Kenyau ari 18 Januari 2020, ujan bangat sereta lain ari ke biasa nyadi ba menua begian Espírito Santo enggau Minas Gerais Brazil. Tu ngujungka bah besai nyadi, sereta ai ke datai ari bah nya amat deras. Ketegal tu mega, mayuh rumah rusak, kerita ditabanka bah, lalu mayuh pun kayu tumbang. Nitihka piak bekuasa, beribu iku orang patut dipindahka, lalu lebih ari 60 iku orang bebadi.

Ba bandar Iconha enggau Alfredo Chaves, bah nya udah ngerusak semilan buah rumah Saksi. Penyampau Saksi ke diau ba semilan buah rumah tu bisi 27 iku. Tang pemanah iya, nadai seiku pan ari menyadi Kristian kitai bebadi ketegal penusah tu.

Dalam urung 100 iku Saksi ba endur nya sukarela nulung bala menyadi ke nyadi mansa. Ari atur bala tuai gempuru, bala menyadi meri bantu ba pemakai, ai, enggau gari. Sida mega meresi rumah bala Saksi, indah orang ke diau semak sida ti ukai Saksi.

Nadai riput ti madahka menyadi kitai bebadi ketegal penusah tu. Tang, lima buah Palan Gempuru rusak, lalu dalam urung 50 ruang bilik Saksi patut dipindahka. Ketegal ai majak niki, beberapa iku menyadi kitai temengkang ba tingkat dua rumah sida, lalu patut diselamatka tim penyelamat ke ngena perau. Semua menyadi kitai ke patut ninggalka rumah sida nya, diau begulai enggau Saksi ke bukai.

Ba Espírito Santo enggau Minas Gerais, Komiti Tulung Pengerusak Alam diatur kena meri bantu ke patut. Sida bekerejasama enggau tuai ti ngabas, sereta tuai gempuru menua nya ngambi ulih meransang bala menyadi kitai ke nyadi mansa ba pengarap.

Aram meh kitai terus besampika semua menyadi kitai ke ditinggang penusah bah. Kitai amat beterima kasihka Jehovah ti ngering, merindang, sereta nulung sida nengah bala menyadi ke bukai.—Masmur 28:7.