Kena 25 September 2021, Bup Kudus—Bup Injil Matthew ba bansa jaku Hmong dikeluarka dalam fail bansa digital. Menyadi Geoffrey Jackson, seiku ari Raban ti Ngiring, ngeluarka bup ti mit nengah gempuru ti spesial ke dipandangka ba online ngagai lebih ari 2,500 iku orang ba serata dunya.

Tu bup mit ti keterubah ari Bup Kudus Salin Dunya Baru ke dikeluarka ba jaku Hmong. Bansa jaku Hmong dikena lebih ari 3.9 juta iku orang di serata dunya. a Ari suba, orang bansa Hmong pechayaka manang sereta nyembah jelu tauka utai ti idup.

Pengudah taun 1970 mayuh orang bansa Hmong ngerarika diri ngagai kem pelari ba Thailand. Nyau kelama sekeda orang ke ngerarika diri tu diasuh pindah ngagai menua Barat; lalu mayuh ari sida dipindahka ngagai Amerika Serikat.

Kemayaharitu, mayuh ari orang bansa Hmong ba Amerika Serikat diau ba California, Minnesota, enggau Wisconsin. Saksi-Saksi Jehovah berengkah nyalin bup ngagai bansa jaku Hmong kena taun 2007. Kena taun 2012, opis penyalin didirika ba Sacramento, California.

Tim penyalin nembuka bup Matthew ba urung tiga bulan. Sida ditulung seraban orang ari lima iti menua ti bebida kena macha sereta betukar penemu enggau penyalin nya.

Tim penyalin tu patut mutarka siti penanggul ti unik ba projek tu. Sebedau 1950-an, jaku Hmong nadai kala ditulis orang, lalu taja pan jaku tu udah ditulis, tang chara nyepil sereta ni maya meri urup besai enda ditetapka.

Salin Bup Kudus ti keterubah ba bansa jaku tu bisi ba taun 1980-an. Tang mayuh orang bansa Hmong enda ulih meli Bup Kudus laban kelalu mar. Nambahka nya, Bup Kudus tu ngembuan salin ti salah lalu mayuh orang enda mereti Bup Kudus tu. Ngambika chunto, siti salin Bup Kudus nukar nama Petara, Jehovah, ngagai seiku watak ari ensera orang bansa Hmong.

Seiku penyalin madahka: “Diatu, ketegal bisi Bup Kudus Salin Dunya Baru dalam bansa jaku Hmong, orang ke lurus ati ulih macha nama Jehovah ba dalam salin Bup Kudus sida empu lalu ulih nyadi pangan iya. Tu meh utai ke dianti sereta disampi kami dalam betaun-taun ti udah.”

Bala pemacha madahka diri beterima kasih ke salin ti bekualiti tu. Seiku pemacha madahka: “Maya aku macha bup Matthew dalam bansa jaku Hmong aku amat alit ati. Aku berunding: ‘Baka ni salin tu ulih amat negu ati aku?’ Enggau jampat aku ulih ngambarka cherita ke benung dibacha aku.”

Bup Matthew dalam bansa jaku Hmong ke baru dikeluarka tu ngingatka kitai pasal Petara ti enda bepilih mata, deka nentuka jaku Iya ulih dibacha semua orang ke ngiga Iya.—Surat Kereja Rasul 10:34, 35.