Mena rokutja ovahongewa 70 mbo kapu va ri indu Jesus tja zikamisa Omariro Omayapuke, iho katji nokuheya kutja Jesus kaari nonyuṋe mu wo, poo kutja owo ve mu nakaura. Jesus aa vanga okukara pamwe novaapostele ve otjikando ho.

Ovahongewa mba 12 na imba 70, avehe va ri ovahongewa va Jesus. Movahongewa ve ovengi, Jesus wa toorora mo ovarumendu 12 mbaave isanewa ovaapostele. (Luk. 6:​12-16) Eye wa ri moGalilea indu tja “isanena pamwe ovahongewa ve omurongo na vevari” “okukazuvarisa ouhona waNdjambi, nokuverukisa ovavere.” (Luk. 9:​1-6) Kombunda, moJudea, Jesus “ua toororere ovakuao omirongo hambombari, n’e ve hindi kovevarivari.” (Luk. 9:51; 10:​1, EEP) Ku nao, Jesus wa ri novahongewa motuveze pekepeke mbaave zuvarisa ohunga na ye.

Ovajuda mba rira ovahongewa va Jesus aave zemburuka Opaska ombura aihe, ngahino pu nomaṱunḓu wawo. (Eks. 12:​6-11, 17-20) Komurungu onḓiro ye, Jesus novaapostele ve va ya koJerusalem. Posi ya eye ke na pa isana ovahongewa ve avehe okuza koJudea, koGalilea, na Perea okuya okuzemburuka Opaska pamwe na ye. Tjiri otjiraisiro otjikahu kutja Jesus aa vanga okukara pu novaapostele ve potjitjitwa hi. Eye wa tja ku wo: “Ami mba zera tjinene okurya Omariro wOpaska nga puna eṋe ngunda ambi hiya hihamisiwa.”—Luk. 22:15.

Eye wa ri nepu ewa nda tjitira nao. Jesus aa sokukaṱa tjimanga otja “Ondjona yaNdjambi, ndji isa ko ozondjo zouye.” (Joh. 1:29) Eye aa sokukaṱira moJerusalem, kaaku tjitirwa ozombunguhiro ku Mukuru oure woruveze orure. Ondjona yOpaska aai zemburukisa Ovaisrael kutja Jehova we ve kutura kOvaengipte. Posi ya okupitira mombunguhiro ye, Jesus aa sokutjita ovingi kombanda yanao. Eye aa sokukutura ovandu avehe kouvi nonḓiro. (1 Kor. 5:​7, 8) Mena rombunguhiro ya Jesus, ovaapostele 12 aave sokurira orupa rwomazikameno wombongo yOukriste. (Ef. 2:​20-22) Otjiṋa otjinanambango, otjihuro otjouyapuke Jerusalem tji “nomazikameno omurongo na yevari womawe; nu komazikameno nga kwa [tjangwa] omana wovaapostele vOndjona omurongo na vevari.” (Omavan. 21:​10-14) Ovaapostele ovaṱakame mbo va ri norupa orunanḓengu rwokuyenenisa ondando ya Mukuru. Ku nao, opu matu yenene okuzuva nawa kutja ongwaye Jesus tja vanga okukara pamwe na wo pOpaska osenina, kombunda yanao ndja karira Omariro Omayapuke wa Muhona.

Ovahongewa imba 70 na varwe kava ri periro ndo pu na Jesus. Posi ya, ovahongewa avehe ovaṱakame aave sokumuna ouwa kOmariro Omayapuke Jesus nga zikamisa. Ovahongewa avehe mbo va karira orupa rwomerikutiropamwe wOuhona, Jesus nga hungira kovaapostele ve ongurova ndjo.—Luk. 22:​29, 30.