Ribut Dorian nyadi ba mayuh pulau Bahama, kena 1 Septembe nyentukka 3 September 2019. Indah, sebedau ribut nya datai, pampang opis Amerika Serikat udah nyediaka bantu ti patut ari Florida, Amerika Serikat. Pengudah gaya hari nya baik agi, bala menyadi sanggup nyiwa kapal sereta bilun, ngambika ulih meri bantu kin. Sida meh orang keterubah ke datai meri bantu.

Tiga belas iku bala menyadi ngena bilun, terebai lebih ari 300 kali ngagai mayuh endur. Sida nganjung 15 tan bantu ke patut, sereta lebih ari 700 iku sukarela. Kelimpah ari nya, nyauka 90 tan bantu ke patut dianjung nengah 13 buah kapal menyadi kitai. Penyauh endur ke deka dituju tu, dalam urung 12 jam.

Jose Cabrera, manager ba Palm Beach International Airport di Florida madahka, “Pengudah ribut tu ngetu, bilun ke dikena sida dipenuhka enggau semua bantu ke diguna. Tulung ari sida lebih ari ke dijangka.”

Seiku ari sukarela ke deriba bilun nya, Menyadi Glenn Sanders. Ku iya, “Mayuh ari kami, tu meh keterubah iya kami amat ulih nulung bala menyadi. Kami amat puas ati, laban kami baka siti raban ti mit, lalu ulih nulung bala menyadi bukai ke benung napi pemerinsa.”—1 Korint 12:26.

Pampang opis Amerika Serikat nyangka, ungkus ke dikena meri bantu ba penusah tu dalam urung 1,750,000 dolar Amerika Serikat. Lalu projek tu deka tembu kena 1 Mei 2020.