Okuhungira kumwe eendu ove novanatje woye tji mamu haṋasana ondunge noumune pokati keṋu.

Okuhungira ku nomitanda mape ya arire otjiṋa otjizeu. Katjisupi, embo ndi Breaking the Code ratja: “pe munika aayo ko narupa movitjitwa vyovanatje woye tji mave nyanda “Otjiṋa otjinanḓengu tji tja sewa po okupaha otjihavero ku mohaama nokutarera puna varwe, nu mape ya atji ha rire otjihavero otjiwa.” Tji peri nao, otjiṋa ovanatje tji mave hepa tjinene okuhungira kuna wo.

Ungurira koruveze omuatje woye ndwe naro. Tjita nao nandarire kutja ra karira ehungi rongurova tjikwatoko.

“Mape ya otja, ‘Movanga kutja tu hungire oiri ndji? Ami a mbari puna ove eyuva arihe!’ Hapo ongwaye tji matu kara nouzeu omuatje wetu tjima vanga okuhungira kuṋa eṱe noupaturuke? Hapo katjiṋa omunene auhe tjezera?”—Lisa.

“Ami mba suvera ozomboṱu, posi yokutja omahungi tjiva omanahepero ngu mba kara nawo kuna ovanatje vandje ya ri mokati kouṱuku.”—Herbert.

OMURARI WOMBEIBELA: “Ape ha kara omundu ngu me ripahere ombwiro ye porwayo, nungwari auhe nga pahe ombwiro yomukwao.”—1 Ovakorinte 10:24.

Okuisakewa ombango. Omurumendu omukwate umwe wa tja: “Povikando tjiva mbi ripura noviṋa ovingi ngunda ovanatje vandje a mave hungire. Nu owo ve muna kutja hi nokuyandja ombango!”

Indu tji u tjita nao, zemisa o TV nouyendjezewa auhe mbu u nawo. Yandja ombango koviṋa omuatje woye mbi ma hungire, nu vara ouzeu we otjotjiṋa tji tja pwire ombango yoye aihe, nandarire kutja matji munika aayo katjinanḓengu.

“Eṱe matu hepa okuraera ovanatje vetu kutja oumune wawo ounanḓengu kweṱe. Indu tji ve hina okumuna nao, owo mave mwina poo ave kapaha ombatero kwarwe.”—Maranda.

“Raisa oupore, nandarire kutja omeripura womuatje woye ka nge ri wo.”—Anthony.

OMURARI WOMBEIBELA: “Ṱakamiseye nawa kutja mamu puratene vi.”—Lukas 8:18.

Kondja okuungurisa otuveze twa rwe. Rumwe ovanatje ve rira ovapaturuke indu tjive hina okuhungira ku novanene omurungu nomurungu.

“Kondja okuhungira ngunda a ma muhingi. Tji mwa haama meṋe nomeṋe mu hingira nawa pendje nokuyandja etambo kuwo.”—Nicole.

Eriro ri rira oruveze oruwa okuhungira oviṋa imba na mbena.

“Periro rongurova omundu auhe u yenena okuhungira ohunga noviṋa ovivi noviwa mbya kaenda po eyuva ndo. Otjiṋa ho tji tu yeta kumwe nu tji tjita kutja omundu auhe ma mune kutja kena kuhepa okukondja nouzeu we erike.”—Robin.

OMURARI WOMBEIBELA: “Omundu auhe nga hakahane okupuratena, nungwari nga wombe okuhungira.”—Jakobus 1:19.