Di serata dunya, bala menyadi kitai ngiga chara baru ngambika neruska pengawa nginjil taja pan penyakit COVID-19 ngenusahka pengidup sida. Bala menyadi di Ecuador udah mujur ngena mayuh chara nginjil, ngambika bekunsika Berita Manah enggau orang bukai.

Ba nengeri Ambato, seiku penginjil ke beumur tujuh taun ngirumka mesej ngagai semua pengajar iya, enggau tulung ari indai iya. Siti chunto ari mesej ke dikirumka iya nya: “Selamat pagi cikgu. Aku deka ngirumka mesej ti ngelantangka ati ngagai nuan, laban kitai napi penusah diatu. Bup Kudus madahka pasal utai manah ti deka nyadi jemah ila ba Pemandang 21:4. Aku deka nganjung link ngagai nuan pasal laman web ke bisi mayuh agi penerang.”

Seiku pengajar malas mesej iya: “Terima kasih, mang. Taja pan nuan agi biak, tang jaku nuan nunjukka nuan nemu berunding.” Seiku pengajar ke bukai nanya iya, enti iya ulih download bup My Book of Bible Stories. Pengajar nya kala ngembuan bup nya tang udah diinjau seiku ari nembiak sekula iya. Menyadi kitai ke agi biak nya madahka pengajar chara iya ulih download bup nya ari jw.org.

Sepasang laki-bini ba nengeri Quevedo ngiga lumur talipun orang ke ukai Saksi ti bisi dalam talipun seduai iya. Seduai iya lalu ngirum mesej tu ngagai semua sida: “Kami tu seiku Saksi Jehovah. Ketegal penyakit berampit balat ngenusahka kitai semua, kami enda ulih pansut kena nginjil ari rumah ke rumah. Taja pia, kami amat deka berandau enggau nuan nengah video call.”

Mayuh orang ke nerima mesej nya besetuju deka berandau ngena video call. Seiku indu kala enggai nerima penatai Saksi-Saksi Jehovah suba. Taja pia, iya meri terima kasih ngagai seduai iya lalu muji pengeransing seduai iya deka ngelantangka ati orang bukai. Indu nya madahka diri berasai stress ketegal utai ke nyadi diatu. Laki-bini nya lalu ngirumka iya fail elektronik majalah Awake! No. 1 2020 ti betajuk “Chara Mutarka Stress”. Lebuh sida berandau baru, indu nya madahka diri mayuh kali nandu macha majalah nya, lalu iya meri terima kasih.

Seiku menyadi kitai ke benama Johana ti bengal, ari begian Santo Domingo de los Tsáchilas, “nulis” surat ngena gambar. a Iya lalu ngambi gambar surat nya lalu ngirumka “surat” nya ngagai lumur talipun semua orang bengal ti bisi dalam talipun iya. Tang, seiku indu ke nerima gambar nya ukai bengal. Gambar nya narit ati orang nya, lalu iya bisi mayuh tanya. Ketegal Johana enda ulih meretika jaku iya, seiku pengerintis ke benama Rhonda nulung nyaut semua tanya orang nya.

Indu nya madahka Rhonda, gambar ke dilukis Johana ngenyitka ati lalu ngasuh iya deka nemu mayuh agi. Iya nanya enti bisi ayat Bup Kudus ke bukai ti madahka pasal utai ke benung nyadi ba dunya. Rhonda macha ayat Luke 21:10,11 ngagai iya, lalu nganjung link video Nama Kebuah Petara Nejuka Pemerinsa Nyadi? enggau Nama Kebuah Petara Ngaga Dunya? Indu nya deka terus berandau pasal Bup Kudus.

Baka Paul ke ‘besaksika pasal Perintah Petara’ taja pan iya dijil, bala menyadi kitai ngena semua peluang nginjil, taja pan enda ulih pansut ari rumah.—Kereja Rasul 28:23.