Kena taun 2022, Saksi-Saksi Jehovah udah bisi ba Albania pengelama 100 taun.

Nasho Idrizi nya seiku ari orang Albania ti keterubah nyadi Saksi Jehovah. Lebuh iya diau ba Amerika Serikat kira-kira taun 1920, iya belajarka Bup Kudus enggau Nembiak Bup Kudus Entarabansa. Maya nya, Saksi-Saksi Jehovah dikumbai Nembiak Bup Kudus Entarabansa.

Kena taun 1922, Nasho pulai baru ngagai Albania. Nyau kelama, orang Albania ke bukai, ke udah nyadi Nembiak Bup Kudus lebuh diau ba Amerika Serikat, pan pulai ke menua diri lalu bekunsika utai ke dipelajar sida enggau orang bukai.

Thanas Duli entara Nembiak Bup Kudus ti keterubah ba Albania. Iya ngenang: “Kena taun 1925 bisi tiga iti eklisia ba Albania. Bisi mega beberapa iku Nembiak Bup Kudus enggau orang ke bisi minat diau ngachir ba menua Albania.”

Maya nya suba, bisi beberapa iti litaricha ke disalin ngagai jaku Albania baka bup The Harp of God enggau A Desirable Government. Menara Jaga kena 1 Disember 1925 madahka: “Mayuh litaricha dalam jaku Albania udah disadung ngagai orang, lalu orang Albania diatu belajarka Bup Kudus enggau gaga ati.”

Orang mayuh berengkah ngangau bala Saksi ungjillorë, ke mai reti “penginjil” ketegal sida amat ransing nginjil. Nasho Dori ke dibaptisa kena taun 1930 ngenang: “Kena taun 1935 kami nyiwa sebuah bas kena nginjil ba kampung Këlcyrë. Pengudah nya kami ngatur deka nginjil ngagai endur bukai ba Albania nyengkaum kampung ba Përmet, Leskovik, Ersekë, Korçë, Pogradec, enggau Elbasan. Pejalai kami tembu lebuh sangkai ba Tirana lalu kami sempat ngintu pengawa Ngingatka Pemati Jesus ba dia.”

Kena taun 1939, perintah fasis ba Itali nguasa Albania lalu nagang Saksi-Saksi Jehovah. Ketegal bala menyadi kitai mengkang neutral lalu enggai beperang ba perang entara Greece enggau Itali, sida diperinsa. a Lebuh maya nya, bisi 15 iku menyadi lelaki dijil. Menyadi Nikodhim Shyti ditaban ngagai kem alai ngetan orang tangkap, tang pengudah nya iya enda ditemu agi.

Ba ujung Perang Dunya Kedua, kena taun 1944, Perintah Komunis nguasa Albania. Pengawa merinsaka bala menyadi kitai diteruska. Mayuh menyadi lelaki dijil sereta dijamah. Ke bukai ditaban ngagai kem pengawa berat jauh ari ruang bilik sida. Maya nya menua Albania dikelaungka ari menua bukai. Bup Taun Saksi-Saksi Jehovah 1959 madahka: “Taja bala pemerintah menua nyangka nguji nyeraraka bala menyadi kitai ba Albania ari gerempung Jehovah, tang sida enda ulih nagang roh kudus Petara ari nulung sida.” Kena taun 1967, ari ke bisi pengarap rasmi menua, Albania nyadi menua ti keterubah dikumbai menua ti nadai pechayaka Petara. Tang bisi seraban Saksi ke mit mengkang diau dia lalu terus bejalaika sembah sida enggau bejimat.

Nyau kelama perintah Komunis alah lalu Saksi-Saksi Jehovah direjista nitihka undang-undang kena 22 Mei 1992, lebih ari 50 taun pengudah sida keterubah iya ditagang.

Diatu bisi 5,550 iku Saksi ba Albania dalam 89 iti eklisia. Kitai sama gaga ati enggau bala menyadi ba dia, laban ‘jaku Jehovah balat amat ngelekai sereta mansang dalam kuasa’ taja pan sida balat disakal.—Surat Kereja Rasul 19:20.