Omazuviro woposyo: Ovahongonone va Jehova ve kambure kutja ozonganga kamaaze yenene okuvevatera, ku nao kave vanga okupangwa.

 Ouatjiri: Tu paha omapangero omasemba kweṱe oveni na komaṱunḓu wetu. Indu tji twa vere, tu yenda kozonganga nḓu maze yenene okutupanga nawa nokututaura okuhinokuungurisa ombinḓu. Nu tu nondangi komapangero nge yenda amaye ririre ko omawa. Omiano vyomapangero mbi ungurisiwa okupanga Ovahongonone va Jehova, nai vi ungurisiwa okuvatera ovandu ovengi. Momahi omengi, ovandu ve yenena okutoorora okuhinokupakerwa ombinḓu mena romaumba nge etwa i yombinḓu yomundu warwe, tjimuna omitjise mbi ri mombinḓu rukuru, oumba mbu ya indu ombinḓu yomundu warwe tji hi nokuhitasana nawa novirwise vyoye vyorutu, poo mena rokutira ozondataiziro ozonganga nḓu ze tjita.

 Omazuviro woposyo: Ovahongonone va Jehova ve kambura kutja ongamburiro yawo mai yenene okuverura omundu.

 Ouatjiri: Eṱe katu verukisa ovandu.

 Omazuviro woposyo: Omapangero nge ha ungurisa ombinḓu ye nondiru tjinene.

 Ouatjiri: Omapangero nge ha ungurisa ombinḓu kaye kosa ovimariva ovingi. a

 Omazuviro woposyo: Ovahongonone va Jehova ovengi, mu mamu kamburire mo ovanatje, ve ṱa ombura aihe mena rokupanḓa okupakerwa ombinḓu.

 Ouatjiri: Momaheya nga kamuna ouatjiri. Popengi ozonganga ze taura omatauriro omazeu nokuhinokuungurisa ombinḓu, tjimuna okutaura omutima, omaṱupa, nokutwa mo otjiṋepo kaaṋi okuza komundu umwe okutjitwa mo mu warwe. b Ovavere mu mamu kamburire mo ovanatje, mbe pangwa nokuhinokupakerwa ombinḓu ve veruka kombanda yaimba mbe pakerwa ombinḓu. c Kape notjiraisiro otjikahu tji tji raisa kutja omundu mape ya a ṱu indu tje hi na wa pakerwa ombinḓu poo a kara nomuinyo tja pakerwa ombinḓu.

 Ihi tji notjiṋa nongamburiro yetu mOmbeibela, nungwari katji notjiṋa nomapangero. Etestamente Ekuru na indi Epe ye tu rakiza oukahu kutja ngatu ritjevere kombinḓu. (Genesis 9:4; Levitikus 17:10; Deuteronomium 12:23; Oviungura 15:28, 29) Nu wina Mukuru u vara ombinḓu kutja i kuramena po omuinyo. (Levitikus 17:14) Ku nao eṱe katu ritjaere kombinḓu mena ronḓuviro yetu ku Mukuru uriri, posi ya tu tjita nao wina mokuraisa ondengero ku Mukuru otja ngu ri ombwiro yomuinyo.

 Oure woruveze orure, otjitamba tjomapangero aatji vara omundu ngu ma panḓa okupakerwa ombinḓu otjomukatuke woveta, poo nandarire otjomundu ngu me rizepa omuini orondu ma panḓa okupakerwa ombinḓu. Posi ya oumune wawo mbwo nai wa runduruka. Otjotjihorera, mo-2004 omupitise wozombuze morupa rwomapangero wa pitisa kutja, “oviungurisiwa ovingi mbi ungurisiwa okupanga Ovahongonone va Jehova, mavi utu okuungurisiwa okupanga ovandu varwe mozombura ndu maze ya.” d Mombura ndji 2010 orupa okuza membo ndi Heart, Lung and Circulation ra tja: “Omatauriro nge ha ungurisa ombinḓu kaye sokuungurisiwa i yOvahongonone va Jehova uriri, posi ya maye sokuungurisiwa aruhe momapangero.”

 Ozonganga omayovi omengi mouye auhe kaze ungurisa ombinḓu tji mave taura omatauriro omazeu, posi ya ze ungurisa omiano mbi tjita kutja ombinḓu ai ha moroka tjinene. Omiano vyomapangero mbi nandarire vi ungurisiwa momahi omasyona nu ovavere mbe he ri Ovahongonone va Jehova ve ningira kutja ve pangwe mokuungurisa omiano vyomapangero mbi.