Indu umwe wOvahongonone va Jehova tja isa okuzuvarisa poo okuyenda kozombongarero zombongo eṱe katu mu nakaura. Eṱe tu kondja okumutunduuza kokutja ma kurise orusuvero rwe ku Mukuru.

 Indu omundu tja tjiti otjiṋa otjivi tjinene, kaaruhe tje kondwa kombongo. Posi ya, indu Omuhongonone wa Jehova ngwa papitisiwa tje kayenda komurungu okukatuka omatwako wa Mukuru nu tje hi nokuvanga okuritanaura, eye u kondwa kombongo. Ombeibela i hungira oukahu okutja: “Ingwi omurunde nga isiwe mo mokati keṋu!”—1 Ovakorinte 5:13.

 Hapo pe tjitwa tjike indu omurumendu tja kondwa kombongo, nu ngunda ouṋepo weṱunḓu re auhe tji u ri Ovahongonone va Jehova? Nandarire kutja wa isa ongamburiro ye, eye ngunda orupa rweṱunḓu. Omukazendu we novanatje ve, mave kayenda komurungu okumuraisira orusuvero nondengero.

 Nandarire kutja omundu wa kondwa kombongo, eye ma yenene okuya kozombongarero zetu zombongo. Eye wina ma yenene okuningira ombatero kovanene vombongo, indu tji ma vanga. Ovanene vombongo ve vanga okuvatera omundu ngwa kondwa kombongo kutja ma tjite omarundurukiro nu ma yenene okukarera Mukuru rukwao. Indu omundu tja kondwa kombongo, tja isa okutjita oviṋa ovivi, nokuraisa kutja ma vanga okukongorera omirari vyOmbeibela, eye ma yakurwa rukwao otja umwe wOvahongonone va Jehova.