Kena 15 Disember 2020, Komiti Hak Mensia ari PBB ngaga pemutus ba dua iti kes pasal Saksi-Saksi Jehovah ba Azerbaijan, lalu pemutus sida nya bepiak enggau sida ke Saksi. Dua iti kes nya dikumbai Rahima Huseynova vs Azerbaijan; sereta Saladdin Mammadov, Rashad Niftaliyev enggau Sadagat Abbasova vs Azerbaijan. Ba dua-dua kes, Komiti nya mutuska perintah Azerbaijan udah ngelanggar hak Saksi-Saksi Jehovah lalu pan ngasuh perintah Azerbaijan ngubah undang-undang menua ngambika ulih nentuka hak Saksi-Saksi Jehovah enda dikachau baru ila.

Kes ke dikumbai Rahima Huseynova vs Azerbaijan nya pasal utai ke nyadi ba nengeri Baku kena bulan Disember 2014. Piak polis nangkap lalu ngejil Menyadi indu Rahima Huseynova ketegal iya bejaku enggau orang bukai pasal utai ke dipechaya diri. Pengudah nya, kot pelilih menua ngasuh iya mayar saman enggau rega 1,500 Manat Azerbaijan (iya nya $882 U.S. tauka RM3,563) laban maya nya, gerempung Saksi-Saksi Jehovah enda direjista ba nengeri Baku. a Lebuh Menyadi Rahima ngapil pemutus tu, Kot Apil pan setuju enggau pemutus ke kala diberi kot ke bukai nya. Nya alai, Rahima minta kot entarabansa bepecharaka kes tu.

Komiti Ngetanka Hak Mensia PBB mutuska perintah Azerbaijan udah ngelanggar undang-undang Artikel 18 (1) ari International Covenant on Civil and Political Rights (ICCPR). Komiti nya ngasuh perintah Azeribaijan mayar ganti rugi ngagai Menyadi Rahima. Pia mega, Komiti nya madahka perintah Azerbaijan “enda tau enda nentuka utai ke baka tu enda nyadi baru ila. Reti iya, perintah Azerbaijan engka patut ngubah sekeda undang-undang menua, tauka adat ba menua nya, ngambika piak ti bekuasa ulih ngetanka hak mensia ke ditulis ba Artikel 18 dalam ICCPR.”

Kes ke dikumbai Saladdin Mammadov, Rashad Niftaliyev enggau Sadagat Abbasova vs Azerbaijan nya pasal seraban menyadi lelaki enggau menyadi indu ke begempuru di rumah Menyadi Saladdin Mammadov ba nengeri Ganja kena belajarka Bup Kudus. Kena Oktober 2014, bala polis nyerebu lalu nyelungkai rumah alai gempuru nya dipejalaika lalu ngerampas Bup Kudus enggau barang ke bukai. Menyadi lelaki Saladdin, Menyadi lelaki Rashad Niftaliyev enggau Menyadi indu Sadagat Abbasova bela ditaban ke balai polis lalu ditan dia pengelama lebih enam jam. Dua hari udah bekau nya, sida dikangau ke Kot Pelilih Nizami di Nengeri Ganja. Ketegal raban orang ke begempuru sehari nya ukai sebagi ari gerempung ke direjista ba Ganja, kot tu mutuska utai ke digaga sida nya ulih dikumbai pengawa jenayah. Genap iku sida diasuh mayar saman enggau penyampau 2,000 Manat Azerbaijan ($1,176 U.S. tauka RM4,767). Sida tiga iku ngapil pemutus nya, tang sayau amat, Kot Apil Ganja nulak apil sida. Pengudah nya, sida ngapil ngagai Komiti Hak Mensia ari PBB.

Komiti nya mutuska perintah Azerbaijan udah ngelanggar beberapa iti undang-undang ari sempekat ICCPR, lalu ngasuh perintah menua mayar ganti rugi ngagai sida tiga iku Saksi. Sebagi ari jaku gerah ke dikeluarka Komiti nya madah, “Kot Pelilih enda nerangka kebuah sida Saksi patut dulu ngerejista gerempung sida sebedau dikemendarka begulai nyembah dalam rumah seseiku orang.” Jaku gerah nya mai asil ti berat, iya nya, tu nunjukka menyadi kitai ba Azerbaijan enda ibuh ngerejista gerempung enti deka begulai begempuru.

Sebaka enggau kes Rahima Huseynova nya tadi, Komiti pan ngasuh perintah Azerbaijan ngubah sekeda “undang-undang menua, tauka adat ba menua,” ngambika hak mensia, baka ke ditulis dalam sempekat ICCPR, dijaga.

Baik meh udah bisi ubah ti manah ba Azerbaijan, lalu dalam beberapa taun ti udah, piak ti bekuasa enda ngachau hak menyadi kitai besembah ba menua nya. Arapka dua-dua pemutus tu deka nentuka, hak menyadi kitai ke ngerembaika Berita Manah di Azerbaijan deka dijaga.—Pilipi 1:7.