Ketegal penusah bekaul enggau coronavirus, mayuh orang ba Brasil napi penanggul ba penatai pemisi. Nya kebuah Komiti Pampang Opis Brazil udah ngatur 18 iti Komiti Tulung Pengerusak Alam (DRC) kena meri bantu ngagai bala penginjil ke napi pengurang diatu. Semua DRC nya meri tulung ngagai kira-kira 12,000 iti eklisia di serata menua Brazil, nyengkaum bala menyadi kitai ke diau jauh ulu ba Sungai Amazon. Naka ke diatu, bisi 131 ruang bilik ke diau ba menua Amazon udah nerima bantu.

Siti DRC ba Manaus, iya nya indu nengeri ba Amazonas, nyediaka sekeda kutak ti ngundan chukup utai ke diguna siti ruang bilik kena beridup pengelama sebulan. Dalam tiap iti kutak nya bisi pemakai baka kachang, tepung empasa, beras, tepung susu; sereta utai ke diguna nyaga pemeresi diri baka sabun, tisu jamban, berus ngeli enggau ubat ngeli. Bala menyadi lalu nganjung semua kutak nya ngagai Manacapuru. Ari Manacapuru, kutak nya dibagi lalu dianjung ngena perau ngagai beberapa endur ti jauh, nyengkaum Membeca enggau Lago do Castanho.

Menyadi Marinelma, ke diau ba begian Lago do Castanho bisi nerima bantu nya. Ku iya madah: “Keterubah, aku ka meri terima kasih ngagai Jehovah laban ngibun kami. Kami amat begunaka tulung, laban kami sigi nadai duit kena meli pemakai. Pia mega, aku deka meri terima kasih ngagai bala menyadi ke ngayanka pengerindu enggau pengerah jari. Anak lelaki aku, ke beumur enam taun, tepedaka aku muka kutak nya lalu nusun pemakai ke diberi. Aku lalu nerangka iya, Jehovah udah nulung kami nengah bala menyadi. Anak aku lalu madahka aku: ‘Indai, ulih tua besampi ngagai Jehovah, meri terima kasih?’”

Menyadi Jonas Monteiro enggau diri sebilik diau ba nengeri Caapiranga. Iya nulis siti surat ngagai DRC lalu madah: “Terima kasih ke semua bantu ke diberi kita ngagai kami. Utai ke dikereja kita terang amat nunjukka Jehovah sayauka kami. Endang basa ti chukup besai, kitai nyadi sebagi ari ruang bilik tu di serata dunya.”

Bala menyadi ke bekereja enggau DRC nya pan bulih peransang. Menyadi Isaac Emannuel Ramalho de Oliveira, seiku tuai gempuru ke gawa ba DRC nerangka: “Tiap hari aku gawa enggau Komiti Tulung Pengerusak Alam, aku ngasaika pengarap aku majak kering. Asai aku, pengawa ke dikereja aku ke DRC tu mayuh agi nulung aku, ari ke aku nulung orang bukai.”

Pengarap kitai endang dikeringka seraya kitai meda chara Jehovah ibuhka bala nembiak Iya sekumbang penanggul coronavirus tu, enda ngira dini alai sida diau.—Masmur 94:14.