Ovahongonone va Jehova kave zemburuka omayuva wongwatero, mena rokutja tu kambura kutja omazemburukiro otja ingo kaye yozike Mukuru. Nandarire kutja Ombeibela kai hungire oukahu kutja katu sokuzemburuka omayuva wongwatero, oyo i yenena okutuvatera okuzuva oumune wa Mukuru ohunga nomikandi otja imbyo. Ngatu tare ku imbi Ombeibela mbi hungira.

1.   Omayuva wongwatero ye notjiṋa nomerikotameneno wovisenginina. Embo ndi Standard Dictionary of Folklore, Mythology, and Legend ri tja: “Okuzemburuka omayuva wongwatero kwa uta mena rokutja ovandu aave kambura kutja ozombepo ozombi ze hihamisa omundu ngwa kwatwa meyuva ndo. Ku nao, owo ve kambura kutja indu omapanga womundu tji ye ri mbo nokumuzerira po ouṋingandu, ye yenena okumuvatera nokumutjevera kozombepo ozombi.” Embo ndi The Lore of Birthdays ra hungira kutja oruveze orukuru omayuva wongwatero ya ri notjiṋa nomaukiro wokutara kozonyose nḓe kara momambo nondando yokuvanga okutjiwa oruyaveze. Embo ndi wina ri tja: “Ovandu ve kambura kutja omakelese ye yenena okuyenenisa ozonḓero zoye.”

    Nungwari, Ombeibela i tjaera imba mbe puratena kozombetere, kozombuke, koundjai, poo okutjita oviṋa otja imbyo. (Deuteronomium 18:14; Ovagalate 5:19-21) Epu rimwe Mukuru ma nakaura otjihuro tja Babilon otjikuru, ya ri mena rokutja ovature vatjo aave ungurisa ozonyose okuuka. (Jesaja 47:11-15) Ovahongonone va Jehova kave pirukire otuzo atuhe mena rokoṋa ku twa za, posi ya eṱe tu yandja ombango kOmatjangwa indu tji ye tu pe omuhunga omukahu.

2.   Ovakriste voruveze orukuru kaave nyanda omayuva wongwatero. Embo ndi The World Book Encyclopedia ri hungira kutja, Ovakriste voruveze orukuru “aave vara omazemburukiro wongwatero yangamwa omundu otjoruzo rwovandu mbe ha ri ovakarere va Mukuru.” Ombeibela i raisa kutja ovaapostele na varwe mba hongerwe i Jesus va zikamisa omuano Ovakriste avehe mbu mave yenene okuhorera.—2 Ovatesalonika 3:6.

3.   Omazemburukiro ayeerike Ombeibela ndji i raera Ovakriste okuzemburuka, onḓiro ya Jesus. (Lukas 22:17-20) Ihi katjikumise, orondu Ombeibela i tja “eyuva ronḓiro oro ewa pu indi rongwatero.” (Omuzuvarise 7:1) Komaandero womuinyo we kombanda yehi, Jesus wa kara nena ewa komurungu wa Mukuru mokutjita kutja eyuva re ronḓiro ri rire enanḓengu tjinene pu indi rongwatero ye.—Ovaheberi 1:4.

4.   Ombeibela kai na pu ya tamuna omukarere wa Mukuru ngwa zemburuka eyuva rongwatero. Ihi katji nokuheya kutja ovatjange vOmbeibela va zemba okutjanga ovitjitwa otja imbyo. Owo va tjanga ohunga nomazemburukiro wozongwatero yevari yaimba mbe hi na aave karere Mukuru. Posi ya ovitjitwa vivari mbi pa tjitwa oviṋa ovivi.—Genesis 40:20-22; Markus 6:21-29.

 Tjimuna ovanene avehe ovawa, Ovahongonone va Jehova ve raisa orusuvero kovanatje vawo ombura aihe, mokuvepa oviyandjewa nokukara nomeero wapamwe. Owo ve vanga okuhorera kotjihorera tja Mukuru, ngu ri omuharupu aruhe. (Mateus 7:11) Ovanatje vOvahongonone va Jehova kave kaere oviṋa oviwa, otja koumune wawo mbu ri kehi mba:

•   “I rira otjiṋa otjiwa okumuna otjiyandjewa indu tji we hi nokuundjira ko.”—Tammy, wozombura 12.

•   “Nandarire kutja hi munu oviyandjewa meyuva randje rongwatero, ovanene vandje ve ndji randera oviyandjewa movitjitwa vyarwe. Ami mbi tjaterwa mena rokutja kaviṋa mbi mbi undjira ko.”—Gregory, wozombura 11.

•   “Opati yozominute omurongo, ovikuhuna oviṱiṱi, neimburiro, kapati yakatjiri. Indjee koyetu mu yekutara kutja opati yakatjiri i kara vi.”—Eric, wozombura 6.