Mike Iwuchukwu tedinga anak indu iya Melody, ke beumur enam taun, nurun tangga ari tingkat atas. Ninting hari, lebuh Melody bisi kelas online, iya ngetu tengah hari kena makai. Mike mansang ngagai iya, nyangka deka meda Melody makai sandwich tauka main enggau ayam iya. Tang utai ke dipeda iya ngalitka ati iya.

Mike nerangka: “Iya muka laptop iya enggau bup Utai ke Ulih Dipelajar Nuan Ari Bup Kudus. Bisi tiga iku kaban sekula mendingka iya. Melody malik lalu madahka aku: ‘Aba, aku benung ngajar Bup Kudus!’”

Kenyau ari September 2020 lebuh sekula iya ba Texas, Amerika Serikat, berengkah bejalaika kelas nengah online ketegal pengelekai COVID-19, Melody netapka juluk ati ka berengkah ngajar orang Bup Kudus. Nya alai, iya besampi ngagai Jehovah pasal pengeran iya, sereta ngiga peluang ngepunka pelajar Bup Kudus.

Apai iya Mike enggau indai iya Octavia amat temegah ati ke anak indu seduai iya. Mike nampung: “Melody seruran bejaku enggau bala kaban sekula iya pasal Jehovah. Tang lebuh mata aku empu meda Melody amat amat ngajar Bup Kudus ngagai sida, nya amat negu ati kami duai indai iya.”

Melody terus ngajar bala kaban sekula iya enggau tetap. Iya nerangka: “Naka ke diatu, aku udah ngajar sida pasal dunya Paradais sereta pasal Jesus. Aku arap sida nyadi Saksi-Saksi Jehovah!”

Samuel Molnar nya seiku anak mit ke beumur semilan taun ari Ilinois, Amerika Serikat. Iya mega bekunsika utai ke dipechaya diri enggau orang bukai.

Pengudah Samuel ningaka peneleba seiku menyadi ke nginjil ngagai orang ke diau sepiak rumah iya, tu meransang iya nguji chara ti sama. Lebuh Samuel meda uchu orang sepiak rumah benung main ba belakang rumah, iya nanya anak mit nya enti iya deka ninga pasal Paradais. Anak mit nya madahka diri deka, nyadi Samuel belanda ke dalam rumah iya lalu ngambi bup My Book of Bible Stories.

Samuel nerangka: “Aku madahka iya, jemah ila iya ulih main enggau sebarang jelu tang enda takut diri dikemediska jelu nya. Udah nya, aku macha ke iya cherita Daniel ke dibuai dalam lubang singa.”

Tang Samuel ukai bejaku aja. Iya mega ngirum surat ngagai anak mit nya, madahka iya pasal pengawa ke anak mit enggau video ke bisi ba jw.org. Seduai iya ngaga semaya ka begulai macha cherita Bup Kudus bukai lebuh betemu baru ila.

Samuel amat gagit ati ketegal peneleba iya tu, lalu iya benung bekereja ngambika nyapai juluk ati iya ti baru. Ku iya nerangka: “Aku deka ngelala tiap iti surat mit dalam Perengka Kena Ngajar ngambika aku ulih bekunsika nya enggau orang bukai.”

Tiga iku menyadi indu ba Texas baru udah nyapai juluk ati sida empu, iya nya, deka nyadi pengerintis sukung maya chuti sekula musin angat.

Dalam bulan Ogos, Joselyn Horta ke beumur 13 taun, Melanie Alvarez ke beumur 12 taun enggau Chloe Rodriquez ke beumur 10 taun begulai nuliska surat nengah video call. Sida kekadang betemu lima kali seminggu, indah sida berengkah nginjil ari pukul 7 pagi.

Joselyn nerangka: “Keterubah, kami berandau sereta makai begulai. Udah nya, kami berengkah nulis surat ari pukul 7:30 pagi.” Kekadang, seiku entara sida laun dani. Tang dua iku ke bukai nya enggau manah ati ngerak iya enggau siti mesej munyi tu: “Selamat pagi! Dani meh! Aram nginjil!”

Sida tiga iku menyadi indu ukai semina meransang pangan diri, tang pia mega, teladan sida pan meransang bala kaban enggau diri sebilik. Alicia, indai Joselyn, madahka: “Kekadang, aku nadai ati ka enggau pengawa nginjil. Tang lebuh aku meda Joselyn dia, lalu iya udah berengkah video call enggau kaban iya, aku berunding, ‘Aku pan ka enggau pengawa nginjil!’”

Ati Jehovah penuh enggau pengaga lebuh iya meda semua bala nembiak ke tetap ati enggau naka ulih nginjil taja pan sida napi penekul ketegal penusah COVID-19.—Jaku Dalam 27:11.