Kena 24 September 2019, ba gempuru ti spesial di Angola, Saksi-Saksi Jehovah ngeluarka Bup Kudus Salin Dunya Baru dalam bansa jaku Kikongo.

Semua eklisia ke ngena bansa jaku tu, dikangauka magang. Pengawa tu diatur ba Palan Gempuru Besai di Viana, Angola. Menyadi Matthew Steggel, Komiti Pampang Opis Angola dipinta ngeluarka Bup Kudus ke baru tu. Penyampau orang ke datai bisi 2,053 iku.

Bup Kudus tu begunaka tujuh taun disalin. Sebedau Bup Kudus tu, bala menyadi kitai ngena Salin Dunya Baru dalam bansa jaku Portugis. Bisi mega ngena Bup Kudus Kikongo ke bukai, tang rega Bup Kudus nya amat mar sereta enda senang diulih.

Tang ketegal Salin Dunya Baru tu udah dikeluarka, mayuh ari menyadi kitai keterubah iya ngembuan Bup Kudus kediri empu dalam bansa jaku sida. Seiku ari penyalin madahka, “Ketegal bisi Salin Dunya Baru tu, bala menyadi ulih nemu agi reti dalam Bup Kudus, sereta ulih ngajar Bup Kudus enggau terang agi.”

Ba Angola, bisi 1,524 iku penginjil ke ba eklisia dalam bansa jaku Kikongo, lalu dalam urung dua juta iku orang ngena bansa jaku nya.

Kitai amat andal, Salin Dunya Baru tu deka meri penguntung ngagai bala menyadi ke ngena bansa jaku Kikongo. Laban sida endang deka nitihka Jaku Petara ba pengidup enggau pengabis ati.—Masmur 119:34.