Dalam beberapa bulan tu, penusah angus majak nyadi ba California, Amerika Serikat. Enti dikira semua penyampau nya, pemesai endur ke kena penusah tu dalam urung 362 kilometer persegi, nyentukka nyauka semua endur ulih dipeda angus.

Nitihka riput pampang opis Amerika Serikat, lebih ari 1,700 iku bala menyadi ke datai ari mayuh endur patut dipindahka ngagai endur ti likun. Ke diatu, nadai riput ti madahka bisi orang bakal tauka bebadi. Tang sebuah rumah menyadi kitai ba Calimesa abis diempa api ke nyadi ba Sandalwood Fire. Penusah tu udah nyadi kenyau ari 10 Oktober 2019. Beberapa buah rumah ke bukai mega bisi mimit rusak ketegal asap ke datai ari api. Tang nyentukka seharitu, nyauka semua bala menyadi kitai ke dipindahka ulih diasuh pulai.

Seiku tuai gempuru ba menua nya madahka, “Maya penusah ke baka tu nyadi, amat beguna kitai nitihka iring. Bala menyadi kitai enggau jampat mindahka kami ari endur ti ngemediska. Ketegal tu, bala bomba senang agi beberatka ba pengawa madamka api, ari ke begigaka mensia.”

Bala tuai ti ngabas sereta tuai gempuru, ba menua nya terus ngatur bantu ke diguna ngagai semua mansa. Bala penginjil ke semak endur nya mega sama bela meri tulung ke diguna. Pengerindu, pengibuh, sereta pengerah ati sida amat ulih dipeda. Seiku tuai ti ngabas mega nyebut pasal penalam pengerindu Kristian tu. Iya madah, “Kami nadai penanggul ngiga endur diau ke bala menyadi ti kena penusah tu.”

Kitai amat beterima kasih ngagai Jehovah, laban bala menyadi deka “ngelantangka ati” bala menyadi ke bukai ti ditinggang penusah.—Kolosi 4:11.