Kena 26 nyentukka 28 Julai 2019, Saksi-Saksi Jehovah ngaga atur konvensyen ninting taun ba Darnagul Ceremony House di Baku, indu nengeri Azerbaijan. Ba musin konvensyen entarabansa taun tu, pan bisi konvensyen pelilih menua ba Baku. Tu pengawa ti besejarah ba Azerbaijan. Laban tu meh gempuru ti pemadu besai ke kala nyadi ba dia. Lalu tu mega keterubah iya eklisia bansa jaku Azerbaijan enggau Rusia, di nengeri tu begulai ba konvensyen.

Taja pan semina 1,500 iku penginjil ba Azerbaijan, tang bisi 1,938 iku orang datai maya konvensyen tu. Lalu bisi 33 iku orang dibaptisa. Menyadi Mark Sanderson minta pemendar ari perintah ngambi ulih meri cheramah maya konvensyen tu. Tu mega keterubah iya Raban ti Ngiring datai ngagai konvensyen ba Azerbaijan. Kitai amat beterima kasih laban pemerintah menua nya meri pemendar ngagai kitai.

Penyerakup ke diayanka bala menyadi meri saksi ti manah pasal kitai. Orang ke bekuasa ba endur kitai konvensyen nya madahka, sepemanjai konvensyen tu, iya ulih meda pemaik, pengerindu, enggau pemanah ke diayanka ba entara Saksi, lalu ulih meda sida amat ngereja utai ke diajar sida.

Taja pan bala Saksi ba Azerbaijan bisi penyakal ba pengarap sida, tang diatu pemerintah ba menua nya udah berengkah meri mayuh pengelepas ngagai bala menyadi kitai. Kena November 2018, pemerintah ba Baku udah meri pemendar ngagai Saksi-Saksi Jehovah. Ketegal tu, bala menyadi kitai ulih dijaga ba undang-undang, lalu sida mega ulih bibas agi ba pengarap di menua nya.

Kitai amat gaga ati ke bala menyadi kitai ba Azerbaijan, nyengkaum pengawa ti besejarah ke nyadi ba menua nya empai lama ti udah. Kitai besampi ngambi Jehovah terus merekat pengawa kitai, “bejaku ngarika sereta netapka pengamat Berita Manah” ba Azerbaijan sereta serata dunya.—Philippians 1:7.