Kena 30 Ogos nyentukka 8 September 2019, Saksi-Saksi Jehovah bisi begian mandangka kad kitai ba International Book Biennial of Rio de Janeiro ke-19, ti diatur ba Riocentro Convention and Event Center. Pengawa tu pengawa ti pemadu besai ba Brazil, laban ngembuan 520 iti kad dipandangka, lalu diabas dalam urung 600,000 iku orang. Kad jw.org tu narit ati orang ke meda ngelawa laman web kitai, lalu meda mayuh bengkah litaricha udah disediaka ti diambi ari Bup Kudus. Sepemanjai sepuluh hari, dalam 258 iku bala menyadi kitai ke enggau pengawa tu udah nyadung 3,737 iti litaricha.

Ba kad kitai tu mega bisi begian ti spesial ke orang bengal bisu sereta orang ke buta. Bala menyadi ngayanka video ngena bansa jaku Bengal Bisu Brazil. Pia mega, penginjil ke nemu ngena bansa jaku bengal bisu ngabas orang ke bisi minat. Seiku ari sukarela madahka, “Orang ke datai semak kad kitai berasai nyamai berandau enggau kami, lalu sida enda malu. Seruran bisi orang ke sukarela nerang pasal kad sereta chara belajarka Bup Kudus.”

Bisi sekali, seiku pengajar mai tujuh iku orang ke bengal bisu ngagai kad kitai. Iya amat rindu meda litaricha ke bala nembiak dalam bansa jaku bengal bisu ba jw.org. Apai indai selalu minta tulung chara nerangka sekeda topik ti pedis diterangka ngagai anak sida ke bengal bisu. Pengajar tu madahka, iya deka madahka apai indai ke bukai pasal laman web kitai.

Kad tu mega ngembuan sekeda bansa jaku ba menua nya empu baka, Guarani, Ticuna, enggau Xavante. Lalu semua litaricha tu udah bisi ba jw.org. Ricardo Carneiro, iya nya pengari Saksi-Saksi Jehovah madahka, “Kami deka orang ba menua tu meretika Bup Kudus ngena bansa jaku sida empu.”

Pengawa mandangka ba International Book Biennial mai orang Brazil macha ngambika pengidup sida manah sereta bisi tuju. Ba kad jw.org, beribu iku orang bisi peluang macha Bup Kudus sereta litaricha ke bukai ngena bansa jaku sida empu. Lalu semua utai tu kala nulung mayuh orang kelia bulih pengidup ti manah agi.—2 Timoti 3:16, 17.