Ba Hari Minggu, kena 21 November 2021, Menyadi Eric Raffaeli, seiku ari Komiti Pampang Opis Angola ngeluarka Bup Kudus Salin Dunya Baru Begian Sempekat Baru ba bansa jaku Kimbundu ngena fail bansa digital. Edisi ke dichelak deka disediaka ba taun 2022. Program nya dirikut dulu lalu dipandangka ngagai kira-kira 11,000 iku orang.

Dalam urung taun 1920, perintah Portugal nagang jaku Kimbundu enggau bansa jaku Afrika ke bukai ari dikena ba sekula. Tang kemayaharitu, bisi 1.7 juta iku orang ba Angola, nyengkaum indu nengeri iya ba Luanda, ngena bansa jaku Kimbundu. Jaku Kimbundu nya entara jaku ti pemadu mayuh dikena ba menua nya.

Litaricha Saksi-Saksi Jehovah udah disediaka ba bansa jaku Kimbundu kenyau ari pun taun 1990-an. Tang eklisia ti keterubah ke ngena bansa jaku Kimbundu bedau bisi nyentukka taun 2008. Diatu, bisi 2,614 iku penginjil ba 55 buah eklisia ke ngena bansa jaku Kimbundu.

Mayuh pemacha ngasaika salin Bup Kudus ti baru tu senang agi dimereti ari salin ke udah bisi sebedau tu. Ambika chunto, ba salin ke suba, Matthew 5:3 madahka: “Beberekat meh orang ke seranta dalam roh.” Salin Dunya Baru nyalin ayat tu enggau: “Gaga ati meh orang ke nemu diri begunaka Petara.”

Seiku penyalin madahka: “Aku pechaya Bup Kudus tu siti berekat ngagai bala menyadi ke ngena bansa jaku Kimbundu. Sida ulih ngena Bup Kudus tu lebuh sida belajarka Bup Kudus kediri empu sereta ba pengawa nginjil. Lalu Bup Kudus tu mega ulih nulung sida nyemakka diri ngagai Jehovah. Tu siti basa ti besai ngagai aku ulih nulung ba projek tu. Tu amat terang nunjukka pengerindu Jehovah.”

Kitai nemu Bup Kudus dalam bansa jaku Kimbundu tu deka nulung bala menyadi nginjil ngagai sida ke deka nemu ‘penemu pasal . . . Perintah Petara.’—Luke 8:10.