Pengudah Taufan Dorian mangka mayuh pulau ba Bahama, ribut nya mega nyadi ba pesisir timur Amerika Serikat. Kena Hari Lima pagi, 6 September 2019, ribut tu mega bisi mansa Cape Hatteras, Carolina Utara, enggau pemalat kategori 1. Ketegal tu, rumah enggau mayuh endur bedagang ba menua nya kena ampuh bah. Pia mega, kena 7 September 2019, taufan tu ngujungka angin taufan ba Nova Scotia, Kanada.

Pampang opis Amerika Serikat madahka, bisi 1,742 iku penginjil ba mayuh pulau Bahama, lalu bisi seiku menyadi indu telih. Nambahka nya, bisi 48 buah rumah menyadi kitai rusak enggau 8 buah rumah abis rusak.

Mayuh ari penginjil ke diau ba Pulau Great Abaco dipindahka ngagai Nassau, indu menua Bahama. Bala menyadi ba endur nya ngelaluka sida enggau gaga ati.

Komiti Tulung Pengerusak Alam enggau tuai ti ngabas ba endur nya ngatur bantu ke diguna, sereta meransang semua penginjil ke kena penusah tu. Bala menyadi ari pampang opis Amerika Serikat mega datai nulung sereta meransang raban eklisia ba endur nya.

Ba Amerika Serikat, penusah tu mega diasaika ba Carolina Utara enggau Carolina Selatan. Nadai menyadi kitai pedis, tang bisi 737 ari sida dipindahka ngagai endur ti likun. Mayuh ari sida empai ulih pulai ke rumah diatu. Kelimpah ari nya, 50 buah rumah enggau 12 buah Palan Gempuru mega bisi rusak.

Nitihka riput ari Kanada, nadai menyadi kitai pedis ketegal penusah tu. Tang, ba endur nya nadai karan. Pia mega, bisi rumah menyadi kitai mimit rusak ketegal penusah tu. Bala menyadi ari eklisia bukai sama bela nulung pangan diri.

Kitai amat beterima kasih laban Jehovah ‘ninga sabak minta tulung’ bala menyadi ke seruran andalka Iya ngelamatu.—Masmur 28:6.