Kena 2 Ogos 2019, ba konvensyen pelilih menua di Douala Cameroon, Saksi-Saksi Jehovah udah ngeluarka Bup Kudus Jaku Gerika dalam Bansa Jaku Bassa. Projek nyalin Bup Kudus dalam Bansa Jaku Gerika nya begunaka 18 bulan. Tu meh keterubah iya, Saksi-Saksi Jehovah nyalin Bup Kudus ngagai siti ari bansa jaku asal Cameroon.

Menyadi Peter Canning, seiku ari Komiti Pampang Opis Cameroon, ngeluarka Bup Kudus nya ba hari keterubah konvensyen pelilih menua ba Palan Gempuru Besai ke ngembuan 2,015 iku orang datai.

Sebedau Bup Kudus tu dikeluarka, bala menyadi kitai ke ngena bansa jaku Bassa ngena Bup Kudus ke tusah dimereti sereta amat mar. Seiku ari penyalin ba projek nyalin Bup Kudus dalam bansa jaku Bassa madahka, “Ketegal bisi salin Bup Kudus tu, bala penginjil senang agi meretika Bup Kudus. Sida deka majak rinduka Jehovah sereta semak ngagai gerempung Iya.”

Ba Cameroon, dalam urung 300,000 iku orang ngena bansa jaku Bassa. Pia mega pampang opis ba Cameroon ngemataka 1,909 iku penginjil ke ngena bansa jaku Bassa.

Kitai amat andal, salin ke betul sereta senang dimereti tu, nulung orang ke macha meda, ‘jaku Petara idup sereta bekuasa.’—Hebrew 4:12.