Bepuluh ribu iku Saksi Jehovah benung enggau naka ulih ngerembaika Berita Manah ari Bup Kudus ngagai orang ke diau jauh ari Brazil. Sida enggau kimpin ti spesial tu berengkah ari 1 September 2018 nyentukka 31 Disember 2019. Nyentukka diatu, bisi lebih ari 80,000 iku penginjil sama enggau pengawa tu. Lalu lebih ari 16,000 iku orang berengkah belajarka Bup Kudus.

Brazil nya siti menua kelima ti pemadu besai ba dunya. Enti nitihka kira-kira, bisi 28 juta iku orang diau jauh ari Brazil, lalu 22 juta iku orang ba endur ti mit. Bala penginjil udah nginjil ngagai lebih 1,600 iti endur. Indah sekeda ari penginjil nya sanggup ngagai penyauh 2,000 kilometer, ngambi ulih tetemuka orang.

Bisi sekali, seiku penginjil datai ngagai rumah seiku lelaki ke udah tuai. Lelaki nya benung ngaduka leka kupi ke ditanam iya empu. Iya mai penginjil nya tama lalu ngangauka bini iya, “Aram ninga iya. Iya deka berandau pasal Bup Kudus!”

Udah nya, laki bini nya berengkah nanya mayuh utai. Sida deka nemu nama nyadi ngagai orang mati, nama kebuah Petara ngemendarka mensia merinsa, kati kitai patut mayar chukai, baka ni mutarka penanggul ba diri sebilik, enggau mayuh agi. Ketegal iya amat rindu ningaka saut ari Bup Kudus, iya madahka, pagi nya iya bisi besampi, kati semua tanya iya tu bisi saut? Lalu ba hari nya mega, penginjil nya datai lalu nyaut ari Bup Kudus. Iya amat gaga. Lemai nya, sida sebilik pan datai begempuru, lalu sida agi belajarka Bup Kudus nyentukka diatu.

Ba endur bukai, maya penginjil benung nginjil ari rumah ke rumah, enda memukai ujan bangat. Dia, sida betemu enggau seiku indai sereta anak indu iya. Seiku ari penginjil nya nanya, kati sida bisi utai kedeka dipinta ari Petara? Anak indu nya nyaut, iya deka betemu baru enggau ini iya ke udah nadai. Nya alai, bala penginjil nya macha ayat pasal pengangkat ari pemati lalu masang video Pengangkat Ari Pemati—Deka Nyadi Enda Lama Da Agi.

Udah nya, bala penginjil nya datai ngagai rumah indai sereta anak indu nya. Sida berengkah belajarka Bup Kudus enggau sida sebilik. Indai sereta bala anak iya datai begempuru ba endur ke semak, lalu nyentukka diatu sida agi belajarka Bup Kudus nengah talipun.

Bup Kudus udah madahka, Perintah Petara deka bisi rayat “di serata dunya.” Jehovah tentu ngena kimpin nginjil ti spesial tu, kena ngamatka jaku ba ayat nya.—Masmur 72:8.