OTJINGAPERI kutja ozongamburiro ozengi ze ṋunisa kutja ozongumbiro ze sokutjitwa mozondjuwo ozonene, nokutwa po ozoiri ovandu ndji va sokukumba meyuva. Hapo Ombeibela i tja matu sokukumba potuveze noiri kaaṋi?

Ombeibela i raisa kutja pe notuveze kaaṋi pu matu sokukumba. Otjotjihorera, ngunda e hi ya rya pu novemukongorere, Jesus wa tja okuhepa ku Mukuru mongumbiro. (Lukas 22:17) Nu indu ovahongewa ve tji ve ya pamwe okurikotamena ku Mukuru, owo aave kumbu pamwe. Ku nao, aave kayenda komurungu okutjita otjitjitwa tjaatji kayendisiwa rukuru mozondjuwo zomaworonganeno wombongo na mondjuwo ondjapuke ya Muhona moJerusalem. Mukuru wa twa po kutja ondjuwo ondjapuke ya Muhona i rire “ondjuwo yongumbiro koviwaṋa avihe.”—Markus 11:17.

Indu ovakarere va Mukuru tji ve ya pamwe okukumba, omaningiriro wawo ye yenena okuzuvirwa. Mukuru u kara nonyuṋe indu otjimbumba tji tji nomeripura yemwe, nu ongumbiro ndja yandjwa tji ya zikamene komirari vyOmbeibela. Ongumbiro ndjo mape ya ai mu hingi kutja ma tjite otjiṋa tji mape ya a ha tjiti moruveze ndwo. (Ovaheberi 13:18, 19) Ovahongonone va Jehova ve kumba aruhe pozombongarero zawo zombongo. Ove mo ṋangwa norusuvero okuya pEtuwo rOmerikotameneno ndi ri popezu na ove okuyekuzuva ozongumbiro otja inḓa.

Nandarire nao, Ombeibela kai twa po oiri kaaṋi poo oruveze pu matu sokukumbira. MOmbeibela, tu lesa ohunga novakarere va Mukuru mbaave kumbu mozoiri na motuveze pekepeke. Jesus wa tja: “Ove tji mo kumbu, kahite metuwo roye u pate omuvero nu u kumbe ku Iho ngu ha munika. Nu Iho ngu muna imbi mbi u tjita mohamunika, ongu me ku sutu ondjambi yoye.”—Mateus 6:6.

Tjiri ingo omaṋangero omawa. Ove mo yenene okukumba kOmuhonapare erike mevaverwa oiri ngamwa aihe, nu o kara nongamburiro kutja ma puratene kongumbiro yoye ndjo. Tjiri oukahu kutja ongwaye Jesus potuingi tjaa kara erike okukumba. Otjikando tjimwe, eye wa kumba ongurova aihe ku Mukuru okupaha omuhunga kondando onanḓengu tjinene ndjaa sokutjita.—Lukas 6:12, 13.

Ovarumendu novakazendu varwe mOmbeibela aave kumbu indu tji mave tjiti ozondando ozonḓeu poo tji mave munu omatokero. Povikando tjiva owo aave kumbu kombanda poo mongumumu, nu rumwe aave kumbu movimbumba poo auhe kourike we. Otjiṋa otjinanḓengu otjo hi tjokutja owo aave kumbu. Mukuru nandarire u ṋanga ovakarere ve kutja: “Kumbeye nokuhaisa ko.” (1 Ovatesalonika 5:17) Eye u nonḓero yokupuratena ku imba mbe tjita ombango Ye. Tjiri omaṋangero ngo ye raisa orusuvero rwa Jehova.

Otjingaperi kutja mouye wakandino ovandu ovengi ve ripura ohunga nounanḓengu wongumbiro. Ove mape ya o pura kutja, ‘Hapo tjiri okukumba maku ndji vatere?’

 [Epu enandengu]

Eṱe matu yenene okukumba oiri noruveze ngamwa aruhe