Ovimariva mbi tu ungurisa koviungura vyetu tjinene vi za koviyandjewa vyouharupu mbi yandjwa i yOvahongonone va Jehova mouye auhe. a Potuveze twomaworonganeno wetu pe kara oukesa woviyandjewa vyouharupu, nu omuano warwe mbu mo yenene okuyandja oviyandjewa vyouharupu omorungovi rwetu ndwi jw.org, kehi yepu ndi oviyandjewa. Kehi yorupa ndwo, pe nomiano pekepeke omundu pu ma yenene okutoorora okuyandja oviyandjewa vyouharupu koviungura vyetu vyouye auhe, novihepwa vyombongo.

 Ovahongonone va Jehova kave undjirwa ko okuyandja otjitjamurongo, nu kape nomundu ngu ma yenene okuveraera kutja ve sokuyandja ovimariva mbi ṱeki pi. (2 Ovakorinte 9:7) Eṱe katu wongo ovimariva kovandu pozombongarero zetu zombongo, nu ovanene vetu vombongo kave kambura ovimariva kovandu indu tji mave papitisiwa, tji pe nonḓiro, omukandi, poo ovitjitwa vyarwe. Eṱe katu randisa ovikurya poo oviṋa vyarwe okumuna mo ovimariva, nu katu kara nomanyando wokuwonga ovimariva, poo oviṋa otja imbyo. Ondjivisiro yokutja ouṋe ngwa yandja oviyandjewa vyouharupu kai raerwa komundu warwe. (Mateus 6:2-4) Morungovi rwetu poo momambo wetu kamu kara ondjivisiro yokurandisira varwe ozongetjefa kokutja eṱe tu mune mo ovimariva.

 Omueze auhe ozombongo zOvahongonone va Jehova ze raerwa kutja ovimariva vingapi mbi va munu, nokutja vya ungurisiwa momuano uṋe. Ombwiko yombongo i tarewa oruveze aruhe okutara kutja oviyandjewa vyouharupu vya ungurisiwa momuano omusemba.—2 Ovakorinte 8:20, 21.

•   Oukesa wovimariva: Ove mo yenene okutwa mo ovimariva moukesa wovimariva mbu ri pOmatuwo wetu wOmerikotameneno, pOmaworonganeno wOrukondwa, poo potuveze twarwe eṱe pu tu woronganena.

•   Okuyandja oviyandjewa vyouharupu okupitira morungovi: Momahi omengi, ove mo yenene okuungurisa orupa ndwi “Donate to Jehovah’s Witnesses” nu wina mo yenene okuyandja oviyandjewa vyoye vyouharupu mokuungurisa oukarata wombaanga, poo mokuhinda ovimariva mombaanga nomihunga vyarwe vyomorungovi. b Omueze auhe Ovahongonone va Jehova tjiva ‘ve horeka otjimariva’ mokuungurisa umwe womiano vyokuyandja oviyandjewa vyouharupu mbi.—1 Ovakorinte 16:2.

•   Omiano vyarwe mbi mo yenene okuyandja: Omiano tjiva vyokuyandja oviyandjewa vyouharupu vi hepa okurongerisiwa rukuru, poo okuhungira ku nomundu ngu ma tjiwa ozoveta zehi ohunga noviṋa otja imbyo. Okutjita nao mape ya ku tjita kutja ove u yenene okumuna ondjambi yotjitjamurongo mehi roye. Ovandu ovengi va muna mo ouwa mozombwiko nḓu va tjita, indu tji va ri nomuinyo poo nḓu maze yenene okuyandjwa komundu woye indu tji wa ṱu. Arikana hakaena ku norutavi rwomberoo morukondwa rweṋu rwOvahongonone va Jehova indu tji mo vanga okuyandja oviyandjewa vyouharupu mbi mavi kamburire mo oviṋa otja imbi:

  •   ombwiko yombaanga

  •   ongwizikiro

  •   ouini poo ondjuwo

  •   stocks and bonds

  •   ombango yoye ohunga neṱa roye

 Kondjivisiro onyingi ohunga nomiano vyokuyandja oviyandjewa vyouharupu mbi ri momaturiro woye, tara korupa ndwi “Donate to Jehovah’s Witnesses.”