ONGUMBIRO ndji Tate yetu ngu ri momayuru, ondji kumbwa tjinene i yOvakriste avehe. Kutja imbwo ouatjiri poo kauatjiri, ongumbiro ndjo kai zuvakwa nawa i yovandu ovengi. Ovandu ovengi ve rihonga ongumbiro ndjo motjiuru, nu mape ya ondji ve kumba eyuva arihe. Posi yokutja, Jesus ka hee kutja ongumbiro ndjo mai sokukumbwa momuano mbwo. Matu tjiwa vi?

Ngunda e hi ya hungira ohunga nongumbiro ndjo, Jesus wa tja: “Tji mamu kumbu, amu wondjorora tjinene.” (Mateus 6:7) Hapo omambo wa Jesus nga hungira nga aaye vetasana otjiuru? Kako katjiperi. Nungwari, eye we tu honga kutja matu sokukumba ohunga na iye, nokutja ovikwaye ovinanḓengu mbi matu sokutwa po poruveze orutenga indu tji matu kumbu. Ngatu tare kutja wa tja vi. Ongumbiro ndjo i ri mu Mateus 6:​9-​13.

Jesus aa raere ovemukongorere kutja ozongumbiro azehe maze sokukumbwa ku Ihe, Jehova. Hapo mo tjiwa kutja omena raye ena ra Mukuru tji ri ri enanḓengu nokutja ongwaye tji mari sokuyapurwa?

Ena ra Mukuru ra yambururwa okuza kombutiro yovandu. Omunavita wa Mukuru, Satan, wa tja Jehova u novizeze, Omuhonapare ngu u ripurira ku ye omuini, nu ngu hi nousemba wokuhonaparera po oviutwa vye. (Genesis 3:1-6) Ovandu ovengi ve yenda kumwe ku noumune wa Satan, mokuhonga kutja Mukuru ke notjari, ke nombinḓu komutima nu eye kangu ri Omuute oparukaze. Varwe nandarire va isa mo ena ra Jehova momatorokero wOzombeibela, nokutjaera ovandu kutja ave he ri ungurisa.

Ombeibela i raisa kutja Mukuru ma kaṱuna ouhasemba auhe mbu tjitwa. (Esekiel 39:7) Mokutjita nao, eye ma yenenisa ozonḓero zoye azehe nokuṱuna omauzeu woye ayehe. Omomuano uṋe? Omambo nga kongorera ko mongumbiro ya Jesus maye ziri epuriro ndo.

Ndino, pe nombambaukisire onyingi mokati kovahonge vozongamburiro ohunga nOuhona wa Mukuru. Posi ya otjovapuratene va Jesus paave tjiwa, ovaprofete va Mukuru va kwizika rukuru kutja Messias, Omuyame ngwa toororwa i Mukuru, ma honapara Ouhona mbu mau ye ku rundurura ouye. (Jesaja 9:6, 7; Daniel 2:44) Owo mau yapura ena ra Mukuru mo ku raisa kutja Satan omunavizeze, nu okuzambo au isa po Satan noviungura vye avihe. Ouhona wa Mukuru mau kaisa po ovita, omitjise, ondjara nu nandarire onḓiro. (Epsalme 46:9; 72:12-16; Jesaja 25:8; 33:24) Indu tji mo kumbu kutja Ouhona wa Mukuru u ye, ove u kumba kutja omakwizikiro ayehe ngo ye yenenisiwe.

Omambo wa Jesus ye raisa kutja ombango ya Mukuru tjiri mai yenenisiwa kombanda yehi tjimuna tji ya yenenisiwa meyuru, komaturiro wa Mukuru. Kape notjiṋa tji tja yenena okutjaera ombango ya Mukuru okuyenenisiwa meyuru, ingo Omuna wa Mukuru wa rwisa Satan novemukongorere mokuvenakaurira kombanda yehi. (Omavandururiro 12:9-12) Omaningiriro ometjatatu mongumbiro ndji, tjimuna inga yevari omatenga, ye tu vatera kutja tu yandje ombango ku imbi mbi ri ovinanḓengu tjinene. Ndji ri ombango ya Mukuru, nungwari ndji he ri oyetu oveni. Ombango ye aruhe ondji eta ouwa watjiri koviutwa avihe. Ku nao, nandarire omurumendu ohomonena Jesus wa kumba ku Ihe kutja: “A ha rire ombango yandje, nungwari nga rire ombango yoye omuini ndji mai yenenisiwa.”—Lukas 22:42.

Omambo wa Jesus nga kongorera ko ye raisa kutja eṱe wina matu yenene okukumba ohunga novihepwa vyetu. Kape notjiṋa otjivi okukumba ku Mukuru ohunga novihepwa vyetu vyeyuva. Ouatjiri owombwi wokutja, okutjita nao ku tu zemburukisa kutja Jehova ongu “yandja omuinyo nosuvaneno noviṋa avihe ku ngamwa auhe.” (Oviungura 17:25) Ombeibela i tu raisira kutja eye omunene worusuvero ngu kara nohange okuyandja kovanatje ve imbi mbi mave hepa. Nungwari tjimuna omunene omuwa, eye kamaa yandja oviṋa mbi hi nokuveetera ouwa.

Hapo ove tjiri u nozondjo za Mukuru? Nu u hepa kutja me ku isire? Ovandu ovengi ndino kave tjiwa kutja ouvi otjikeṋa, nokutja otjiṋa otjinaumba tjinene. Posi ya Ombeibela i tu honga kutja ouvi ombu tjita kutja tu mune omauzeu, orondu owo ombu tjita kutja ovandu ve koke. Mena rokutja twa kwatwa mouvi, eṱe atuhe povikando ovingi tu tjita ouvi. Nu kutja tu kamune omuinyo waaruhe, matu hepa kutja Mukuru me tu isire. (Ovaroma 3:23; 5:12; 6:23) Tji tu wisa omuinyo okutjiwa kutja Ombeibela i tja: “Muhona, oOve omuwa, nu u isira.”—Epsalme 86:5.

Hapo wa munu kutja ongwaye tji u hepa ondjeverero ya Mukuru? Ovandu ovengi ve kambura kutja ‘omunauvi,’ Satan, ke ko oparukaze. Posi ya Jesus wa honga kutja Satan oke ri, nu nandarire we mu isana kutja “omuhonapare wouye mbwi.” (Johanes 12:31; 16:11) Satan wa pukisa ouye mbwi mbwe honaparera po, nu u nonḓero yokukupukisa kutja o ha kara noupanga ouwa ku na Tate woye, Jehova. (1 Petrus 5:8) Nandarire nao, Jehova u nomasa okukapita Satan, nu u nondjoroka okutjevera imba mbe mu suvera.

Omapu omananḓengu ngu twa tara ko ohunga nongumbiro Jesus ndja kumba, kaye kamburire mo omapu ayehe ohunga nongumbiro. Zemburuka kutja 1 Johanes 5:14 ri tu raera ohunga na Mukuru kutja: “Eye tjinga ama zuvire ozongumbiro zetu tji matu ningire ngamwa otjiṋa otja kombango ye.” Ku nao, o tira okukumba ku Mukuru ohunga nomauzeu woye.—1 Petrus 5:7.

Hapo ohepero okutjiwa kutja oruṋe tji matu sokukumba nu pe pi pu twa sokukumbira?