Ba Brasil, bisi kira-kira 1,500 buah nengeri alai nadai eklisia Saksi-Saksi Jehovah. Sekeda ari nengeri tu amat jauh ari nengeri bukai, lalu bisi mayuh orang ke diau dia ke nadai kala ningaka Berita Manah ari Saksi-Saksi Jehovah. Ketegal tu, Pampang Opis Brasil ngatur kimpin spesial ngambika nginjil ngagai orang ba endur baka tu entara bulan September ngagai Disember 2020. Ketegal sekat bekaul enggau COVID-19, kimpin tu dipejalaika enggau chara nulis surat aja. Penginjil ari 3,000 iti eklisia udah enggau kimpin tu.

Bala penginjil diasuh nginjil ngagai orang ba sesiti nengeri. Sida mansik nengah online pasal nengeri nya, ngambika nemu utai ti diguna orang ke diau dia. Ambika chunto, seiku pengerintis nulis surat ngagai orang ke diau ba siti nengeri di Tocantins. Iya nemu endur nya baru-baru ditinggang pengangus utan. Dalam surat ke ditulis iya, iya madah pasal ayat ba Pemandang 21:5, lalu iya nerangka baka ni chara Jehovah deka ‘ngaga semua utai nyadi baru’ sereta mutarka pengerusak alam ila. Beberapa hari udah nya, seiku indu nganjung mesej audio ngagai menyadi kitai lalu madahka diri amat rindu macha pasal chara Petara ulih “ngemanahka agi pengidup kitai.” Indu nya lalu minta mayuh agi penerang ari Bup Kudus.

Asil ti manah ari kimpin tu pan ulih dipeda ari mesej ke dikirum seiku orang ngagai menyadi indu ke nulis surat ngagai iya. Dalam mesej iya madah: “Baka ni ka madah, Petara endang amat udah ngena nuan ngambika nyapai ati aku. . . . Terima kasih! Nuan ngasuh aku pechaya baru, Petara amat rinduka aku lalu iya nyaga kami sebilik! Aku ngasaika diri dikesayau. Taja pan aku enda ngelala nuan, tang nuan meh nyadika saut ke sampi aku! Terima kasih!”

Seiku tuai gempuru ari Eklisia Itamarati di Petrópolis, Rio de Janeiro, nerangka asai ati bala menyadi kitai ke udah enggau kimpin spesial tu. “Kami ngasaika diri baka seiku pengerintis spesial, ti diasuh bejalai ngagai endur ti jauh. Mayuh menyadi nadai kala ngasaika peluang ke baka tu, ketegal sida napi penekul tauka bisi tanggungjawap ba diri sebilik ti nagang sida ari pindah.”

Jehovah sigi udah merekatka kimpin tu. Nya endang basa ti chukup besai lebuh kitai bisi ungkup ngerambaika Berita Manah ti “ditusui ngagai semua orang di baruh langit.”—Kolosi 1:23.