ya yenena”? Pe nomapu pekepeke ngu maye kongorere kehi mba.

Ondanaukiro ye ye ya tjimanga nu ya ri otjiṋa otjiurumise. Omuatje tja kwatwa oruveze ngunda aru hi ya yenena, tji rira otjiṋa otjitemise. Indu Saulus (kombunda ngwa karira Paulus) tjaai koDamaskus okukatatumisa Ovakriste mba ri ngo, kaa undjire ko okumuna otjirimunikise tja Jesus ngwa pendurwa movakoke. Ondanaukiro ya Paulus kaya ri otjikumise ku ye uriri, nungwari wina ya ri otjikumise kOvakriste mbaa vanga okukatatumisa motjihuro ho. Otjitjitwa ho wina tja ri otjizeu tjinene, neye wa poṱupara oure woruveze orusupi.—Oviung. 9:1-9, 17-19.

Eye wa tanaurwa “moruveze ndu he ri ro.” Embo orini rOtjigrike nda torokwa otjomuatje ngwa “kwatwa oruveze aru hiya yenena” mape ya ari torokwa otjomuatje ngwa kwatwa “moruveze ndu he ri ro.” Ombeibela ndji The Jerusalem Bible ya tja: “Ya ri tjimuna mba kwatwa ngunda ape hi nomundu ngwaa undjire ko.” Oruveze Paulus ndwa muna ondanaukiro, Jesus tjandje wa yaruka keyuru. Paulus kena pa muna Jesus ngunda e hi ya yaruka keyuru, tjimuna imba mbe mu muna mbe ri momazeva nga hungirira ko nge ri komurungu wezeva ndo. (1 Kor. 15:4-8) Omerimunikisiro wa Jesus ku Paulus nge hi na aa undjire ko, ya tjita kutja ma mune Jesus tja za nokupendurwa, nandarire kutja pe munika aayo ya ri “moruveze ndu he ri ro.”

Eye aa hungire ohunga na ye omuini momuano womerisusuparisiro. Otja kovahongwa tjiva, omambo Paulus nga hungira mba mape ya aye pose tjimuna ee riṱikonaparisa. Ndoovazu Paulus wa ri nouripura mbwo, okutja wa yakura kutja kena pa pwira okurira omuapostele. Ku nao, eye komurungu wa tja: “Nami hapo owami omuhinanḓengu tjinene povaapostele avehe, nu hi yenene okuisanewa omuapostele, tjinga iye tatumisa ombongo yaNdjambi. Nungwari motjari tjaNdjambi ami mba tjitwa otja tjinga ambi ri nai, notjari Eye tje ndji pa, katja ri omungandjo.”—1 Kor. 15:9, 10.

Ku nao, pe munika aayo Paulus mape ya aa hee omuano watjimanga Jesus mbwe rimunikisa ku ye e hi nokuundjira ko, nondanaukiro ndja muna moruveze ndu he ri ro, nokutja kari nonḓengu okumuna otjiraisiro otjihimise otja iho. Kutja Paulus aa hee ye, oukahu kutja otjitjitwa ho tja ri otjinanḓengu ku ye tjinene. Otjo tja raisa kutja Jesus tjiri wa pendurwa movakoke. Katjikumise kutja eye potuingi aa hungirire kotjitjitwa tjaa ha undjire ko hi, indu tjaa zuvarisa ku varwe ohunga nombendukiro ya Jesus.—Oviung. 22:6-11; 26:13-18.