Sepemanjai sejarah Australia, taun nyin tadi, taun ti pemadu angat sereta rangkai. Tu ngasuh utan angus ke nyadi ba menua nya majak balat. Kenyau ari September 2019, pengangus majak nyadi ba tiap iti endur di Australia. Taja pan penusah angus tu baru berengkah, tang penusah tu udah ulih dikumbai balat. Endur ke pemadu balat kena penusah tu ba Victoria and New South Wales.

Ke diatu, nadai riput ti madahka bala menyadi kitai bakal tauka bebadi ketegal penusah tu. Tang, mayuh ari sida rugi ketegal rumah sereta bengunan endur sida diau abis diempa api. Entara iya, bisi semilan buah rumah abis rusak ketegal angus. Nyentukka diatu, lebih ari 700 iku menyadi kitai patut dipindahka ngagai endur ti likun agi. Mayuh ruang bilik Saksi patut mindahka diri, ketegal enda tan enggau asap ti tebal. Asap ti tebal tu ulih ngachau pengerai mayuh orang. Mayuh ari Saksi pindah ngagai kaban belayan, bala kaban, tauka penginjil bukai ari eklisia ke semak, ti baik agi ari endur ke balat nya.

Pampang opis Australasia ngatur dua iti Komiti Tulung Pengerusak Alam, meri bantu ngagai bala menyadi kitai ke ditinggang penusah tu. Dua iku tuai ti ngabas, enggau beberapa iku Komiti Pampang Opis datai meransang bala menyadi kitai. Mayuh ari bala menyadi kitai ke ditinggang penusah tu udah lelak. Sida lelak ba tubuh sereta emosi. Tang sida amat beterima kasih, laban ulih ngasaika pengerindu ti bendar ari bala menyadi Kristian sida.—1 Peter 2:17.