Kena 16 Januari 2021, Bup Kudus Salin Dunya Baru dikeluarka dalam bansa jaku Umbundu nengah fail bansa elektronik. Seiku ari Komiti Pampang Opis Angola, iya nya Menyadi Genésio Verdiano, ngenataika cheramah ngeluarka Bup Kudus, lalu video nya dipandangka terus ngagai tiap iti eklisia ke ngena bansa jaku Umbundu di serata menua Angola.

Jaku Umbundu nya bansa jaku kedua pemadu mayuh dikena ba menua Angola, lalu kira-kira tujuh juta iku orang ngena bansa jaku tu. Dia bisi lebih ari 6,500 iku penginjil ke ngena jaku Umbundu.

Enam iku penyalin gawa ba dua iti tim dalam timpuh lima taun kena nembuka projek tu. Seiku ati bala penyalin madahka: “Salin ti baru tu ulih ngasuh cherita Bup Kudus baka ke idup ba runding bala pemacha. Tu ketegal jaku ke dikena ba salin tu senang ditemu. Salin tu mega deka ngenyenangka pengawa bala penginjil ke ngajar Bup Kudus ngagai orang bukai.”

Seiku ari Komiti Pampang Opis nerangka: “Kitai nemu, lebuh seseiku orang macha Bup Kudus dalam bansa jaku diri empu, iya ulih mereti agi pemendar nya. Kitai alit ati meda chara Jehovah negu ati mayuh orang ke ngena jaku Umbundu nengah salin Bup Kudus tu.”—2 Tesalonika 3:1.