Kena 13 Disembar 2019, Kot Besai Chile mutuska seiku Saksi Jehovah bisi hak nulak chara berubat ke bekaul enggau darah ketegal pengarap ke dipegai iya. Pemutus tu nginsil pemutus ke kala digaga ba kot ti mit agi.

Saksi Jehovah ke muka kes tu iya nya Menyadi Polonia Ríos. Iya patut diputung. Tang, sepital ba menua nya mayuh kali nulak peminta iya ke enggai nerima darah. Nya kebuah, menyadi kitai patut mai kes tu ngagai kot. Tang kena 6 Ogos 2019, Kot Ngapil San Miguel mutuska piak sepital nya menang.

Udah nya, Menyadi Ríos ngapil kes tu ngagai Kot Besai Chile, lalu sida pan nerima pemutus iya. Tu meh keterubah iya bisi pemutus ari Kot Besai, ke nyaga hak pesakit ti udah besai tuai ngetanka hak sida, enggai nerima darah ketegal pengarap ke dipegai. Taja pan sebedau tu, pengelama 25 taun, Kot mutuska pesakit enda ulih nulak sebarang chara berubat ke diasuh lutur, enti lutur ngasaika nya chara nyelamatka nyawa.

Pemutus ari Kot nya nulis: “Pesakit tu udah tiga taun nganti diri diputung, ketegal iya deka terus idup lalu ngulihka pengerai ti manah agi . . . Iya bisi kebuah ti berat maya iya enggai nerima darah. Pia mega, iya enda nagang bala lutur ngubat iya. Iya semina enggai nerima darah laban nya enda sejalai enggau pengarap iya. Nya patut diperundingka, laban iya bisi hak nitihka jalai pengarap diri, sereta patut dipebasaka. Nambahka nya, mayuh chara ti ulih dikena beputung tang enda ibuh begunaka darah.”

Kitai amat gaga ati enggau semua menyadi kitai ba Chile, laban kes sida ulih menang ba undang-undang dunya.—1 Korint 12:26.