Bengunan baru benung didirika ba Palan Belajar Menara Jaga ba Patterson, New York, Amerika Serikat. Pemesai bengunan nya, 2,787 meter persegi (30,000 kaki persegi) lalu bisi dua tingkat. Kitai nyangka bengunan nya deka tembu ba tengah taun 2023. Dalam bengunan tu bisi siti muzium ke ngundan tiga iti begian ke enda berubah, lalu siti begian ke ulih diubah. Ila, 1,200 orang ulih ngelawa ninting hari. Tambah mega, mayuh bengunan ke lama diaduka baru, lalu perengka ba bengunan nya diganti. Pengawa tu udah 40 peratus tembu.

Bala menyadi ke ngatur projek tu napi mayuh penanggul ketegal pandemik COVID-19. Ketegal tusah deka ngulihka perengka kena ngaduka bengunan maya pandemik COVID-19, pengawa tu nyau deka diketuka. Ngambika chunto, lebuh sida deka ngaga lantai ke begunaka semin, semin tusah diulih maya nya. Tang bala menyadi mujur ngulihka semin ti chukup kena nembuka pengawa nya ba maya ti patut. Pia mega, taja pan rega besi nyadi amat mar, tang bala menyadi ulih meli besi nya enggau rega ti manah laban sida udah dulu nyain kontrak.

Maya lockdown ba Betel mayuh sukarela gawa ari apartment sida. Enggau tu, pengawa ngaga pelan enda tetangguh. Dalam siti timpuh, bala menyadi enda ulih betemu enggau pegawai perintah ketegal sekat COVID-19. Tu ulih ngasuh pengawa nya lubah tembu. Tang, komiti projek nya bekerejasama enggau begian Betel ke bukai sereta pegawai perintah. Enggau tulung bala volunteer luar Betel sereta konferen video, sida bulih pemendar ba maya ti ngena.

Atur pasal kuarantin diubah, lalu tu ngasuh sukarela ke baru enda ulih nulung ba pengawa tu. Tang, dalam urung bulan September 2020, sukarela penuh jam ke baru dikangau lalu nulung ba projek nya.

Menyadi Jennifer Paul mega dikangau gawa ba projek tu maya pandemik. Iya madahka tu pasal pengawa nirika bengunan: “Aku rindu kereja berat. Aku ukai semina rinduka kereja tu, tang orang ba ditu. Aku ulih meda gerempung Jehovah ngereja semua utai nitihka iring Jehovah.”

Diatu bisi 440 iku sukarela ke nulung ba projek tu. Tu nyengkaum kira-kira 350 iku sukarela ke gawa ba Patterson. Bala menyadi ulih meda Jehovah nyediaka semua utai ke diguna sida ba projek tu.—1 Bansa Israel 29:16.