Kena 24 September 2020, European Court of Human Rights (ECHR) meri pemutus ti nyukung Saksi-Saksi Jehovah ba Azerbaijan dalam dua iti kes. Kes kesatu nya entara Valiyev and Others vs Azerbaijan lalu kes kedua nya entara Religious Community of Jehovah’s Witnesses vs Azerbaijan. Ketegal kedua-dua pemutus tu, hak bala Saksi ke deka bejalaika pengawa sembah sida ba menua Azerbaijan deka dijaga.

Ba dua-dua kes nya, menua Azerbaijan empu ngaku sida udah besalah, lalu nitihka undang-undang menua, sida udah ngelanggar hak bala Saksi. Perintah Azerbaijan mega besetuju deka mayar ganti rugi kena nutup rega pengerugi bala Saksi enggau penyampau 19,000 euros (iya nya $22,146 U.S. tauka RM 92,905). Pemutus ke digaga kot ECHR nya, nunjukka kot tu nerima sereta setuju enggau utai ke diaku perintah Azerbaijan ba kes tu.

Kes ke dikumbai Valiyev and Others vs Azerbaijan nya dibai ngagai ECHR kena taun 2011. Kes nya bekaul enggau menyadi kitai ba nengeri Ganja. Pengelama betaun-taun, piak ti bekuasa ba nengeri Ganja enggai ngerejista gerempung Saksi-Saksi Jehovah. Ketegal tu, bala polis suah datai ngenyit lebuh gempuru benung nyadi, nangkap genap iku orang ke bisi enggau gempuru, lalu meri sida saman ti besai. Seiku menyadi lelaki mayuh kali dipechara sereta diukum mayar saman. Pengujung iya, iya mayar penyampau duit 9,450 Azerbaijani Manats (ba maya nya dalam urung $11,375 U.S tauka RM 23,043). Nyau kelama, sekeda bala menyadi kitai ditangkap ketegal sida nyau nadai agi duit endur mayar saman ti kelalu besai nya.

Kena taun 2013, bala menyadi kitai ba Azerbaijan ngaga siti da agi kes ba ECHR ke dikumbai Religious Community of Jehovah’s Witnesses vs Azerbaijan. Kes tu pasal perintah menua ti nagang pemayuh litaricha kitai ari tama dalam menua Azerbaijan.

Taja pan Saksi-Saksi Jehovah ba Ganja agi bedau dikemendarka ngerejista gerempung, tang gaya pengidup sida berinsur manah. Dalam beberapa taun ti udah, bala menyadi kitai ulih begempuru enggau raban mit ba rumah menyadi lalu enda dikachau tauka diketuka polis. Pia mega, litaricha Kristian ke diimport ngagai menua nya patut diperesa perintah dulu sebedau nya dikemendarka tama. Taja pia, perintah menua udah ngemendarka menyadi kitai nerima litaricha enggau umbas.

Menyadi Kiril Stepanov, ke gawa ba Begian Penerang ke Orang Mayuh di Azerbaijan madahka: “Kami arapka pemutus ti baru tu ari ECHR deka nulung kami ngerejista gerempung kitai ba Ganja sereta ba nengeri bukai di Azerbaijan. Pia mega, kami arap ila lebuh kami import litaricha, nya enda ibuh diperesa perintah menua dulu sebedau dikemendarka tama menua tu.”

Kitai beterima kasih ngagai Jehovah laban nyukung nembiak Iya. Pemutus ti manah ari kot ke baka tu nyadika bukti ‘nadai senyata ti digaga ulih ngemediska nembiak Petara’—Isaiah 54:17.