Ba Afrika Selatan, orang ke gawa meri sukung ngagai orang bengal meri terima kasih ngagai Saksi-Saksi Jehovah laban udah nyediaka video ti bekualiti dalam jaku Bengal-Bisu Afrika Selatan (SASL). Video tu ulih ngemanahka agi pengidup orang bengal. Jaku puji tu diberi pengudah bup Galatia enggau Epesus ari Bup Kudus Salin Dunya Baru dikeluarka dalam SASL kena 15 November 2021. Diatu bisi sepuluh iti bup mit ari Bup Kudus udah dikeluarka dalam SASL. Kena bulan April 2022, empat iti da agi bup mit deka dikeluarka. Semua bup tu ulih dipeda ba jw.org sereta dalam aplikasi JW Library Sign Language.

Minna Steyn, seiku pakar senentang pendidikan ke gawa ba perintah Western Cape madahka tu pasal Saksi-Saksi Jehovah: “Aku amat rindu meda sida ke dalam video tu, lalu deka meri puji ngagai sida sereta gerempung sida ke nyediaka video dalam jaku bengal-bisu ti amat bekualiti tu.”

Bongani Makama, presiden Gerempung Orang ke Timpang Pendiau ba Eswatini madahka: “Kami muji Saksi-Saksi Jehovah laban nyediaka utai ngagai orang ke bengal sereta orang ke tusah ninga.” Ku iya nampung: “[Orang bengal] patut bisi Bup Kudus dalam jaku sida empu. Tu kebuah kami deka muji Saksi-Saksi Jehovah laban nyalin Bup Kudus ke sida ke bengal dalam jaku sida empu. Kami enda sabar nganti maya semua 66 iti bup mit ari Bup Kudus tembu disalin.”

Kira-kira 450,000 iku orang ba Afrika Selatan ngena SASL. Bisi 283 iku penginjil ba Afrika Selatan ke bengal tauka tusah ka ninga. Ketegal usaha Saksi-Saksi Jehovah, “semua mensia” ulih belajarka pemendar, nyengkaum orang ke bengal ba menua ke dikemataka pampang opis Afrika Selatan.—1 Timoti 2:4.