Kena 7 Mac 2021, bala menyadi ba Afrika Selatan ke ngena jaku Kwangali, Sepulana enggau Setswana nerima siti pemeri ti berega. Nengah cheramah ti dirikut dulu, Menyadi Mark Sanderson ari Raban ti Ngiring ngeluarka Bup Kudus Salin Dunya Baru Jaku Gerika dalam bansa jaku Kwangali enggau Sepulana, sereta Bup Kudus Salin Dunya Baru ke diaduka baru dalam jaku Setswana. Bala penginjil ningaka program ti spesial tu nengah konferen video, lalu salin ke baru dikeluarka nya ulih didownload sida nengah fail digital.

Dalam urung dua taun, tiga iku penyalin gawa ba siti tim ngasilka salin Bup Kudus tu. Diatu, lebih ari 240 iku penginjil ke ngena bansa jaku tu bisi salin Bup Kudus ti senang dibacha, ke deka ngemanahka agi chara sida belajarka Bup Kudus sereta nginjil.

Enam iku penyalin gawa ba projek tu dalam timpuh setaun setengah. Bisi 374 iku penginjil ba Afrika Selatan ke ngena jaku Sepulana.

Seiku penyalin madah: “Suba, lebuh kami nginjil, kami ngena salin Bup Kudus dalam jaku Sepedi. Tang, sebedau kami ulih nerangka sesiti ayat Bup Kudus, kami patut dulu nyalin sekeda leka jaku ngagai orang nya. Tang diatu, ketegal ngena salin tu, kami macha sekali aja, lalu ajar nya terus tama dalam ati orang ke ninga.”

Enam iku penyalin gawa begulai ba projek ngaduka baru salin Bup Kudus dalam urung empat taun. Lebih ari 5,600 iku menyadi ngena bansa jaku Setswana lebuh nginjil.

Seiku penyalin madahka, Salin Dunya Baru dalam jaku Setswana “deka nulung bala penginjil ngemansangka pengelandik sida nginjil, ari ke kelalu kiruh nerangka leka jaku ti tusah dimereti ngagai peninga sida. Tu mega siti perengka belajar ti amat manah, laban charta, peta, gambar enggau penerang leka jaku nulung bala penginjil ngambarka utai ke nyadi dalam Bup Kudus.”

Semua salin Bup Kudus ti baru tu deka nulung bala menyadi kitai enggau orang alai sida nginjil, ngemuaska pengingin deka ngelala Petara. Kitai endang beterima kasih ke pemayuh tulung ba pengarap ke diterima kitai kemayaharitu.—Isaiah 65:13.